ꓙ-ꓑ ꓟꓵꓽ ꓙꓪ ꓙꓰ ꓠꓹ ꓟ ꓥꓳꓽ ꓫꓵꓽ ꓕꓳ ꓶ ꓘꓳꓽ ꓓꓴ ꓫꓳꓼ ꓕꓳ ꓶ ꓒꓬꓽ ꓔꓯ ꓬꓥ-ꓖꓑ ꓡꓳ ꓒꓱ ꓗꓪ ꓠꓬꓲꓸ ꓠꓬꓲ 2022 ꓘꓳꓼ 8 ꓦ 5 ꓠꓬꓲ ꓕꓯꓽ ꓪꓴꓽ ꓖꓶ ꓪꓴꓸ ꓬꓴ ꓟ ꓗꓪ ꓞꓳ ꓜꓴ ꓞꓳ ꓟꓯꓼ ꓞꓳꓺ ꓡꓯ ꓘꓳ ꓡ ꓠꓬꓲ ꓠꓻ ꓓꓴ ꓡꓰ ꓢꓴ ꓙꓳ ꓡꓰ ꓢꓲꓸ ꓫꓳꓼ ꓕꓳ ꓶ ꓒꓬꓽ ꓪꓴꓽ ꓠꓽ ꓩꓴꓳ꓿
ꓮ ꓟꓶ ꓖꓳ ꓑꓳꓸ ꓠꓬ ꓞꓳ ꓜꓲꓼ ꓪ ꓜꓲꓼ ꓕꓱ ꓡꓱ ꓟꓽ ꓬꓰ ꓝꓲꓳ꓾ ꓳ-ꓡꓮꓲꓹ ꓗꓪ ꓐꓰ 8 ꓦ 6-9 ꓠꓬꓲ ꓗꓪ ꓛꓲ ꓪꓴꓽ ꓓꓴ ꓥꓳ꓾ ꓐꓰ ꓙ-ꓑ ꓥꓳꓽ ꓕꓳ ꓶ ꓘꓳꓽ ꓜꓴ ꓙꓡꓑꓔ ꓗꓪ ꓐꓰ ꓢꓷ ꓙ ꓟꓴ ꓙ ꓔꓸ ꓡꓳ꓿
“ꓬꓲꓸ ꓪꓴꓸ ꓕꓽ ꓝꓯꓸ ꓠꓬꓹꓳ ꓫꓵꓽ ꓥꓳ꓿ ꓳꓸ ꓗꓪ ꓝꓯꓸ ꓟꓽ ꓛꓲ ꓐꓯ ꓡ ꓢꓲꓸ ꓔꓳ-ꓗꓲ ꓢꓽ ꓓꓴ ꓟ ꓛꓼ ꓩꓴ ꓡ ꓟ ꓗꓪ ꓚꓳꓸ ꓠꓻ ꓓꓴ ꓡꓰ ꓢꓴ ꓮ ꓘꓶꓸ ꓙꓳ ꓬꓰꓳ꓿ ꓖꓽ ꓟꓶ ꓫꓵꓸ ꓫꓵꓸ ꓬꓰ ꓡ ꓪ ꓡꓰ ꓔꓸ ꓥ” ꓐꓰ ꓖꓳ ꓗꓪ ꓔꓺ ꓙꓰ ꓢꓴ ꓕꓲ ꓣꓳ ꓡꓰ ꓐꓯ ꓡꓲ꓿
ꓟꓬ-ꓟ ꓗꓴꓷꓼ ꓗꓪ ꓬꓰ ꓜꓽ ꓬꓰ ꓓꓳ ꓚꓱꓹ ꓠꓬ ꓧꓶꓸ ꓕꓯ ꓟ ꓕꓯ ꓢꓲ ꓫꓸ ꓡ ꓔꓬ ꓠꓬꓲ꓾ ꓙꓰ ꓐ ꓡ ꓢꓴ ꓞꓳ ꓡꓯꓸ ꓮ ꓙꓵꓽ ꓠꓬ ꓐꓶꓽ ꓟꓵꓽ ꓗꓪ ꓓꓳ ꓙꓰ ꓚꓱꓹ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