1ꓸ ꓠꓶꓽ ꓝꓸ ꓧꓪꓹ ꓝꓸ ꓠꓹ ꓟ ꓥꓳ= ꓚꓲꓸ ꓛꓬꓼ ꓟꓬꓱꓺ꓾ ꓬꓲꓸ ꓘꓳꓼ꓾ ꓦꓵꓸꓹ ꓖ꓾ ꓕꓲ ꓦꓲ ꓡ ꓞꓳ ꓾ ꓮ ꓟꓶ ꓮ ꓗꓪ ꓔꓬ ꓟ ꓔꓯ ꓐꓯ ꓟꓸ ꓖꓶ ꓡꓯ=
A ꓙꓵꓽ ꓢꓴ ꓧꓪꓸ ꓧꓪꓸ= ꓥꓪ ꓟꓬꓱꓺ ꓠꓬ ꓟꓸ ꓒꓽ ꓐꓬꓽ ꓬꓳ-ꓢꓷ ꓥꓻˍ ꓡꓳ= ꓥꓪ ꓞꓲꓼ ꓠꓬ 39 ꓘꓳꓼ ꓙꓳꓻˍ ꓡꓳ= ꓖꓶꓽ-ꓟꓶꓽ-ꓓꓲ ꓡꓳꓺ ꓒꓱꓻ ꓗꓪ ꓦꓵꓻ ꓔ ꓡꓳ= ꓥꓪ ꓦꓲꓻ ꓢꓲꓺ ꓟ ꓠꓬ ꓟꓸ ꓟꓺ ꓠꓳ-ꓢ-ꓠ ꓥꓳ= ꓮ ꓐꓲꓻ ꓮ ꓟꓲꓽ 4 ꓫꓵꓸ ꓙꓳꓻˍ ꓡꓳ= ꓮ ꓟꓶ ꓥꓪ ꓠꓴꓽ ꓕꓲꓽ ꓦꓲꓻ ꓢꓴ ꓠꓬ ꓚꓮꓠꓮꓓꓮ ꓟꓵꓽ꓾ ꓚꓳꓣꓠꓪꓮꓡꓡ ꓡꓳꓺ ꓒꓱꓻ ꓗꓪ ꓔꓬ ꓡꓳ=
2ꓸ ꓡꓲ-ꓢꓴ ꓫꓵꓽ ꓐꓴ ꓐꓱ ꓶꓽ ꓟꓬꓱꓽ ꓣꓱ ꓬꓰ ꓗꓷˍ ꓟ ꓐꓰ ꓘꓴ-ꓜꓲ-ꓞꓳ ꓗꓪ ꓟꓬꓱꓽ ꓣꓱꓽ ꓙ ꓗꓳꓸ ꓡ ꓟ ꓔꓯ ꓐꓯ ꓟꓸ ꓖꓶ ꓡꓯ=
ꓣꓳꓽ ꓡꓲ-ꓢꓴ ꓫꓵꓽ ꓐꓴ ꓐꓱ ꓶꓽ ꓟꓬꓱꓽ ꓬꓰ ꓢꓯꓼ ꓕꓵꓼ ꓪꓴꓸ ꓔꓴꓺ ꓗꓷ ꓟ ꓠꓬ ꓟꓶꓽ-ꓡꓯꓹ-ꓫ (ꓟꓮꓡꓮꓬꓢꓲꓮ) ꓗꓪ ꓐꓰ ꓐꓯꓺ ꓓꓻˍ ꓥꓳ= ꓥꓪ ꓠꓬ 2007 ꓘꓳꓼ 7 ꓦꓻ ꓕꓯꓽ ꓟꓶꓽ-ꓡꓯꓹ-ꓫ ꓗꓪ ꓛꓲ ꓬꓰꓳ= ꓖꓳ ꓕꓯꓽ ꓥꓪ ꓟꓲꓸ ꓙꓬꓽ ꓢꓲ ꓗꓪ ꓛꓲ ꓔꓬ ꓢꓴ ꓣꓳꓽ ꓡꓲ-ꓢꓴ ꓧꓳꓽ ꓪꓴꓸ ꓟꓴꓺ ꓢꓴ ꓟꓸ ꓒꓽ ꓮ-ꓓꓶꓸ-ꓖꓪꓽ ꓐꓰ ꓠꓱꓸ ꓐꓯꓼ ꓠꓲꓹ ꓡꓱꓻ ꓢꓴ ꓐꓴˍ ꓐꓰ ꓟꓶꓽ-ꓡꓯꓹ-ꓫ ꓡꓲ-ꓢꓴ ꓜꓴꓻ ( ꓡꓲ-ꓢꓴ ꓟꓬ-ꓡꓴ) ꓔꓯ ꓔꓶꓺ ꓪꓴꓸ ꓔꓴꓺ ꓗꓷꓳ= ꓥꓪ ꓠꓬ ꓡꓲ-ꓢꓴ ꓫꓵꓽ ꓜꓴꓻ ꓦꓲꓻ ꓗꓪ ꓔꓬ ꓢꓲ ꓫꓵꓽ ꓟꓬꓱꓽˍ ꓐꓰ ꓡꓲ-ꓢꓴ ꓘꓴ-ꓜꓲ-ꓞꓳ( ꓟꓮꓡꓮꓬꓢꓲꓮ ꓡꓲ-ꓢꓴ ꓚꓧꓣꓲꓢꓔꓲꓮꓠ ꓚꓧꓴꓣꓚꓧ) ꓔꓯ ꓧꓳꓽ ꓪꓴꓸ ꓟꓴꓺ ꓗꓷꓳ=ꓟꓶ-ꓡꓯ-ꓫ ꓗꓪ ꓛꓲ ꓡꓻˍ ꓟ ꓣꓳꓽ ꓡꓲ-ꓢꓴ ꓫꓵꓽ ꓐꓴ ꓔꓯ “ꓴꓠ” ꓚꓱꓹ ꓗꓪ ꓙꓲꓻ ꓙꓲꓻ ꓜꓳꓽ ꓜꓳꓽˍ ꓐꓰ ꓓꓵꓽ ꓟꓶꓻ ꓡꓰ ꓢꓲꓸ ꓢꓺ ꓗꓴꓷꓽ ꓗꓪ ꓙꓰ ꓪ ꓠꓹˍ ꓟ ꓢꓯꓼ ꓕꓵꓼ ꓙ ꓗꓷꓳ=
ꓟꓶ-ꓡꓯꓹ-ꓫ ꓗꓪ ꓟ ꓗꓮꓚꓧꓲꓠ ꓣꓰꓝꓴꓖꓰꓰ ꓜꓴꓻ ꓗꓪ ꓥꓻˍ ꓟꓲ ꓝꓸ ꓡꓯꓽ ꓘꓳˍ ꓟˍ ꓐꓰ ꓮꓓꓦꓲꓢꓰꓣ(ꓚꓴꓽ ꓬꓲꓹ ꓖꓶꓽ ꓢꓴ) ꓮꓽ ꓟꓬꓹ ꓘꓳꓼ ꓬꓰ ꓗꓷ ꓢꓲꓸ ꓡꓲ-ꓢꓴ ꓫꓵꓽ ꓐꓴ “ꓴꓠ” ꓚꓱꓹ ꓗꓪ ꓟꓶꓻ ꓙꓰꓽ ꓙꓳꓻˍ ꓟ (ꓣꓲꓖꓧꓔ) ꓟꓶꓻ ꓡꓰ ꓠꓹ ꓟ ꓢꓯꓼ ꓕꓵꓼ ꓗꓷꓳ= ꓖꓳ ꓟˍ ꓡꓰꓽ ꓟꓽ ꓞꓲ ꓟꓶ-ꓡꓯꓹ-ꓫ ꓗꓮꓚꓧꓲꓠ ꓣꓰꓝꓴꓖꓰꓰ ꓜꓴꓻ ꓗꓪ ꓡꓲ-ꓢꓴ ꓧꓳꓽ ꓪꓴꓸ ꓟꓴꓺ ꓢꓴ ꓬꓲꓸ ꓝꓸ ꓟꓶꓽ ꓠꓬꓲꓽ ꓔꓬ ꓪ ꓠꓹ ꓟ ꓢꓯꓼ ꓕꓵꓼ ꓗꓷꓳ=ꓝꓮꓲ꓾ ꓟꓶꓽ-ꓡꓯꓹ-ꓫ “ꓴꓧꓚꓧꓣ” ꓣꓳꓥꓸ ꓦꓲꓻ ꓗꓪ ꓥˍ ꓟꓲ ꓣꓳꓽ ꓡꓲ-ꓢꓴ ꓥꓳꓽ ꓝꓸ ꓢꓴ 3 ꓣꓳ ꓧꓪꓺ ꓙ ꓗꓷꓳ= “ꓴꓠ” ꓗꓪ ꓐꓰ ꓟꓬꓱꓺ ꓐꓳꓺ ꓖꓶꓽ ꓡꓻˍ ꓕꓯꓽ ꓣꓳꓽ ꓡꓲ-ꓢꓴ ꓫꓵꓽ ꓐꓴ ꓔꓯ ꓥꓳꓽ ꓝꓸ ꓖꓶꓽ꓾ ꓡꓶꓸ ꓖꓶꓽˍ ꓟ ꓮꓽ ꓟꓬꓹ ꓬꓰ ꓗꓷꓳ=ꓟꓶ-ꓡꓯ-ꓫ ꓗꓪ ꓟ ‘ꓠꓖꓳ’ ꓐꓰ ꓘꓴ-ꓜ-ꓞꓳ ꓐꓴ ꓔꓯ ꓝꓸ ꓡꓯꓼ ꓘꓳ ꓢꓲꓸ ꓣꓳꓽ ꓫꓵꓽ ꓐꓱ ꓶꓽ ꓙꓲꓻ ꓖꓴ ꓮꓽ ꓟꓬꓹ ꓬꓰ ꓪ ꓡꓰꓳ=ꓡꓲ-ꓢꓴ ꓕꓳꓽ ꓶꓽ ꓥˍ ꓟꓲ ꓟꓸ ꓖꓶꓽ ꓗꓷꓳ=ꓠꓻ ꓒꓬꓽ ꓢꓴˍ ꓐꓰ ꓤꓽ ꓠꓱꓺ ꓶꓻ ꓞꓹˍ ꓟ ꓟꓹ ꓟꓺ ꓐꓴ ꓔꓯ ꓠꓯꓺ ꓞꓲꓼ ꓦꓲꓻ ꓗꓪ ꓧꓳꓽ ꓙꓰˍ ꓟ ꓐꓰ ꓥꓳꓽ ꓝꓸ ꓖꓶꓽˍ ꓟ ꓮꓽ ꓟꓬꓹ ꓬꓰ ꓗꓷꓳ= ꓖꓳ ꓡꓱ ꓠꓬꓲ ꓠꓯꓺ ꓞꓲꓼ ꓟꓸ ꓟꓺ(ꓠꓴꓣꓢꓰ) ꓐꓴ ꓡꓰ “ꓠꓴ ꓦꓲꓻ ꓢꓲꓺ ꓟ ꓮꓺ ꓟꓬꓺ ꓣꓳ ꓙꓳꓻˍ ꓡꓽ? ꓠꓴ ꓠꓬ ꓲꓠꓔꓰꓣ ꓠꓮꓔꓲꓳꓠꓮꓡ ꓧꓴꓢꓐꓮꓠꓓ ꓔꓲꓸ ꓥꓻ ꓐꓶ” ꓐꓰ ꓐꓯꓺ ꓖꓶꓽ ꓡꓻ ꓟˍ ꓟꓲ ꓔꓳꓹ ꓜꓳꓽ ꓠꓬꓲꓳ=ꓟꓶ-ꓡꓯ-ꓫ ꓡꓲ-ꓢꓴ ꓘꓴ-ꓜꓲ-ꓞꓳ ꓗꓪ ꓠꓬ ꓪꓴꓸ ꓔꓴꓺ ꓕꓲꓽ ꓠꓬꓲ ꓗꓪ ꓐꓰ ꓚꓮꓠꓮꓓꓮ ꓟꓵꓽ ꓗꓪ ꓓꓳꓺ ꓡꓹ ꓕꓲꓽ ꓠꓬꓲ ꓗꓪ ꓛꓲ ꓘꓴ-ꓜꓲ-ꓞꓳ ꓟꓸ ꓒꓽ(ꓮꓽ ꓡꓻ 9 ꓘꓳꓼ ꓛꓲ) ꓣꓱꓽ ꓗꓷꓳ= ꓖꓳ ꓕꓯꓽ ꓖꓳꓻ ꓓꓱꓽ ꓔꓲꓹ ꓖꓶꓼ ꓗꓷ ꓢꓴ 96 ꓣꓳ ꓐꓰ ꓡꓯꓼ ꓒꓯꓹ ꓝꓸ ꓖꓶꓽˍ ꓟ ꓐꓰ ꓦꓲꓻ ꓕꓴꓽ ꓪꓼ ꓘꓴ ꓜꓲꓼ ꓓꓴ ꓬꓰ ꓖꓶꓽ ꓗꓷ ꓟ 107 ꓜꓱꓻ ꓙꓳꓻ ꓡꓰꓳ=
3ꓸ ꓚꓮꓠꓮꓓꓮ ꓗꓪ ꓛꓲ ꓬꓰ ꓕꓯ ꓔꓳꓹ ꓜꓳꓽ ꓗꓷˍ ꓟ ꓬꓰ ꓫ ꓓꓴ ꓬꓲꓸ ꓫꓵꓽ ꓬꓲꓸ ꓙꓰꓽ= ꓚꓴꓡꓔꓴꓣꓰ ꓢꓧꓳꓚꓗ ꓐꓰ꓾ ꓮ ꓟꓶ ꓮ ꓫꓵꓽ ꓟꓬꓱꓽ ꓬꓰ ꓔꓬ ꓟ ꓔꓯꓸ ꓐꓯ ꓟꓸ ꓖꓶ ꓡꓯ=
