7 ꓦ 7 ꓠꓬꓲ (Seventh July) ꓐꓯ ꓟ ꓦꓬꓼ ꓠꓬꓲ ꓕꓲ ꓠꓬꓲ ꓠꓬ ꓟꓬ-ꓟ ꓗꓴꓷꓼ ꓚ ꓟꓲꓽ ꓗꓪ ꓟꓲ ꓡꓰ ꓟꓽ ꓓ ꓟ ꓦꓬꓼ ꓠꓬꓲ ꓕꓲ ꓠꓬꓲ ꓥ ꓡꓳ= ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓡꓰ ꓔꓯ-ꓖꓶ-ꓓꓴꓽ ꓟꓴ ꓕꓲꓸ ꓢꓷꓸ ꓠꓲꓹ ꓢꓳ ꓢꓴ ꓮ ꓟꓬꓹ ꓔꓯ ꓢꓰꓼ ꓗꓷ ꓟ ꓦꓬꓼ ꓠꓬꓲ ꓥ ꓡꓳ= ꓢꓷꓸ ꓠꓲꓹ ꓢꓳ ꓤ ꓐꓴ ꓜꓴ ꓚꓰꓺ ꓦꓲ ꓔꓯ ꓐꓳꓽ ꓑꓳ ꓢꓰꓸ ꓩꓴ ꓗꓷ ꓟ ꓦꓬꓼ ꓠꓬꓲ ꓥ ꓡꓳ= ꓖꓳ ꓕꓲ ꓠꓬꓲ ꓠꓬ ꓠꓽ ꓛꓳꓼ ꓠꓬꓲ ꓥ ꓢꓲ꓾ ꓑ ꓫꓬ ꓙꓵꓽ ꓪ ꓦꓴ ꓟ ꓔꓯ ꓢꓷꓸ ꓠꓲꓹ ꓢꓳ ꓒ ꓢꓳ ꓟ ꓐꓴ ꓡꓰ ꓒꓳꓹ ꓔꓳꓹ ꓡꓳ= ꓖꓳ ꓕꓲ ꓠꓬꓲ ꓗꓪ ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓢꓴ ꓟꓯꓼ ꓐꓴ ꓡꓰ ꓢꓷꓸ ꓠꓲꓹ ꓢꓳ ꓢꓴ 100 ꓣꓳ ꓟꓽ ꓞꓲ ꓢꓰꓼ ꓗꓷꓳ=
1962 ꓘꓳꓼ 3 ꓦ 2 ꓠꓬꓲ ꓕꓯ ꓑ ꓫꓬ ꓙꓵꓽ ꓪ ꓔꓯ ꓖꓳ ꓕꓯ ꓟ ꓟꓯꓼ ꓜꓲꓽ ꓓꓽ ꓟ ꓠꓯ-ꓪꓰꓸ ꓡꓰ ꓦꓴ ꓔꓯꓹ ꓙꓰꓳ= ꓖꓳ ꓟ ꓑꓶꓸ ꓓꓴ ꓗꓴꓷꓼ ꓔꓯ ꓪꓴꓽ ꓟꓴ ꓡ ꓝꓲ ꓠꓲꓹ ꓫꓵ ꓟ ꓢꓷꓸ ꓠꓲꓹ ꓢꓳ ꓤ ꓐꓴ ꓮ ꓘꓶꓸ ꓠꓲꓹ ꓘꓪ ꓟꓽ ꓫꓵ= ꓬꓥ-ꓖꓳꓥ ꓟꓴ ꓕꓲꓸ ꓢꓷꓸ ꓠꓲꓹ ꓢꓳ ꓔꓶꓸ ꓗꓪ ꓒꓳꓹ ꓔꓳꓹ ꓓꓴ ꓙ ꓖꓶꓽ ꓔꓬ ꓡꓳ= ꓖꓳ ꓕꓯ ꓑ ꓫꓬ ꓙꓵꓽ ꓪ ꓦꓴ ꓢꓴ ꓕꓵꓼ ꓘꓶꓽ ꓗꓪ ꓐꓰ 1962 ꓘꓳꓼ 7 ꓦ 7 ꓠꓬꓲ ꓕꓯ ꓢꓷꓸ ꓠꓲꓹ ꓟꓴ ꓕꓲꓸ ꓢꓳ ꓦꓲ ꓗꓪ ꓟ ꓢꓳ ꓒ ꓢꓳ ꓟ ꓐꓴ ꓦꓲ ꓔꓯ ꓐꓳꓽ ꓓꓽ ꓟ ꓡꓰ ꓐꓶꓽ ꓢꓰꓸ ꓩꓴ ꓡ ꓢꓲ꓾ ꓜꓲ ꓜꓲꓽ ꓑꓰꓹ ꓑꓰꓹ ꓢꓰꓼ ꓡ ꓡꓳ= ꓖꓳ ꓗꓪ ꓫꓵꓻ ꓢꓴ ꓐꓯ ꓖꓴ ꓟꓽ ꓓ= ꓟ ꓫꓵꓻ ꓟ ꓟꓯꓹ ꓔꓶꓹ ꓡ ꓢꓴ ꓐꓴ ꓔꓯ ꓙꓵꓽ ꓪ ꓦꓴ ꓟꓯꓼ ꓐꓴ ꓡꓰ ꓡ ꓛꓴꓸ ꓗꓪ ꓐꓰ ꓐꓶ ꓢꓰꓼ ꓗꓷ ꓡꓳ= ꓟꓽ ꓫꓵꓻ ꓢꓰꓽ ꓕꓯ ꓢꓳ ꓒꓽ ꓕꓲ ꓣꓳ ꓡꓰ ꓬꓲꓸ ꓫꓵꓽ ꓗꓪ ꓐꓰ ꓭꓸ ꓗꓶ ꓛꓲ ꓗꓪ ꓕꓳ ꓶ ꓝꓳꓹ ꓕꓱ ꓡꓱ ꓐꓳ ꓒꓰꓹ ꓡꓳ= “7 ꓦ ꓟ 7 ꓠꓬꓲ ꓮ ꓕꓯ ꓟꓲ ꓕꓽ ꓟꓲ ꓡꓰ – ၇.၇.၆၂ မမေ့ကြနဲ့”
ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓒꓽ ꓐꓴ ꓡꓰ ꓑ ꓫꓬ ꓙꓵꓽ ꓪ ꓬꓲꓸ ꓪꓴꓸ ꓦꓴ ꓪꓴꓸ ꓔꓴ ꓟ ꓠꓬ 1962 ꓘꓳꓼ ꓥ ꓢꓲ꓾ ꓢꓷꓸ ꓠꓲꓹ ꓢꓳ ꓒꓽ ꓐꓴ ꓡꓰ ꓔꓳꓹ ꓡ ꓟ ꓑꓶꓸ ꓓꓴ ꓢꓷꓸ ꓠꓲꓹ ꓢꓳ ꓒꓽ ꓐꓴ ꓔꓯ ꓢꓰꓼ ꓡ ꓟ ꓦꓬꓼ ꓠꓬꓲ ꓥ ꓡꓳ=
ꓠꓬꓲꓸ ꓠꓬꓲ 2021 ꓘꓳꓼ ꓗꓪ ꓥ ꓟꓲ ꓑ ꓫꓬ ꓙꓵꓽ ꓪ ꓔꓯ ꓦꓴ ꓡ ꓢꓲ꓾ ꓞꓲꓼ ꓣꓳ ꓢꓴ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ (Generation Z) ꓡꓰ ꓧꓳ ꓪꓴꓸ ꓟꓴ ꓢꓲ ꓮ ꓟꓶ ꓗꓪ ꓛꓲ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓔꓬ ꓟ ꓥ ꓡꓳ= ꓙꓵꓽ ꓪ ꓦꓴ ꓢꓴ ꓐꓴ ꓠꓬ ꓙꓵꓽ ꓪ ꓗꓪ ꓐꓰ ꓶ ꓡꓯꓼ ꓒꓳꓹ ꓠꓲꓹ ꓫꓵ ꓡꓳ= ꓗꓴꓷꓼ ꓐꓰ ꓑ ꓫꓬ ꓔꓯ ꓠꓲꓹ ꓠꓵ ꓟ ꓗꓪ ꓐꓰ ꓙꓵꓽ ꓪ ꓣꓴ ꓟ ꓟꓽ ꓥ= ꓚꓲ ꓛꓬ ꓐꓱ ꓶ ꓢꓯꓼ ꓕꓵꓼ ꓟ ꓙꓵꓽ ꓪ ꓙꓳ ꓢꓴ ꓕꓲ ꓝꓸ ꓡꓲ ꓕꓲ ꓝꓸ ꓗꓪ ꓡꓳꓸ ꓟꓳ ꓓ ꓡꓳ= ꓬꓲꓸ ꓪ ꓠꓬ ꓢꓷꓸ ꓠꓲꓹ ꓢꓷꓸ ꓢꓴ ꓐꓴ ꓔꓯ ꓟꓽ ꓠꓵ= ꓬꓲꓸ ꓪ ꓔꓯ ꓢꓰꓼ ꓠꓹ ꓟ ꓮ ꓕꓯ ꓟꓲ ꓙ ꓖꓶꓽ ꓔꓬ ꓡꓳ= ꓮ ꓡꓲꓳ ꓐꓯ ꓠꓬ ꓢꓷꓸ ꓠꓲꓹ ꓢꓷꓸ ꓢꓴ ꓟꓽ ꓙꓳ ꓟ ꓗꓴꓷꓼ ꓔꓯ ꓠꓬ ꓬꓲꓸ ꓪ ꓡꓰ ꓢ ꓢꓹ ꓤꓼ ꓙꓵꓽ ꓐ ꓡ ꓥꓳ ꓐꓰ ꓢꓪꓼ ꓔꓸ ꓡꓳ= ꓠꓬꓲꓸ ꓠꓬꓲ ꓗꓪ ꓛꓲ ꓑ ꓫꓬ ꓠꓲꓹ ꓡꓶꓽ ꓟꓽ ꓛꓳ ꓛꓳ꓾ ꓜꓲꓽ ꓜꓲꓽ ꓑꓰꓹ ꓑꓰꓹ ꓠꓬꓲꓸ ꓤꓲ ꓔꓬ ꓟ ꓦꓬꓼ ꓠꓬꓲ ꓟꓽ ꓖꓴ ꓡꓰ ꓢꓰ= ꓓꓰ-ꓟꓳ-ꓗꓯ-ꓢꓰ ꓙꓵꓽ ꓚꓱꓹ ꓗꓪ ꓙꓵꓽ ꓪ ꓥ ꓕ ꓑꓳꓸ ꓠꓬ ꓑ ꓫꓬꓼ ꓗꓪ ꓐꓰ ꓡ ꓡꓳ ꓐꓯ ꓟ ꓡꓰ ꓐꓰ꓾ ꓟꓶ ꓤ ꓟꓽ ꓥ ꓠꓬ ꓑ ꓫꓬ ꓙꓵꓽ ꓪ ꓡꓲꓸ ꓟꓶ ꓥꓳ ꓐꓰ ꓥꓳ ꓡꓳꓸ ꓔꓬ ꓡꓳ=