7 ꓦ 19 ꓠꓬꓲ ꓠꓬ꓾ ꓟꓬ-ꓟ ꓗꓴꓷꓼ ꓑ ꓫꓬꓼ ꓐꓴ ꓠꓲꓹ ꓠꓻ ꓟꓬ ꓠꓻ ꓠꓬꓲ ꓥ ꓡꓳ= ꓗꓴꓷꓼ ꓧꓳꓽ ꓪꓴꓸ ꓟꓴ ꓢꓴ (9) ꓣꓳ ꓔꓯ ꓢꓰꓼ ꓪ ꓡꓰ ꓟ ꓦꓬꓼ ꓠꓬꓲ ꓥ ꓡꓳ=1947 ꓘꓳꓼ 7 ꓦ 19 ꓠꓬꓲ ꓕꓯ ꓬꓥ-ꓖꓳꓥ ꓗꓪ ꓟꓬꓱꓽ ꓢꓲꓽ ꓒꓽ ꓓꓽ ꓟ ꓐꓴ ꓬꓳꓹ ꓦꓲ ꓗꓪ ꓐꓶ-ꓔꓲ-ꓫꓵ ꓐꓴ ꓙꓵꓽ ꓔꓬ ꓟ ꓗꓪ ꓐꓰ ꓗꓴꓷꓼ ꓡꓲꓸ ꓟꓶ ꓠꓹ ꓟ ꓙ ꓖꓶ ꓢꓴ ꓐꓳ-ꓛꓳꓼ-ꓮꓳ-ꓢꓸ ꓐꓰ ꓬꓲꓸ ꓟꓬꓱꓽ ꓬꓰ ꓛꓳ ꓒꓯꓹ ꓐꓴ ꓖꓪ ꓙꓱ ꓜꓲꓼ ꓓꓴ ꓬꓰ ꓔꓬ ꓡꓳ= ꓖꓳ ꓗꓪ ꓑꓳ ꓔꓯꓹ ꓢꓴ 4 ꓣꓳ ꓓꓵꓽ ꓡ ꓢꓲ꓾ ꓐꓶ ꓡ ꓕꓯ꓾ 9 ꓣꓳ ꓫꓵꓻꓳ= ꓕꓱ ꓟ ꓠꓬ ꓐꓶ-ꓔꓲ-ꓫꓵ ꓡꓯ ꓒꓯꓹ ꓗꓪ ꓐꓰ ꓗꓴꓷꓼ ꓟꓽ ꓡꓲꓸ ꓟꓶ ꓢꓰꓽ ꓟ ꓕꓲ ꓘꓳꓼ ꓗꓪ ꓕꓱ ꓡꓱ ꓒꓬꓱꓼ ꓗꓷ ꓟ ꓥ ꓡꓳ= 7 ꓦ ꓟꓶ ꓦ ꓬꓯꓼ ꓟ ꓐꓰ ꓕꓲ ꓛꓳ ꓟꓬ-ꓟ ꓑ ꓫꓬ ꓐꓴ ꓮ ꓙꓵꓽ ꓠꓽ ꓠꓲꓹ ꓠꓻ ꓟꓬ ꓠꓻ ꓟꓬ ꓐꓲ ꓓꓳ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓠꓬꓲꓸ ꓠꓬꓲ 74 ꓘꓳꓼ ꓡꓳꓼ ꓡ ꓕꓯ ꓥ ꓟꓲ꓾ ꓑ ꓫꓬ ꓐꓴ ꓡꓰ ꓢꓲꓻ ꓣꓴ ꓔꓸ ꓟ ꓗꓴꓷꓼ ꓪꓴꓸ ꓓꓵ ꓧꓳꓽ ꓢꓴ ꓐꓴ ꓔꓯ ꓑ ꓫꓬ ꓙꓵꓽ ꓪ ꓦꓴ ꓟꓯꓼ ꓡꓰ ꓣꓴ ꓡꓴꓽ ꓔꓸ ꓡꓳ= ꓕꓲ ꓐꓱ ꓠꓬ ꓚꓳꓦꓲꓓ-19 ꓠꓻ ꓜꓳ ꓡꓰ ꓢꓲ꓾ ꓠꓯ ꓞꓲꓼ ꓦꓲ ꓗꓪ ꓢꓯꓼ ꓟꓬ ꓚꓬꓴꓹ ꓔꓬ ꓠ ꓗꓷ ꓡꓰꓳ= ꓗꓴꓷꓼ ꓙꓵꓽ ꓪ ꓡꓰ ꓗꓴꓷꓼ ꓔꓯ ꓫꓬꓹ ꓜꓶ ꓟ ꓐꓰ꓾ ꓑ ꓫꓬ ꓐꓴ ꓐꓱ ꓶ ꓙꓲ ꓖꓴ ꓙꓳ ꓡꓰ ꓠꓹ ꓟ ꓕꓯꓽ ꓢꓲ꓾ ꓗꓴꓷꓼ ꓙꓵꓽ ꓪ ꓦꓴ ꓣꓴ ꓢꓲ꓾ ꓚꓲ ꓛꓬ ꓐꓱ ꓶ ꓙꓲ ꓖꓴ ꓟꓶ ꓓꓴ꓾ ꓚꓲ ꓛꓬ ꓶ ꓡꓯꓼ ꓚꓱꓹ ꓐꓱ ꓶ ꓣꓱꓽ ꓢꓴ ꓑꓶꓸ ꓓꓴ ꓟꓬ-ꓟ ꓗꓴꓷꓼ ꓠꓬ ꓮ ꓟꓶ ꓗꓪ ꓛꓲ ꓞꓳ ꓫꓸ ꓗꓴꓷꓼ ꓒꓬꓱꓼ ꓔꓬ ꓡꓳ= ꓐꓶ-ꓔꓲ-ꓫꓵ ꓡꓯ ꓒꓯꓹ ꓗꓪ ꓐꓰ ꓗꓴꓷꓼ ꓙꓵꓽ ꓪ ꓡꓲꓸ ꓟꓶ ꓟ ꓕꓲ ꓘꓳꓼ 1948 ꓘꓳꓼ ꓗꓪ ꓐꓰ 1958 ꓘꓳꓼ ꓗꓪ ꓛꓲ 10 ꓘꓳꓼ ꓠꓬ ꓗꓴꓷꓼ ꓙꓵꓽ ꓚꓱꓹ ꓗꓪ ꓑ ꓫꓬ ꓙꓵꓽ ꓪ ꓙꓳ ꓡꓳ= ꓝꓮꓲ 2010 ꓗꓪ ꓐꓰ 2020 ꓗꓪ ꓛꓲ ꓥ ꓟꓲ ꓑ ꓫꓬ ꓙꓵꓽ ꓪ ꓮ ꓔꓲꓸ ꓤꓼ (75%) ꓙꓳ ꓡꓳ= ꓖꓳ ꓡꓱ ꓐꓯ ꓥ ꓟꓲ꓾ ꓟꓯꓼ ꓜꓲꓽ ꓞꓳ ꓐꓳ ꓐꓴ ꓡꓰ ꓙꓵꓽ ꓪ ꓔꓯ ꓶ ꓡꓯꓼ ꓬꓰ ꓚꓱꓹ ꓡꓰ ꓐꓰ ꓢꓪꓼ ꓗꓷ ꓢꓲ꓾ ꓮ ꓟꓶ ꓗꓪ ꓛꓲ ꓗꓴꓷꓼ ꓐꓰ ꓗꓴꓷꓼ ꓑ ꓫꓬ ꓔꓯ ꓫꓸ ꓟꓳ ꓫꓸ ꓚꓬ ꓬꓰ ꓔꓬ ꓡꓳ= ꓠꓬꓲꓸ ꓠꓬꓲ ꓥ ꓟꓲ꓾ ꓗꓴꓷꓼ ꓑ ꓫꓬ ꓐꓴ ꓠꓽ ꓠꓲꓹ ꓠꓻ ꓟꓬ ꓠꓻ ꓔꓬ ꓟ ꓟꓽ ꓠ ꓡꓰ ꓢꓰ= ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓡꓰ꓾ ꓑ ꓫꓬ ꓐꓴ ꓔꓯ ꓘꓶ ꓙꓵ ꓟ ꓐꓯ ꓖꓴ ꓟꓽ ꓓ= ꓚꓳꓹ ꓠꓬꓲ꓾ ꓞꓳꓹ ꓠꓬꓲ꓾ ꓔꓲꓸ ꓠꓬꓲ ꓓꓶꓽ ꓠꓬꓲ꓾ ꓐꓯ ꓟꓴ ꓩꓴ ꓠꓬꓲ꓾ ꓐꓱ ꓓꓴꓽ ꓗꓪ ꓡꓴꓽ ꓠꓬ꓾ ꓢꓰꓼ ꓠꓬꓲ ꓕꓱ ꓡꓱ ꓬꓰ ꓡ ꓟ ꓔꓯ ꓔꓳꓹ ꓜꓳ ꓔꓬ ꓡꓳ= ꓚꓳꓦꓲꓓ-19 ꓠꓻ ꓓꓱꓽ ꓔꓯ ꓑ ꓫꓬꓼ ꓐꓴ ꓠꓯꓸꓼ ꓗꓪ ꓒꓬꓱꓺ ꓙꓰ ꓠꓹ ꓟ ꓐꓱ ꓶ ꓢꓷꓸ ꓠꓲꓹ ꓢꓳ ꓦꓲ ꓔꓯ ꓟꓽ ꓓꓽ ꓟꓽ ꓢ ꓒꓴ ꓠꓬꓲ꓾ ꓪ ꓘꓴ ꓦꓲ ꓐꓰ ꓠꓱꓸ ꓐꓯꓼ ꓞꓳ ꓜꓲꓼ ꓪ ꓜꓲꓼ ꓑꓮꓲ ꓬꓰ ꓝꓲ ꓠꓬꓲ꓾ ꓠꓻ ꓡ ꓕꓯ ꓠꓯ ꓞꓲꓼ ꓟꓽ ꓫꓬꓹ ꓖꓶ ꓟ ꓐꓰ꓾ ꓳꓫꓬꓖꓰꓠ ꓟꓽ ꓖꓶ ꓟ꓾ ꓢ ꓘꓪ ꓕꓯ ꓙꓰ ꓚꓳ ꓢꓲ ꓠꓯ ꓞꓲꓼ ꓧꓪ ꓫꓸ ꓟ ꓑꓶꓸ ꓓꓴ ꓕꓲ ꓠꓬꓲ ꓗꓪ ꓬꓥ-ꓖꓳꓥ ꓕꓲ ꓡꓳ ꓒꓱ ꓠꓯꓸꓼ ꓗꓪ 1000 ꓣꓳ ꓟꓽ ꓞꓲ ꓢꓯꓼ ꓟꓬ ꓖꓴ ꓡꓰ ꓔꓬ ꓡꓳ=
ꓑ ꓫꓬ ꓠꓲꓹ ꓠꓵ ꓟ ꓧꓳꓽ ꓢꓴ ꓔꓯ ꓢꓰꓼ ꓟ ꓠꓬ ꓑ ꓫꓬ ꓔꓯ ꓢꓰꓼ ꓟ ꓥ ꓡꓳ= ꓑ ꓫꓬ ꓥꓳ ꓡꓳꓸ ꓦ ꓡꓱ ꓐꓳ ꓟ ꓧꓳꓽ ꓢꓴ ꓔꓯ ꓣꓴ ꓡꓴꓽ ꓔꓸ ꓟ ꓠꓬ ꓑ ꓫꓬ ꓔꓯ ꓣꓴ ꓡꓴꓽ ꓔꓸ ꓟ ꓥ ꓡꓳ= ꓗꓴꓷꓼ ꓔꓶ ꓪꓴꓸ ꓔꓴ ꓢꓴ ꓧꓳꓽ ꓢꓴ ꓟꓴ ꓢꓴ ꓐꓴ ꓓꓵꓽ ꓙ ꓔꓸ ꓟ ꓪꓴꓽ ꓟꓴ ꓗꓹ ꓛꓲ ꓟ ꓗꓴꓷꓼ ꓔꓶ ꓙꓱꓼ ꓗꓪ ꓠꓬꓲꓸ ꓠꓬꓲ ꓗꓪ ꓛꓲ ꓟꓽ ꓛꓲ ꓬꓰ ꓢꓰ= ꓙꓵꓽ ꓪ ꓑꓶꓸ ꓓꓴ ꓢꓰꓼ ꓡꓯ ꓘꓳ ꓔꓬ ꓡꓳ= ꓑ ꓫꓬ ꓔꓯ ꓠꓬꓲꓸ ꓤꓲ ꓔꓬ ꓡꓳ= ꓑ ꓫꓬ ꓔꓯ ꓠꓲꓹ ꓠꓵ ꓟ ꓙꓵꓽ ꓢꓴ ꓐꓰ꓾ ꓖꓳ ꓡꓱꓳ ꓫꓵꓽ ꓙꓵꓽ ꓢꓴ ꓔꓯ ꓘꓶ ꓡꓶꓽ ꓢꓰꓼ ꓢꓴ ꓟꓽ ꓙꓳ ꓟ ꓟꓬ-ꓟ ꓗꓴꓷꓼ ꓮ ꓕꓯ ꓢꓲꓸ ꓒꓬꓱꓼ ꓡ ꓢꓰ= ꓞꓳ ꓤ ꓠꓽ ꓢꓷꓸ ꓟꓽ ꓐ ꓡꓻꓳ= ꓪꓴ-ꓢ ꓠꓬ ꓢꓷꓸ ꓥꓳ=ꓟꓬ-ꓟ ꓑ ꓫꓬꓼ ꓐꓴ ꓠꓬ “ꓗꓴꓷꓼ ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷ ꓢꓴ ꓞ ꓘꓹ ꓒꓽ” ꓬꓲꓸ ꓐꓶꓹ ꓙꓳ ꓝꓲ ꓠꓲꓹ ꓟꓽ ꓫꓵꓳ= ꓥꓶꓸ ꓟ ꓬꓰ ꓢꓴ ꓐꓴ ꓐꓰ꓾ ꓑ ꓫꓬ ꓠꓲꓹ ꓡꓶꓽ ꓟꓽ ꓙꓳ ꓙꓳ ꓟꓽ ꓓ ꓟꓽ ꓢ ꓙꓵꓽ ꓠꓲꓹ ꓫꓵ ꓢꓴ ꓐꓴ ꓢꓯꓸ ꓔꓬ ꓟ ꓕꓱ ꓕꓲ ꓤꓶ ꓗꓪ ꓬꓲꓸ ꓟꓶꓽ ꓢꓰꓼ ꓡꓰ ꓝꓲ ꓠꓲꓹ ꓫꓵ ꓡꓳ= ꓗꓹ ꓛꓲ ꓟ ꓐꓰ ꓪꓴꓽ ꓟꓴ ꓡ ꓟ ꓟꓬ-ꓟ ꓗꓴꓷꓼ ꓒꓬꓱꓼ ꓡ ꓝꓲ ꓠꓲꓹ ꓫꓵ ꓡꓳ=ꓠꓬꓲꓸ ꓠꓬꓲ ꓟꓶ ꓦ ꓬꓯꓼ ꓔꓬ ꓡꓳ= ꓑ ꓫꓬ ꓐꓴ ꓠꓲꓹ ꓠꓻ ꓟꓬ ꓠꓻ ꓟ ꓟꓬ ꓐꓲ ꓬꓲꓸ ꓛꓲ ꓟꓴ ꓗꓪ ꓡꓰ ꓟꓳꓸ ꓖꓶ ꓔꓬ ꓟ ꓥ ꓡꓳ ꓐꓰ ꓙꓵ ꓡꓳ=