ꓥꓪꓻ ꓠꓴꓽ ꓕꓲꓽ ꓦꓲꓻ ꓚꓮꓠꓮꓓꓮ ꓟꓵꓽ ꓗꓪ ꓛꓲ ꓬꓰˍ ꓟ ꓠꓬ 2016 ꓘꓳꓼ 5 ꓦꓻ 26 ꓠꓬꓲ ꓕꓯꓽ ꓥˍ ꓡꓳ= ꓬꓲꓸ ꓛꓲ ꓬꓰ ꓕꓯ ꓬꓰ ꓫꓸ ꓓꓴ ꓬꓲꓸ ꓓꓽ ꓟ ꓠꓬ꓾ ꓦꓬꓼ ꓑꓺ ꓡꓰ ꓠꓬꓲ ꓢꓺ ꓘꓪꓺ ꓕꓯꓽ ꓟꓽ ꓬꓲꓼ ꓟꓶ ꓡ ꓟˍ ꓐꓰ ꓟꓳꓼ ꓡꓳꓺ ꓕꓯꓽ ꓬꓲꓼ ꓟꓶꓻ ꓕꓳꓹ ꓔꓬ ꓟ ꓥꓳ= ꓕꓱ ꓟ ꓕꓲꓽ ꓫꓵꓽ ꓠꓽ ꓛꓲ ꓔꓳꓹ ꓜꓳꓽ ꓗꓷꓳ= ꓪꓴ-ꓢ ꓬꓰ ꓙ ꓠꓬꓲ ꓫꓸ ꓓꓴ ꓬꓲꓸ ꓓꓼ ꓟ ꓠꓬ ꓟꓽ ꓔꓳꓹ ꓜꓳꓽ= ꓡꓲꓽ ꓒꓰꓼ ꓟꓽ ꓪꓽ ꓡꓯ ꓘꓳˍ ꓟ ꓠꓬ ꓮ ꓟꓬꓹ ꓙꓳꓻˍ ꓡꓳ= ꓖꓳ ꓡꓱ ꓥˍ ꓟꓲ ꓮꓸ ꓫꓵꓽ ꓗꓪ ꓥˍ ꓟꓲ ꓬꓲꓸ ꓡꓲꓽ ꓙꓳꓻ ꓙꓳꓻˍ ꓡꓰꓽ ꓔꓬꓹ ꓠꓹ ꓟ ꓠꓬ ꓮꓽ ꓟꓬꓹ ꓢꓳꓺ ꓣꓴ ꓠꓺ ꓗꓷ ꓡꓰꓳ=ꓚꓮꓠꓮꓓꓮ ꓗꓪ ꓛꓲ ꓬꓰ ꓗꓸ ꓠꓯꓸ ꓬꓲꓸ ꓪꓴꓸ ꓕꓲꓽ ꓘꓳꓼ ꓗꓪ ꓠꓬ ꓢꓲꓽ ꓒꓽ ꓐꓴˍ ꓐꓰ ꓘꓴ-ꓜꓲ-ꓞꓳ ꓗꓪ ꓐꓰ ꓔꓳꓹ ꓙ ꓬꓰ ꓙ ꓡ ꓠꓬꓲ ꓟꓬꓱꓽ ꓟꓽ ꓬꓰ꓾ ꓕꓳꓽ ꓶꓽ ꓢꓳꓺ ꓢꓲ ꓬꓲꓸ ꓡꓲꓽ ꓬꓲꓸ ꓒꓰꓼ ꓢꓳꓺ ꓣꓴ ꓘꓷꓳ= ꓮ ꓟꓶ ꓠꓬ ꓪꓮꓡꓟꓮꓣꓔ ꓪꓮꓣꓰꓧꓳꓴꓢꓰ ꓗꓪ ꓟꓬꓱꓽ ꓣꓱꓽ ꓔꓬ ꓢꓲ꓾ ꓕꓲꓽ ꓖ ꓕꓲꓽ ꓧꓪꓹ ꓪꓴ-ꓢ ꓐꓯꓺ ꓘꓶꓽ ꓚꓺ ꓔꓬ ꓡꓳ=
