ꓙ-ꓟꓶ-ꓠꓰ ꓡꓰ ꓬꓴ-ꓗ-ꓣꓲꓸ ꓔꓯ ꓟꓯꓼ ꓶ ꓤ ꓬꓰ ꓙ ꓥꓳ

ꓙ-ꓟꓶ-ꓠꓰ ꓡꓰ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓟꓯꓼ ꓶ ꓤ ꓔꓳꓹ ꓙ ꓠꓹ ꓟ ꓓꓵ ꓙ ꓞꓷꓹ ꓗꓷꓳ ꓐꓰ ꓙ-ꓟꓶ-ꓠꓰ ꓗꓴꓷꓼ ꓙꓵꓽ ꓟꓬꓱꓽ ꓢꓲꓺ ꓒꓽ ꓓꓽ ꓟ Olaf Scholz ꓡꓰ 2022 ꓘꓳꓼ 2 ꓦ 26 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿

“ꓬꓴ-ꓗ-ꓣꓲꓸ ꓔꓯ ꓣ-ꓫꓸ ꓡꓰ ꓓꓶꓽ ꓡ ꓟ ꓠꓬ ꓟꓲ ꓠꓯ ꓚ ꓟꓲ ꓡꓯꓽ ꓟꓰꓹ ꓑ ꓙꓰˍ ꓟ ꓥ ꓢꓲ꓾ ꓧꓶꓸ ꓕꓯ ꓟꓲ ꓠꓯ ꓟꓯꓼ ꓘꓶꓽ ꓓꓳ ꓡꓰ ꓟꓶ ꓕꓱꓼ ꓦꓬꓼ ꓠꓬꓲ ꓗꓪ ꓡꓽ ꓙꓰ ꓝꓲꓳ꓿ ꓖꓳ ꓟ ꓑꓶꓸ ꓓꓴ ꓣ-ꓫꓸ ꓔꓯ ꓔꓳꓹ ꓡꓯ ꓘꓳ ꓠꓹ ꓟ ꓐꓱ ꓶ ꓬꓴ-ꓗ-ꓣꓲꓸ ꓔꓯ ꓔꓳꓹ ꓙ ꓬꓰ ꓙ ꓠ ꓗ ꓡꓳ” ꓐꓰ Olaf Scholz ꓡꓰ ꓐꓯˍ ꓡꓳ꓿

ꓬꓲꓸ ꓪꓴꓸ ꓕꓲ ꓧꓪꓹ ꓖꓶꓽ ꓩꓴ ꓠꓹ ꓟ꓾ ꓔꓲꓼ ꓟꓳ-ꓓꓳ ꓛꓬꓹ ꓓꓴ (anti tanks) 1000 ꓟ꓾ ꓙꓱ ꓦꓲ ꓐꓶ ꓓꓴ Stinger ꓕꓲ ꓩꓴꓸ ꓟ 500 ꓗꓸ ꓥ ꓡꓳ ꓐꓰ ꓙ ꓟꓳ ꓗꓷꓳ꓿

ꓧꓶꓸ ꓕꓯ ꓦꓬꓼ ꓠꓬꓲ ꓗꓪ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓟꓵꓽ ꓐꓰ ꓗꓴꓷꓼ ꓗꓪ ꓟꓯꓼ ꓶ ꓤ ꓪꓴꓽ ꓖꓶ ꓟꓽ ꓓ ꓐꓰ ꓙ-ꓟꓶ-ꓠꓰ ꓗꓴꓷꓼ ꓦꓰꓼ ꓚꓱꓹ ꓛꓳ ꓚꓱꓹ ꓙꓳˍ ꓥ ꓟꓲ꓾ ꓮ ꓟꓶ ꓠꓬ ꓣ-ꓫꓸ ꓡꓰ ꓜꓲꓽ ꓜꓳꓽ ꓑꓰꓹ ꓑꓰꓹ ꓙꓵꓽ ꓗ ꓟꓽ ꓛꓳ ꓟꓯꓼ ꓓꓶꓽ ꓡ ꓟ ꓔꓯ ꓔꓳꓹ ꓡꓯ ꓘꓳ ꓚꓱꓹ ꓟꓽ ꓬꓰ ꓟꓽ ꓓ ꓐꓰ ꓓꓵꓽ ꓙ ꓢꓲꓸ ꓕꓱ ꓡꓱ ꓬꓰ ꓩꓴ ꓡ ꓟ ꓥ ꓡꓳ꓿

ꓝꓮꓲ ꓒꓴ ꓞꓳꓽ ꓦꓲ ꓗꓪ ꓒꓴ ꓣꓴ/ꓖꓶꓽ ꓚꓱ, ꓔꓯ ꓙꓵꓽ ꓗꓪꓼ ꓚꓱꓹ ꓢꓪꓲꓝꓔ ꓔꓯ ꓥ ꓟꓲ ꓣ-ꓫꓸ ꓟꓬꓱꓽ ꓬꓰ ꓗꓸ ꓟꓽ ꓘꓳ ꓡꓰ ꓝꓲ ꓠꓹ ꓟ ꓑꓲꓸ ꓞꓲꓽ ꓠꓹ ꓟ ꓙ-ꓟꓶ-ꓠꓰ ꓠꓲꓹ ꓧꓳꓹ ꓗꓷꓳ꓿

ꓝꓮꓲ ꓟꓽ ꓞꓲ ꓠꓯ-ꓔ-ꓡ ꓗꓪ ꓐꓰ ꓥ ꓟꓲ ꓔꓲꓼ ꓟꓳ-ꓓꓳ ꓛꓬꓹ ꓡꓮꓳꓽ-ꓛ ꓡ ꓛꓴꓸ 400 ꓗꓸ꓾ ꓯ-ꓢꓲ-ꓔꓳ-ꓠꓲ-ꓬ ꓡꓰ ꓙꓱ ꓦꓲ ꓐꓶ ꓙꓼ 8 ꓗꓸ ꓬꓰ ꓙ ꓩꓴ ꓡ ꓓꓴ ꓥꓳ ꓐꓯ ꓡꓳ꓿

ꓗꓴꓷꓼ ꓙꓵꓽ ꓪ ꓣꓴ ꓔꓸ ꓟ ꓟꓬ-ꓟ ꓟꓯꓼ ꓠꓬ ꓣ-ꓫꓸ ꓡꓰ ꓟꓵꓽ ꓦꓴ ꓟ꓾ ꓟꓯꓼ ꓢꓰꓼ ꓡ ꓟ ꓠꓬ ꓔꓱꓹ ꓜꓳˍ ꓡꓳ꓾ ꓬꓲꓸ ꓗꓴꓷꓼ ꓢꓲ ꓡꓲꓹ ꓬꓰ ꓠꓹ ꓟ ꓐꓱ ꓶ ꓐꓰ꓾ ꓟꓲ ꓠꓯ ꓗꓪ ꓟꓬꓱꓺ ꓓꓳꓽ ꓙꓳˍ ꓟ ꓧꓳꓽ ꓪꓴꓸ ꓟꓴ ꓢꓴ ꓗꓴꓷꓼ ꓥˍ ꓟ ꓟꓳꓸ ꓖꓶ ꓓꓴ ꓟꓽ ꓬꓰ ꓟꓽ ꓓ ꓟ ꓟꓬꓱꓽ ꓥꓳ ꓐꓰ ꓟꓯꓼ ꓜꓲꓽ ꓜꓳ-ꓟꓰꓹ-ꓕꓴꓸ ꓡꓰ ꓐꓯ ꓔꓸ ꓡꓳ꓿

ꓝꓮꓲ ꓟꓬ-ꓟ ꓑ ꓫꓬ ꓡꓰ ꓢꓲꓻ ꓣꓴ ꓔꓸ ꓟ ꓑ ꓫꓬ ꓝꓲ ꓓꓴ ꓐꓴ ꓡꓰ ꓒꓳꓻ ꓓꓳ ꓡ ꓟ ꓠꓴꓖ ꓗꓴꓷꓼ ꓙꓵꓽ ꓜꓴ ꓠꓬ꓾ ꓬꓴ-ꓗ-ꓣꓲꓸ ꓔꓯ ꓣ-ꓫꓸ ꓡꓰ ꓟꓯꓼ ꓓꓶꓽ ꓡ ꓟ ꓔꓯ ꓒꓳꓹ ꓔꓳꓹ ꓢꓲ꓾ 2022 ꓘꓳꓼ 2 ꓦ 25 ꓠꓬꓲ ꓣꓴ-ꓗ-ꓣꓲꓸ ꓑ ꓫꓬ ꓐꓴˍ ꓐꓰ ꓠꓲꓹ ꓧꓳꓹ ꓢꓲꓽ ꓧꓳꓹ ꓕꓳ ꓶꓽ ꓕꓲ ꓚꓴꓸ ꓓꓳ ꓩꓴ ꓡ ꓡꓳ꓿

ꓬꓲꓸ ꓚꓰ꓾ ꓦꓳꓮ, ꓠꓴꓖ