ꓠꓬꓲꓸ ꓠꓬꓲ 8 ꓦ ꓟ 12 ꓠꓬꓲ ꓠꓬ꓾ ꓗꓠꓴ ꓧꓳꓽ ꓪꓴꓸ ꓟꓴ ꓢꓴ ꓢꓳꓸ-ꓐꓼ-ꓳꓸ-ꓙꓰꓸ (Saw Ba U Gyi) ꓗ-ꓣꓲ ꓞꓳ ꓫꓵꓽ ꓐꓴ ꓐꓱ ꓶ ꓢꓯꓼ ꓟꓬ ꓔꓲꓺ ꓖꓶ ꓗꓷ ꓟ ꓦꓬꓼ ꓠꓬꓲ ꓥ ꓡꓳ= ꓕꓱ ꓕꓲ ꓠꓬꓲ ꓔꓯ “ꓗ-ꓣꓲ ꓞꓳ ꓫꓵꓽ ꓐꓴ ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷ ꓢꓴ ꓦꓬꓼ ꓠꓬꓲ (Karen Martyrs’ Day)” ꓚꓲꓸ ꓟꓶ ꓓꓴ ꓬꓰ ꓔꓬ ꓟ ꓞꓲ ꓠꓲꓹ ꓠꓬ 71 ꓘꓳꓼ ꓗꓪ ꓛꓲꓳ=
ꓢꓳꓸ-ꓐꓼ-ꓳꓸ-ꓙꓰꓸ ꓔꓯ 1903 ꓘꓳꓼ ꓕꓯ ꓑ-ꓔꓲ ꓡꓳ ꓒꓱ ꓗꓪ ꓦꓵ ꓡ ꓡꓳ= ꓬꓲꓸ ꓐꓹ ꓐ ꓟꓹ ꓟ ꓐꓴ ꓠꓬ ꓑꓶꓸ ꓫꓴꓸ ꓟꓲꓺ ꓡꓳ ꓑ ꓓꓽ ꓟ ꓥ ꓡꓳ= ꓬꓲꓸ ꓠꓬ 1927 ꓘꓳꓼ ꓕꓯ ꓰ-ꓖꓶ-ꓡ ꓢꓷꓸ ꓠꓲꓹ ꓟꓴ ꓕꓲꓸ ꓙꓳꓥꓽ ꓗ-ꓐꓶ-ꓬꓲ-ꓛꓰ (Cambridge University) ꓗꓪ ꓐꓰ ꓙꓵꓽ ꓪꓴꓸ ꓛꓴꓽ ꓟꓶ ꓢꓲ꓾ ꓐꓯ ꓟꓴ ꓒꓽ ꓕꓲ ꓣꓳ ꓒꓬꓱꓼ ꓡ ꓡꓳ= 1937-39 ꓗꓪ ꓖꓳ ꓕꓯ ꓟ ꓐꓶ-ꓔꓲ-ꓫ ꓟꓬ-ꓟ ꓗꓴꓷꓼ ꓐꓱ ꓶ ꓝꓲꓸ ꓒꓴ ꓫꓺ ꓢꓴ ꓢꓲꓽ ꓒ ꓓꓽ ꓟ ꓬꓰ ꓗꓷꓳ= ꓝꓮꓲ 1947 ꓘꓳꓼ ꓗꓪ ꓥ ꓟꓲ ꓗꓴꓷꓼ ꓙꓵꓽ ꓜꓴ ꓗꓪ ꓟꓬꓱꓽ ꓬꓰ ꓡꓳ= ꓬꓲꓸ ꓠꓬ ꓖꓳ ꓕꓯ ꓦꓬꓼ ꓠꓬꓲ ꓗꓪ ꓟ ꓔꓱꓹ ꓟ ꓔꓯ ꓠꓲꓹ ꓠꓵ ꓢꓴ꓾ ꓠꓬꓲꓸ ꓤꓲ ꓢꓴ ꓔꓯ ꓠꓲꓹ ꓜꓳ ꓢꓴ꓾ ꓢꓷꓸ ꓠꓲꓹ ꓙꓳ ꓒꓽ꓾ ꓒꓴ ꓫꓵꓺ ꓙꓳ ꓒꓽ ꓥ ꓡꓳ=
ꓗ-ꓣꓲ ꓞꓳ ꓫꓵꓽ ꓐꓴ ꓐꓱ ꓶ ꓟꓶ ꓙꓲꓽ ꓙꓳˍ ꓟ ꓶꓽ ꓮ ꓙꓵꓽ ꓟꓶ ꓠꓹ ꓟ ꓢꓯꓼ ꓕꓵꓼ ꓓꓴ ꓐꓯ ꓢꓲ꓾ ꓗꓠꓴ- Karen National Union ꓔꓯ 1947 ꓘꓳꓼ 2 ꓦ 5 ꓠꓬꓲ ꓕꓯ ꓔꓶ ꓪꓴꓸ ꓔꓴ ꓡꓳ= ꓗꓠꓴ ꓜꓴ ꓬꓲꓸ ꓪꓴꓸ ꓕꓲ ꓣꓳ ꓟ ꓢꓽ ꓡ ꓙꓵꓽ ꓢꓴ ꓠꓬ ꓢꓳꓸ-ꓐꓼ-ꓳꓸ-ꓙꓰꓸ ꓥ ꓡꓳ= ꓗꓴꓷꓼ ꓫꓵꓽ ꓪꓴ ꓖꓪ ꓙꓱ ꓡꓯ ꓘꓳ ꓚꓱꓹ ꓗꓪ ꓐꓰ ꓗ-ꓣꓲ ꓞꓳ ꓫꓵꓽ ꓐꓴ ꓐꓱ ꓶ ꓮ ꓫꓵꓽ ꓡꓲꓸ ꓖꓶꓽ ꓟꓽ ꓫꓳ ꓟ ꓔꓯ ꓡꓳꓸ ꓟꓳ ꓡ ꓟ ꓑꓶꓸ ꓓꓴ꓾ ꓟꓯꓼ ꓓꓳ ꓠꓹ ꓟ ꓢꓯꓼ ꓕꓵꓼ ꓡ ꓡꓳ= ꓬꓲꓸ ꓡꓰ ꓗ-ꓣꓲ ꓞꓳ ꓫꓵꓽ ꓐꓴ ꓣꓴ ꓕꓶ ꓦꓰꓼ ꓔꓸ ꓠꓯˍ ꓟ (4) ꓕꓳꓼ ꓐꓯ ꓓꓳ ꓡ ꓡꓳ= ꓖꓳ ꓟ ꓠꓬ꓾
- ꓮ ꓕꓯ ꓟꓲ ꓟꓽ ꓠꓽ꓾ ꓟꓽ ꓩꓴꓺ ꓗꓷ= (Surrender is out of the question)
- ꓗ-ꓣꓲ ꓗꓴꓷꓼ ꓓꓳ ꓡ ꓠ ꓔ ꓥ= (The recognition of the Karen country must be completed)
- ꓣꓳ ꓟꓯꓼ ꓶꓽ ꓔꓯ ꓣꓴ ꓔꓸ ꓓꓴ ꓥꓳ= We shall retain our arms.
- ꓣꓳ ꓗꓴꓷꓼ ꓣꓳ ꓙꓰ ꓚꓱꓹ ꓔꓯ ꓣꓳ ꓠꓰ ꓐꓯ ꓞꓷꓹ ꓓꓴ ꓥꓳ= (We shall decide our own political destiny.)
ꓬꓲꓸ ꓓꓵꓽ ꓙ ꓚꓱꓹ ꓐꓰ ꓧꓳꓽ ꓣꓱꓽ ꓚꓱꓹ ꓮ ꓙꓵꓽ ꓗ-ꓣꓲ ꓞꓳ ꓫꓵꓽ ꓐꓴ ꓢꓷꓸ ꓪꓽ ꓡꓰ ꓠꓹ ꓟ ꓐꓱ ꓶ꓾ ꓗ-ꓣꓲ ꓞꓳ ꓫꓵꓽ ꓐꓴ ꓔꓯ ꓖꓪ ꓙꓱ ꓠꓬꓲ ꓕꓲ ꓟꓵꓽ ꓕꓲ ꓟꓵ ꓗꓪ ꓙꓰ ꓚꓳˍ ꓔꓬ ꓟ ꓙ ꓖꓴ ꓕꓲ ꓔꓳꓸ ꓗꓪ ꓖꓳ ꓕꓯ ꓟ ꓟꓬ-ꓟ ꓟꓯꓼ ꓐꓴ ꓡꓰ ꓗꓽ ꓚꓳꓸ ꓢꓲꓸ ꓢꓰꓼ ꓗꓷ ꓡ ꓡꓳ= ꓟꓳ-ꓡꓲ-ꓟꓲꓮꓲ ꓡꓳ ꓒꓱ ꓒ ꓕꓲ ꓗꓪ ꓟ ꓘꓹ ꓤꓽ ꓕꓲ ꓟ ꓗꓪ ꓥ ꓡꓳ= ꓛꓴꓽ ꓙꓳ ꓢꓴ ꓐꓴ ꓡꓰ꓾ ꓬꓲꓸ ꓫꓵꓻ ꓟꓳ꓾ ꓬꓲꓸ ꓡꓱꓽ ꓜꓳ ꓥ ꓟꓲ ꓟꓽ ꓙꓳ ꓡꓰ ꓠꓹ ꓟ ꓫꓵꓻ ꓟꓳ ꓔꓯ ꓬꓲꓸ ꓔꓯ ꓢꓰꓼ ꓗꓷ ꓖꓴ ꓗꓪ ꓐꓰ ꓟꓲꓺ 4 ꓕꓶꓹ ꓗꓪ ꓛꓲ ꓔꓯꓹ ꓖꓳꓻ ꓡ ꓢꓲ꓾ ꓬꓲ ꓡꓴꓽ ꓐꓱ ꓗꓪ ꓡꓳꓺ ꓩꓴ ꓗꓷ ꓡꓳ= ꓖꓳ ꓕꓲ ꓠꓬꓲ ꓠꓬ 1950 ꓘꓳꓼ 8 ꓦ 12 ꓠꓬꓲ ꓥ ꓡꓳ= ꓗ-ꓣꓲ ꓞꓳ ꓫꓵꓽ ꓐꓴ ꓠꓲꓹ ꓠꓻ ꓟꓬ ꓠꓻ ꓟ ꓦꓬꓼ ꓠꓬꓲ ꓥꓳ=
ꓟꓬ-ꓟ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓕꓲ ꓝꓸ ꓡꓲꓸ ꓕꓲ ꓝꓸ ꓠꓬ ꓗ-ꓣꓲ ꓐꓴ ꓐꓱ ꓶ ꓘꓳ ꓣꓴ ꓓ ꓗꓪ ꓛꓲ꓾ ꓙꓵꓽ ꓪ ꓐꓱꓻ ꓖꓶ ꓟ ꓐꓰ꓾ ꓔꓱꓹ ꓔꓱꓹ ꓜꓳ ꓜꓳ ꓙ ꓡꓯ ꓘꓳ ꓟ ꓟꓽ ꓬꓰ ꓖꓶ ꓡ ꓟ ꓐꓯ ꓢꓲ꓾ ꓠꓬꓲꓸ ꓠꓬꓲ ꓗꓪ ꓛꓲ ꓠꓲꓹ ꓘꓪ ꓟꓽ ꓫꓵ ꓢꓰꓼ ꓡꓯ ꓘꓳ ꓔꓬ ꓟ ꓥ ꓡꓳ=
ꓔꓱꓹ ꓔꓱꓹ ꓟꓬꓱꓽ ꓬꓰ ꓠꓲꓹ ꓫꓵ ꓢꓴ꓾ ꓠꓬꓲꓸ ꓤꓲ ꓟ ꓔꓯ ꓟꓽ ꓠꓵ ꓢꓴ꓾ ꓫꓵꓽ ꓐꓱ ꓶ ꓟꓶ ꓙꓲꓽ ꓙꓳ ꓟ ꓶꓽ ꓔꓯ ꓑꓶꓸ ꓑꓶꓸ ꓓꓰꓽ ꓢꓴ꓾ ꓠꓬꓲꓸ ꓤꓲ ꓢꓴ ꓔꓯ ꓔꓳꓹ ꓡꓯ ꓘꓳ ꓢꓴ ꓥ ꓠꓬꓲ꓾ ꓬꓲꓸ ꓟꓶ ꓗꓪ ꓢꓯꓼ ꓟꓬ ꓖꓶꓽ ꓗꓷ ꓗꓪ ꓛꓲ ꓢꓯꓼ ꓕꓵꓼ ꓗꓷ ꓢꓴ ꓢꓳꓸ-ꓐꓼ-ꓳꓸ-ꓙꓰꓸ ꓔꓯ ꓗ-ꓣꓲ ꓐꓴ ꓮ ꓟꓶ ꓗꓪ ꓛꓲ ꓮ ꓘꓶꓸ ꓒꓵꓽ ꓔꓬ ꓡꓳ=