4ꓸ ꓚꓮꓠꓮꓓꓮ ꓗꓪ ꓠꓬ ꓡ ꓞꓳ ꓮ ꓙꓵꓽ ꓮ ꓘꓶꓹ ꓡ ꓠꓲꓹ ꓫꓵˍ ꓟ ꓥꓳ= ꓚꓮꓠꓮꓓꓮ ꓗꓪ ꓠꓴ ꓮ ꓫꓵ ꓔꓯ ꓪ ꓜꓲ ꓠꓲꓹ ꓫꓵˍ ꓡ? ꓟ ꓠꓲꓹ ꓫꓵ ꓟ ꓮ ꓫꓵꓽ ꓙꓳꓻˍ ꓡ? ꓐꓯ ꓟꓸ ꓖꓶꓽ ꓡꓯ=
ꓚꓮꓠꓮꓓꓮ ꓗꓪ ꓡꓻ ꓠꓲꓹ ꓫꓵ ꓢꓴ ꓮꓽ ꓙꓵꓽ ꓢꓴ ꓔꓯ ꓠꓲꓹ ꓒꓴꓺ ꓒꓴꓺˍ ꓐꓰ ꓘꓴꓻ ꓣꓴꓻ ꓔꓬ ꓥꓳ= ꓮꓽ ꓘꓶꓸ ꓡꓻ ꓝꓲ ꓠꓲꓹ ꓫꓵ ꓔꓬˍ ꓡꓳ= ꓚꓮꓠꓮꓓꓮ ꓠꓬ ꓟꓲ ꓠꓯ ꓗꓪ ꓪꓴꓽ ꓡꓳꓹ ꓬꓰˍ ꓟ ꓠꓬꓲꓽ ꓗꓴꓷꓼ ꓕꓲꓽ ꓗꓴꓷꓼ ꓟ ꓥꓻ ꓢꓲꓸ ꓮꓽ ꓘꓶꓸ ꓢꓲꓺ ꓡꓲꓹˍ ꓟ ꓗꓴꓷꓼ ꓥꓻ= ꓢꓰꓼ ꓡꓯꓽ ꓘꓳˍ ꓟ꓾ ꓑꓳꓺ ꓐꓶꓺ ꓡꓯꓽ ꓘꓳˍ ꓟ ꓟꓽ ꓙꓳꓻ= ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓒꓵꓽ ꓡꓯꓼ ꓘꓳˍ ꓟ ꓗꓴꓷꓼ ꓥꓳ= ꓟꓵꓽ ꓥꓻˍ ꓟꓲ ꓮꓽ ꓘꓶꓽ ꓢꓲꓽ ꓙꓬꓻ ꓢꓲ ꓡꓳꓸ ꓐꓲꓻˍ ꓡꓳ=ꓟꓽ ꓠꓲꓹ ꓫꓵˍ ꓟ ꓠꓬ ꓤꓽ ꓛꓳꓽ ꓤꓽ꓾ ꓤꓽ ꓟꓶꓼ ꓛꓳꓽ ꓤꓽ ꓟꓶꓼ ꓦꓲꓻ ꓕꓴꓽ ꓔꓬꓹ ꓓꓻˍ ꓟ ꓕꓱꓻ ꓟ ꓥꓳ=
5ꓸ ꓚꓮꓠꓮꓓꓮ ꓗꓪ ꓣꓳ ꓡꓲ-ꓢꓴ ꓫꓵꓽ ꓐꓴ ꓮ ꓟꓬ ꓣꓳ ꓔꓬ ꓡ? ꓢꓷꓸ ꓔ ꓠꓬ ꓐꓯ ꓟꓸ ꓖꓶꓽ ꓡꓯ=
ꓚꓮꓠꓮꓓꓮ ꓗꓪ ꓠꓬ ꓣꓳꓽ ꓡꓲ-ꓢꓴ ꓟꓽ ꓟꓬꓽ= 16 ꓣꓳˍ ꓡꓰꓽ ꓔꓬˍ ꓡꓳ=
6ꓸ ꓟꓶ-ꓡꓯ-ꓫ ꓗꓪ ꓔꓬ ꓢꓴ ꓔꓯ ꓮ ꓫꓵꓽ ꓚꓴꓽ ꓬꓲꓼ ꓖꓶ ꓠꓲꓹ ꓫꓵˍ ꓡ?
