ꓗꓳꓸ ꓗꓷ ꓟ 33 ꓘꓳꓼ (1988 ꓘꓳꓼ 8 ꓦ 8 ꓠꓬꓲ) ꓠꓬ ꓟꓬ-ꓟ ꓗꓴꓷꓼ ꓗꓪ ꓬꓲꓸ ꓜꓲꓽ ꓬꓲꓸ ꓥꓳꓹ ꓙꓵꓽ ꓪ ꓣꓱꓽ ꓢꓴ ꓟ-ꓢꓼ-ꓡꓼ ꓗꓴꓷꓼ ꓙꓵꓽ ꓜꓴ (The Burma Socialist Programme Party) ꓔꓯ ꓑ ꓫꓬ ꓐꓴ ꓒꓳꓹ ꓔꓳꓹ ꓩꓴ ꓡ ꓟ ꓦꓬꓼ ꓠꓬꓲ ꓥ ꓡꓳ=
ꓟꓬ-ꓟ ꓗꓴꓷꓼ ꓠꓬ ꓐꓶ-ꓔꓲ-ꓫ ꓗꓴꓷꓼ ꓗꓪ ꓐꓰ ꓚꓳ ꓪꓴꓸ ꓙꓵꓽ ꓪ ꓡꓲꓸ ꓟꓶ ꓡꓳ= ꓖꓳ ꓡꓱ ꓡꓲꓸ ꓟ ꓗꓪ ꓪ ꓜꓱꓽ ꓪ ꓐ ꓟꓵꓽ ꓐꓰ꓾ ꓓꓰ ꓟꓵꓽ ꓮ ꓙꓵꓽ ꓪꓽ ꓡꓯ ꓘꓳ ꓢꓲꓸ ꓚꓳ ꓪꓴꓸ ꓙꓵꓽ ꓪ ꓡꓲꓸ ꓟꓶ ꓟ ꓥ ꓡꓳ= ꓖꓳ ꓟ ꓠꓬ 1948 ꓘꓳꓼ 1 ꓦ 4 ꓠꓬꓲ ꓗꓪ ꓥ ꓡꓳ= ꓖꓳ ꓗꓪ ꓐꓰ ꓪꓴꓸ ꓔꓴ ꓢꓲ꓾ 1958 ꓘꓳꓼ ꓗꓪ ꓛꓲ ꓠꓬ ꓙꓲˍ ꓟ ꓦꓬꓼ ꓠꓬꓲ 10 ꓘꓳꓼ ꓕꓲ ꓕꓳꓸ ꓘꓳ ꓣꓴ ꓟꓶ ꓡꓳ= ꓑ-ꓡꓲ-ꓟ ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓙꓳ ꓡꓳ=
ꓖꓳ ꓡꓱ ꓥ ꓟꓲ꓾ ꓟꓯꓼ ꓗꓪ ꓟ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓦꓯꓸ ꓠꓲꓹ ꓙꓵꓽ ꓓꓳ ꓡ ꓢꓲ꓾ ꓗꓴꓷꓼ ꓙꓵꓽ ꓪ ꓔꓯ ꓣꓴ ꓠꓹ ꓟ ꓢꓯꓼ ꓕꓵꓼ ꓡ ꓡꓳ= ꓖꓳ ꓡꓱꓳ ꓫꓵꓽ ꓘꓴ ꓘꓴ ꓠꓯ ꓠꓯ ꓙꓵꓽ ꓪ ꓦꓴ ꓡꓯ ꓘꓳ ꓓꓴ ꓙꓳ ꓡ ꓟ ꓠꓬ꓾ 1958 ꓘꓳꓼ ꓗꓪ ꓥ ꓡꓳ= ꓖꓳ ꓕꓲ ꓘꓳꓼ ꓗꓪ ꓐꓰ ꓕ ꓑꓳꓸ ꓠꓬ꓾ ꓗꓴꓷꓼ ꓠꓽ ꓢꓲ ꓡꓲꓹ ꓟ ꓟꓽ ꓙꓳ=
