ꓮ-ꓢ ꓟꓵꓽ꓾ ꓚꓮꓲꓹ-ꓔꓮꓳꓹ ꓡꓳ ꓒꓱ꓾ ꓬꓹ-ꓗꓪꓯꓼ (4) ꓗꓪ ꓟ ꓡꓲ-ꓢꓴ ꓐꓴ ꓔꓯ ꓢꓢꓢ ꓐꓲ ꓓꓴ ꓢꓰꓸ ꓟꓯꓼ ꓜꓲꓽ ꓫꓸ ꓪ ꓔꓯ ꓒꓳꓹ ꓢꓲ꓾ ꓕꓲ ꓦꓲ ꓗꓪ ꓤꓽ ꓕꓲ ꓣꓳˍ ꓡꓰꓽ ꓔꓬ ꓥ ꓟꓲ ꓟꓽ ꓓ ꓟꓽ ꓢ ꓟꓯꓼ ꓗꓶ ꓝꓲ ꓔꓬ ꓡꓳ ꓐꓰ 2022 ꓘꓳꓼ 8 ꓦ 26 ꓠꓬꓲ ꓕꓯꓽ ꓓꓳꓽ ꓜꓳ ꓛꓲ ꓡ ꓡꓳ꓿
“ꓠꓴ ꓪ ꓔꓯ ꓚꓳꓹ ꓔꓸꓳ ꓫꓵꓽ ꓟꓽ ꓥꓻ꓾ ꓐꓲ ꓓꓴ ꓢꓰꓸ ꓟꓯꓼ ꓟꓽ ꓬꓰ ꓟꓽ ꓓ ꓐꓰ ꓞꓳ ꓘꓹ ꓢꓴ ꓐꓴ ꓔꓯ ꓘꓴ ꓜꓲꓼ ꓔꓸ ꓢꓲꓸ ꓐꓯ ꓡ ꓡꓳ꓿ ꓘꓹ ꓗꓪ ꓐꓰ ꓧꓶꓸ ꓕꓯꓽ ꓥ ꓟꓲ ꓟꓯꓼ ꓬꓰ ꓢꓴ 30 ꓣꓳ ꓖꓶꓽ ꓔꓸ ꓡꓳ꓿ ꓮ ꓟꓶ ꓥ ꓟꓲ 42 ꓣꓳ ꓖꓶꓽ ꓡꓯ ꓐꓰ ꓓꓰꓽ ꓡ ꓔꓬ ꓡꓳ꓿ ꓕꓲꓽ ꓦꓲ ꓗꓪ ꓤ ꓠꓱ ꓐꓴ ꓔꓯ ꓡꓳꓸ ꓙ ꓠꓬꓲ ꓙ ꓢꓴ ꓤꓽ ꓑꓸ ꓤꓼ ꓕꓲꓽ ꓣꓳˍ ꓡꓰꓽ ꓙꓳˍ ꓟ ꓖꓶ ꓮ ꓙꓵꓽ ꓟꓯꓼ ꓬꓰ ꓝꓲ ꓓꓴ ꓐꓯ ꓡˍ ꓠꓬꓲ꓾ ꓤ ꓠꓱ ꓐꓴ ꓔꓯ ꓮ ꓡꓰ ꓟꓽ ꓛꓹ ꓒꓰꓳꓹꓳ꓿ ꓑꓳꓺ ꓔꓯꓹ ꓒꓽ ꓮ ꓡꓲ ꓕꓲ ꓜꓴ ꓥ ꓟꓲ ꓕꓱ ꓟꓬ ꓛꓲ ꓫꓸ ꓓꓴ ꓟꓽ ꓬꓰ ꓖꓶꓽ ꓡ ꓠꓬꓲ ꓢꓰꓽ꓿ ꓢ ꓖꓶ ꓠꓯꓸꓼ 8 ꓙꓵꓹ ꓗꓪ ꓡ ꓞꓳ ꓘꓴ ꓜꓲꓼ ꓢꓲꓸ ꓟꓯꓼ 42 ꓣꓳ ꓟꓽ ꓪ ꓟꓽ ꓢ ꓝꓲꓸ ꓓꓴ ꓥꓳ ꓐꓯ ꓡꓻꓳ꓿ ꓦꓲ ꓗꓪ ꓤꓽ ꓑꓸ ꓤꓼ ꓕꓲ ꓣꓳˍ ꓡꓰꓽ ꓙꓳˍ ꓠꓬ ꓟꓯꓼ ꓟꓽ ꓣꓴ꓾ ꓟꓯꓼ ꓟꓽ ꓬꓰ ꓝꓲ ꓐꓯˍ ꓟ ꓢꓢꓢ ꓧꓳꓽ ꓢꓴ ꓟꓽ-ꓦ-ꓙ ꓐꓯ ꓘꓶꓽ ꓔꓯ ꓒꓳꓹ ꓔꓳꓹ ꓢꓲꓸ ꓡꓲ-ꓢꓴ ꓞꓳ ꓘꓹ ꓗꓪ ꓕꓱ ꓡꓱ ꓟꓽ ꓓ ꓟꓽ ꓢ ꓬꓰ ꓡ ꓔꓬꓳ” ꓐꓰ ꓞꓳ ꓘꓹ ꓢꓴ ꓕꓲ ꓣꓳ ꓡꓰꓽ ꓐꓯ ꓡꓳ꓿
ꓖꓳ ꓕꓲ ꓟꓵꓽ ꓗꓪ ꓢꓢꓢ ꓐꓲ ꓓꓴ ꓢꓰꓸ ꓟꓯꓼ ꓔꓯ ꓟ-ꓦ-ꓙ ꓡꓰꓽ ꓧꓳꓽ ꓪꓴꓸ ꓟꓴ ꓔꓬ ꓟ ꓥ ꓡꓳ꓿
ꓬꓼ-ꓗꓪꓯꓼ (4) ꓗꓪ ꓟ ꓡꓲ-ꓢꓴ ꓐꓴ ꓦꓲ ꓘꓴ 120 ꓦꓲ ꓛꓲ ꓙꓳ ꓢꓲ꓾ ꓤ ꓠꓱ ꓐꓴ ꓔꓯ ꓛꓹ ꓒꓰꓹ ꓢꓲꓸ ꓟꓯꓼ ꓬꓰ ꓙꓰ ꓠ ꓗꓷ ꓡ ꓔꓬ ꓠꓬꓲ ꓮ ꓘꓶꓸ ꓔꓬ ꓫꓸ ꓙꓳ ꓫꓸ ꓔꓬ ꓡꓳ꓿ ꓢꓢꓢ ꓧꓳꓽ ꓢꓴ ꓟ-ꓦ-ꓙ ꓔꓯ ꓫꓸ ꓕꓱ ꓠꓲꓹ ꓫꓵˍ ꓟꓲ ꓞꓳ ꓘꓹ ꓢꓴ ꓠꓬ ꓜꓲ ꓪ ꓟꓽ ꓓ ꓐꓯˍ ꓡꓳ꓿