ꓠꓲꓹ ꓟꓺ ꓫꓵꓺ ꓢꓲ ꓡꓳꓸ ꓔꓬ꓾ ꓠꓲꓹ ꓟ ꓕꓽ ꓙꓬ ꓡꓰ= ꓬꓲꓸ ꓙꓵꓹ ꓚꓲ ꓡ ꓕꓯꓽ ꓪꓴ-ꓢ ꓡꓰꓽ ꓓꓳꓺ ꓙꓰ ꓚꓱꓹ ꓙꓽ ꓖꓶꓽ ꓡꓻˍ ꓥꓳ= ꓟꓶ-ꓡꓯ-ꓫ ꓗꓪ ꓔꓬ ꓕꓯꓽ ꓚꓲꓸ ꓚꓬꓽ ꓫꓵꓽ ꓔꓯ ꓠꓲꓹ ꓥꓳꓺ ꓢꓲꓸ ꓠꓴꓻ ꓥꓪꓻ ꓣꓱꓽ ꓙ ꓡꓯꓽ ꓘꓳ=
7ꓸ ꓟꓬꓮꓠꓟꓮꓣ ꓗꓪ ꓔꓬ ꓟ ꓣꓳ ꓡꓲ-ꓢꓴ ꓫꓵ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓔꓯ ꓠꓴ ꓮ ꓫꓵ ꓬꓰ ꓝꓲ ꓠꓲꓹ ꓫꓵ ꓡ ? ꓢꓯꓼ ꓖꓶꓽ ꓠꓲꓹ ꓫꓵ ꓟ ꓐꓯ ꓖꓶꓽ ꓡꓯ=
ꓡꓲ-ꓢꓴ ꓫꓵꓽ ꓪꓴꓽ ꓟꓴꓺ ꓡ ꓚꓱꓹ ꓗꓪ ꓮꓽ ꓘꓶꓸ ꓢꓯꓼ ꓕꓵꓼ ꓙ ꓔꓬ ꓠꓬꓲ ꓮ ꓘꓶꓸ ꓫꓸ ꓟꓳ= ꓧꓳꓽ ꓢꓴ ꓐꓴ ꓔꓯꓽ ꓓꓰꓽ ꓢꓲ ꓬꓰ ꓙ ꓝꓲ ꓠꓲꓹ ꓫꓵˍ ꓟ ꓠꓬ ꓕꓳꓽ ꓶꓽ ꓔꓯ ꓮꓽ ꓘꓶꓸ ꓫꓬꓹ ꓔꓱꓹ ꓝꓲ ꓠꓲꓹ ꓫꓵˍ ꓡꓳ= ꓡꓲ-ꓢꓴ ꓕꓳꓽ ꓶꓽ ꓟꓸ ꓚꓱꓹˍ ꓐꓰ ꓢꓳꓺ ꓚꓱꓹ ꓗꓪ ꓪ ꓜꓲ ꓢꓯꓼ ꓕꓵꓼ ꓙ ꓝꓲ ꓠꓲꓹ ꓫꓵˍ ꓡꓳ= ꓡꓲ-ꓢꓴ ꓟꓴꓽ ꓖꓪꓽ ꓘꓪꓸ (ꓦꓚꓓꓹꓓꓦꓓ) ꓫꓬꓹ ꓢꓴ ꓔꓯ ꓡꓲ-ꓢꓴ ꓫꓵꓽ ꓜꓴꓻ ꓚꓰꓺ ꓗꓪ ꓐꓰ ꓡꓲ-ꓢꓴ ꓕꓳꓽ ꓶꓽ ꓝꓳꓹ ꓔꓯ ꓫꓬꓹ ꓔꓱꓹ (ꓰꓓꓲꓔ) ꓬꓰ ꓖꓶꓽ ꓝꓲ ꓠꓲꓹ ꓫꓵˍ ꓡꓳ= ꓡꓲ-ꓢꓴ ꓫꓵꓽ ꓔꓯ ꓧꓳꓽ ꓪꓴꓸ ꓟꓴꓺˍ ꓟ ꓗꓪ ꓬꓰ ꓫꓸ ꓓꓴ ꓙꓳꓻ ꓥˍ ꓟꓲ ꓠꓲꓹ ꓟ ꓫꓵꓺ ꓙ ꓓꓴ ꓬꓰ ꓡꓯ= ꓢꓷꓸ ꓠꓲꓹ ꓟꓴꓺ ꓕꓲꓸ ꓗꓪ ꓢꓳꓺ ꓧꓪꓸ ꓡꓰ ꓢꓴ ꓣꓳꓽ ꓫꓵꓽ ꓮꓽ ꓟꓬꓹ ꓓꓳꓺ ꓡ ꓠꓹ ꓟ ꓢꓯꓼ ꓕꓵꓼ ꓙ ꓡꓯ= ꓗꓴꓷꓼ ꓙꓵꓽ ꓢꓴ ꓥˍ ꓟꓲ ꓮꓽ ꓟꓬꓹ ꓓꓳꓺ ꓡ ꓠꓹ ꓟ ꓕꓲꓽ ꓠꓲꓹ ꓕꓲꓽ ꓪꓻꓼ ꓪꓺ ꓜꓲ ꓢꓯꓼ ꓕꓵꓼ ꓙ ꓡꓯ=
8ꓸ ꓚꓮꓠꓮꓓꓮ ꓗꓪ ꓡ ꓠꓲꓹ ꓫꓵ ꓢꓴ (ꓰꓓꓴꓚꓮꓔꓲꓳꓠꓹ ꓐꓴꓢꓲꓠꓰꓢꓢ) ꓐꓱ ꓶ ꓮ ꓫꓵꓽ ꓙꓽ ꓖꓶ ꓠ ꓔ ꓡ?
ꓚꓮꓠꓮꓓꓮ ꓗꓪ ꓕꓳꓽ ꓶꓽ ꓢꓳꓺ ꓒꓵꓽ ꓠꓬ ꓮꓸ ꓔꓲꓸ ꓟꓬꓽˍ ꓡꓳ= ꓣꓳꓽ ꓢꓳꓺ ꓣꓴꓻ ꓔˍ ꓟ ꓚꓰꓣꓔꓲꓝꓲꓚꓮꓔꓰ ꓙꓳꓻˍ ꓠꓬ ꓢꓔꓴꓓꓰꓠꓔ ꓦꓲꓢꓮ ꓫꓬꓹ ꓢꓲ ꓢꓳꓺ ꓟꓶꓻ ꓓꓻˍ ꓡꓳ= ꓙꓳꓥꓽ ꓟꓽ ꓐꓴ ꓠꓬ ꓕꓳꓽ ꓶꓽ ꓢꓳꓺ ꓢꓲ ꓕꓲꓽ ꓠꓽ ꓗꓪ ꓠꓺ ꓡꓲꓻ 25 ꓙꓵꓹ ꓟꓬꓱꓽ (ꓑꓮꓣꓔ ꓔꓲꓟꓰ) ꓪꓺ ꓬꓰ ꓓꓻˍ ꓡꓳ= ꓚꓮꓠꓮꓓꓮ ꓗꓪ ꓛꓲ ꓡ ꓗꓸ ꓠꓯꓸ ꓕꓲꓽ ꓘꓳꓼ ꓕꓯꓽ ꓑꓰꓣꓟꓲꓠꓰꓠꓔ ꓣꓰꓢꓲꓓꓰꓠꓔ ꓚꓮꓣꓓ ꓫꓬꓹ ꓢꓲꓸ ꓔꓬ ꓪ ꓓꓻˍ ꓡꓳ=
ꓐꓴꓢꓲꓠꓰꓢꓢ ꓚꓱꓹ ꓔꓯ ꓠꓬ ꓬꓲꓸ ꓜꓶꓻ ꓟꓽ ꓢꓷꓸ= ꓮ-ꓢꓲ-ꓬ(ꓮꓢꓲꓮ) ꓗꓪ ꓐꓰ ꓡꓻ ꓢꓲ ꓐꓴꓢꓲꓠꓰꓢꓢ ꓬꓰ ꓔꓬꓹ ꓢꓴ ꓠꓬ ꓮꓽ ꓟꓬꓹ ꓔꓬˍ ꓡꓳ=
9ꓸ ꓡꓻ ꓠ ꓟ ꓗꓪ ꓣꓳ ꓡꓲ-ꓢꓴ ꓫꓵꓽ ꓐꓴ ꓬꓲꓸ ꓒꓳꓹ ꓒꓳꓹ ꓗꓪ ꓪꓴꓽ ꓟꓴ ꓡ ꓠꓹ ꓟ ꓐꓱ ꓶ (ꓟꓬꓮꓠꓟꓮꓣ ꓗꓪ ꓔꓬ ꓢꓴ ꓡꓲ-ꓢꓴ ꓞꓳ ꓡꓱ ꓐꓱ ꓶ ꓐꓰ ꓧꓪ ꓒꓴ ꓟꓵꓽ ꓗꓪ ꓔꓬ ꓟ ꓡꓲ-ꓢꓴ ꓐꓱ ꓶ) ꓠꓬ ꓮ ꓫꓵ ꓢꓯꓼ ꓖꓶ ꓠꓲꓹ ꓫꓵˍ ꓡ?