ꓟꓵꓽ ꓘꓶ ꓟꓵꓽ ꓡꓯꓼ ꓗꓪ ꓟ ꓟꓵꓽ ꓚꓰ ꓡ ꓞꓳ ꓫꓵꓽ ꓐꓴ ꓮ ꓙꓵꓽ ꓠꓬ ꓜꓲꓽ ꓜꓲꓽ ꓑꓰꓹ ꓑꓰꓹ ꓙꓵꓽ ꓢꓴ ꓔꓯ ꓔꓳꓹ ꓡꓯ ꓘꓳ ꓠꓹ ꓟ ꓐꓰ꓾ ꓚꓲ ꓛꓬ ꓟꓵꓽ ꓔꓯ ꓗꓽ ꓠꓹ ꓟ ꓑꓳꓺ ꓔꓯꓹ ꓓꓳ ꓡ ꓡꓳ= ꓝꓮꓲ ꓡꓳ ꓒꓱ ꓗꓪ ꓟ ꓑ ꓫꓬ ꓮ ꓙꓵꓽ ꓠꓬ ꓙꓵꓽ ꓪ ꓦꓴ ꓟꓯꓼ ꓡꓰ ꓫꓸ ꓟꓴ ꓫꓸ ꓚꓬ ꓬꓰ ꓖꓶ ꓡ ꓟ ꓔꓯ ꓕꓲ ꓝꓸ ꓗꓳꓸ ꓑꓳꓸ ꓕꓲ ꓝꓸ ꓜꓲꓽ ꓔꓬ ꓠ ꓗꓷ ꓡꓰꓳ= ꓦꓲ ꓡꓳꓸ ꓗꓴꓷꓼ ꓙꓵꓽ ꓜꓴ꓾ ꓒꓳꓹ ꓔꓳꓹ ꓟ ꓗꓳ-ꓢꓰ꓾ ꓝꓮꓲ ꓟꓼ-ꓢꓼ-ꓡꓼ ꓑ-ꓔꓲ ꓡꓰ ꓙꓵꓽ ꓟ ꓦꓬꓼ ꓠꓬꓲ ꓐꓯ ꓢꓲꓸ ꓬꓲꓸ ꓔꓱꓹ ꓬꓲꓸ ꓔꓱꓹ ꓕꓲ ꓝꓸ ꓗꓸ ꓠꓯꓸ ꓕꓲ ꓝꓸ ꓗꓶꓸ ꓢꓲꓸ ꓙꓵꓽ ꓪ ꓣꓴ ꓔꓸ ꓡꓳ=
ꓶꓼ ꓡꓯꓼ ꓚꓱꓹ꓾ ꓮ ꓫꓵꓽ ꓟꓬꓱꓽ ꓬꓰ ꓚꓱꓹ ꓮ ꓙꓵꓽ ꓠꓬ ꓟꓯꓼ ꓙꓵꓽ ꓪ ꓙꓳ ꓢꓴ ꓐꓴ ꓡꓯ ꓒꓯꓹ ꓗꓪ ꓗꓷ ꓡꓰ ꓢꓲ꓾ ꓑ ꓫꓬ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓮ ꓫꓵꓽ ꓬꓰ ꓗꓸ ꓟꓽ ꓘꓳ ꓗꓪ ꓛꓲ ꓫꓸ ꓓꓲꓼ ꓡ ꓠꓬꓲ꓾ 1988 ꓘꓳꓼ 8 ꓦ 8 ꓠꓬꓲ ꓕꓯ꓾ ꓕꓲ ꓗꓴꓷꓼ ꓡꓱꓸꓼ ꓑ ꓫꓬ ꓮ ꓙꓵꓽ ꓗꓴꓷꓼ ꓙꓵꓽ ꓢꓴ ꓔꓯ ꓒꓳꓹ ꓔꓳꓹ ꓟ ꓬꓰ ꓔꓴ ꓡ ꓡꓳ= ꓖꓳ ꓕꓯ ꓙꓵꓽ ꓪ ꓔꓯ ꓩꓴꓺ ꓗꓷ ꓟꓽ ꓬꓯꓼ ꓠꓬꓲ꓾ ꓑ ꓫꓬ ꓔꓯ ꓫꓸ ꓠꓬꓲ ꓤꓼ ꓟ ꓬꓲꓸ ꓛꓲ ꓢꓰꓼ ꓩꓴ ꓡ ꓡꓳ= ꓡꓽ ꓛꓴꓸ ꓡꓰ ꓐꓶ ꓢꓰꓼ ꓢꓴ ꓐꓯ ꓖꓴ ꓟꓽ ꓓ= ꓙꓵꓽ ꓪ ꓗꓪ ꓐꓰ ꓶ ꓡꓯꓼ ꓬꓰ ꓢꓴ ꓐꓴ ꓠꓽ ꓙꓵꓽ ꓪ ꓔꓯ ꓩꓴ ꓗꓷ ꓟꓽ ꓬꓯꓼ= ꓑ ꓫꓬ ꓙꓲ ꓖꓴ ꓐꓱ ꓶ ꓟꓽ ꓥ ꓥ꓾ ꓚꓲ ꓛꓬ ꓐꓱ ꓶ ꓙꓵꓽ ꓪ ꓣꓱꓽ ꓡ ꓕꓲ ꓝꓸ ꓗꓸ ꓠꓯꓸ ꓕꓲ ꓝꓸ ꓮ ꓟꓶ ꓗꓪ ꓛꓲꓥ ꓡꓳ=ꓮ ꓟꓶ 33 ꓘꓳꓼ ꓗꓪ ꓛꓲ꓾ ꓟꓬ-ꓟ ꓗꓴꓷꓼ ꓓꓰ-ꓟꓳ-ꓗꓯ-ꓢꓰ ꓐꓱ ꓶ ꓢꓯꓼ ꓕꓵꓼ ꓩꓴ ꓡ ꓟ ꓙ ꓖꓴ ꓠꓽ ꓚ ꓫꓵ ꓚ ꓟꓽ ꓡꓱꓺ꓾ ꓠꓲꓹ ꓟ ꓦꓶ ꓓꓴ꓾ ꓠꓲꓹ ꓟ ꓠꓻ ꓓꓴ ꓐꓯ ꓖꓴ ꓟꓽ ꓓ= ꓕꓱ ꓕꓲ ꓤꓶ ꓗꓪ ꓥ ꓟꓲ 2021 ꓘꓳꓼ 2 ꓦ 1 ꓠꓬꓲ ꓗꓪ ꓟꓯꓼ ꓜꓲꓽ ꓐꓴ ꓡꓰ ꓙꓵꓽ ꓪ ꓦꓴ ꓔꓯꓹ ꓙꓰ ꓢꓲꓸ ꓡ ꓞꓳ ꓢꓰꓼ ꓔꓬ ꓟ 1000 ꓮ ꓡꓻ ꓥꓳ= ꓝꓮꓲ ꓑ ꓫꓬ ꓐꓱ ꓶ ꓟꓽ ꓓꓵ ꓙ ꓙ ꓚꓳꓦꓲꓓ-19 ꓔꓯ ꓗꓽ ꓠꓹ ꓟ ꓟꓽ ꓬꓰ ꓟ ꓑꓶꓸ ꓓꓴ꓾ ꓝꓮꓲ ꓠꓻ ꓡ ꓕꓯ ꓥ ꓟꓲ ꓑ ꓫꓬ ꓔꓯ ꓫꓳ ꓙ ꓬꓰ ꓙ ꓟ ꓟꓽ ꓙꓳ ꓟ ꓑꓶꓸ ꓓꓴ꓾ ꓚꓲ ꓛꓬ ꓙꓲ ꓖꓴ ꓐꓱ ꓶ ꓡꓰ ꓡꓳꓸ ꓢꓲꓸ ꓗꓴꓷꓼ ꓔꓯ ꓮ ꓡꓲ ꓜꓳ ꓮ ꓡꓲ ꓙꓵꓽ ꓔꓬ ꓠꓬꓲ꓾ ꓫꓸ ꓢꓴ꓾ ꓦꓰꓼ ꓟꓷꓼ ꓢꓴ꓾ ꓠꓻ ꓢꓴ꓾ ꓫꓵꓻ ꓢꓴ ꓵꓺ ꓖꓴ ꓟꓽ ꓓꓻꓳ=
ꓟꓬ-ꓟ ꓡ ꓞꓳ ꓐꓴ ꓠꓽ ꓙꓲ ꓟ ꓗꓴꓷꓼ ꓙꓵꓽ ꓢꓴ꓾ ꓚꓲ ꓛꓬ ꓡꓰ ꓢꓲꓻ ꓔꓸ ꓟ ꓗꓴꓷꓼ ꓙꓵꓽ ꓢꓴ ꓔꓯ ꓥꓳ ꓡꓳꓸ ꓔꓬ ꓟ ꓟꓶ ꓫꓵ ꓡꓰꓳ= ꓓꓰ-ꓟꓳ-ꓗꓯ-ꓢꓰ ꓐꓯ ꓟ ꓑ ꓫꓬ ꓡꓰ ꓙꓵꓽ ꓟ ꓙꓵꓽ ꓚꓱꓹ ꓓꓳ ꓡ ꓠꓹ ꓟ ꓐꓯ ꓶ ꓢꓯꓼ ꓕꓵꓼ ꓩꓴ ꓡ ꓟ ꓠꓬ ꓮ ꓟꓶ 33 ꓘꓳꓼ ꓐꓲ ꓡꓰꓳ= ꓮ ꓕꓯ ꓢꓲꓸ ꓑ ꓫꓬ ꓙꓵꓽ ꓪ ꓙꓳ ꓡ ꓥ ꓢꓶ?