ꓟꓬꓮꓠꓟꓮꓣ ꓗꓪ ꓔꓬˍ ꓟ ꓞꓳꓺ ꓡꓱꓻ ꓐꓴ ꓔꓯ ꓢꓯꓼ ꓖꓶꓽ ꓠꓲꓹ ꓫꓵˍ ꓟ ꓠꓬ꓾
1) ꓪꓴ-ꓢ ꓚꓱꓹ ꓗꓪ ꓛꓳꓺ ꓫꓱꓽ= ꓣꓳꓽ ꓤꓶꓺ ꓔꓯ ꓪꓴꓽ ꓟꓴꓺ ꓡ ꓝꓲ ꓢꓴ ꓠꓬ ꓪꓴ-ꓢˍ ꓡꓰꓽ ꓥꓳ=
2) ꓙꓲꓻ ꓒꓶꓽ꓾ ꓬ ꓒꓯꓸ꓾ ꓟꓴꓽ ꓘꓴꓽ ꓕꓽ ꓛꓵꓼ꓾ ꓕꓽ ꓓꓳꓻ꓾ ꓕꓽ ꓣꓱꓽ= ꓤꓶꓺ ꓓꓴꓸ ꓡꓰ ꓚꓱꓹˍ ꓐꓰ ꓪꓴꓽ ꓟꓴꓺ ꓡ ꓚꓱꓹ ꓟꓽ ꓙꓳꓻˍ ꓟ ꓬꓲꓸ ꓧꓷꓹ ꓚ ꓠꓬ ꓕꓱ ꓟ ꓥꓳ=
3) ꓦꓲꓻ ꓢꓲꓺ ꓒꓽ꓾ ꓦꓲꓻ ꓢꓲꓺ ꓟꓺ ꓧꓪꓺ ꓚꓱꓹ ꓕꓽ ꓞꓽ= ꓢꓷꓸ ꓠꓲꓹ ꓚꓱꓹ ꓔꓯ ꓧꓪꓺ ꓠꓲꓹ ꓡꓱꓻ=
4) ꓧꓪꓽ-ꓒꓴ ꓥꓳꓽ ꓥꓻˍ ꓠꓬ ꓧꓶꓽ-ꓥꓳꓽ ꓢꓳꓺ ꓢꓯꓼ ꓕꓵꓼ=
5) ꓡꓲ-ꓢꓴ ꓥꓳꓽˍ ꓐꓰꓽ ꓕꓳꓽ ꓶꓽ ꓢꓷꓸ ꓡꓰ ꓝꓲ=
ꓧꓪꓽ ꓒꓴꓺ ꓟꓵꓽ ꓗꓪ ꓛꓲ ꓡ ꓢꓴ ꓠꓬ ꓟꓬꓱꓺ ꓬꓲꓸ ꓜꓶ ꓢꓯꓼ ꓕꓵꓼ= ꓔꓶꓺ ꓙꓱꓼ ꓙꓳꓻ ꓝꓲ= ꓗꓸ ꓠꓯꓸ ꓢꓲꓺ ꓗꓪ ꓟ ꓣꓳꓽ ꓕꓲꓽ ꓦꓲꓻ ꓢꓴ ꓐꓰ ꓣꓳꓽ ꓫꓵꓽ ꓔꓯ ꓛꓵꓽ ꓔꓴꓺ ꓟꓬꓱꓺ ꓬꓰ=