ꓘ-ꓙꓳ ꓙꓲ-ꓢꓴ ꓘꓴ ꓜꓲꓼ ꓞꓳ ꓪꓽ ꓘꓴ ꓦꓲ ꓟꓵꓽ ꓮ ꓠꓱ ꓡꓯꓼ ꓓꓴ ꓫꓺ ꓜꓴ ꓔꓯ ꓡꓯꓼ ꓙꓱ ꓗꓷꓳ

ꓑꓴ-ꓔ-ꓳ ꓟꓵ꓾ ꓟꓶ-ꓚꓸ-ꓐꓳꓼ ꓡꓳ ꓒꓱ꓾ ꓘ-ꓙꓳ ꓘꓹ ꓗꓪ ꓙꓳˍ ꓟ ꓙꓲ-ꓢꓴ ꓘꓴ ꓜꓲꓼ ꓞꓳ ꓪ ꓘꓴ ꓦꓲ ꓟꓵꓽ ꓔꓯ ꓮ ꓠꓱ ꓡꓯꓼ ꓓꓴ ꓫꓺ ꓜꓴ ꓡꓯ ꓒꓯꓹ ꓗꓪ ꓡꓯꓼ ꓙꓱ ꓗꓷꓳ꓿

ꓕꓱ ꓡꓱ ꓡꓯꓼ ꓙꓱ ꓠꓹ ꓟ (ꓮ-ꓢ) ꓐꓴ-ꓓꓼ ꓦ ꓡꓱ ꓢꓴ ꓐꓴ ꓬꓲꓸ ꓛꓲ (12) ꓣꓳ ꓠꓬ 2022 ꓘꓳꓼ 6 ꓦ 16 ꓠꓬꓲ ꓐꓰ꓾ (ꓡꓲ-ꓢꓴ) ꓙꓲ-ꓢꓴ ꓘꓴ ꓜꓲꓼ ꓞꓳ ꓬꓲꓸ ꓛꓲ (5) ꓣꓳ ꓠꓬ 2022 ꓘꓳꓼ 6 ꓦ 30 ꓠꓬꓲ ꓕꓯꓽ ꓡꓯꓼ ꓓꓴ ꓢꓽ ꓢꓲꓸ ꓡꓯꓼ ꓙꓱ ꓗꓷ ꓟ ꓥ ꓡꓳ꓿

1976 ꓘꓳꓼ ꓗꓪ ꓙꓲ-ꓢꓴ ꓘꓴ ꓜꓲꓼ ꓞꓳ ꓪ ꓘꓴ ꓦꓲ ꓟꓵꓽ ꓓꓶꓺ ꓕꓯꓽ ꓠꓲꓽ ꓜꓽ ꓐꓬꓱꓽ ꓧꓪ ꓟꓳꓻ ꓟ ꓔꓯ ꓖꓳ ꓕꓯꓽ ꓕꓲ ꓦꓬꓼ ꓠꓬꓲ ꓗꓪ ꓟ ꓘ-ꓙꓳ ꓘꓹ ꓞꓳ ꓪꓴꓽ ꓬꓲꓹ-ꓡꓴꓽ ꓡꓰꓽ ꓮ-ꓢ ꓞꓳ ꓪꓴꓽ ꓢꓳꓸ-ꓟꓳ ꓔꓯ ꓡꓯꓼ ꓙꓱ ꓟꓸ ꓖꓶ ꓗꓷ ꓟ ꓥ ꓡꓳ꓾ ꓐꓯ ꓡꓳ꓿

ꓖꓳ ꓟ ꓗꓪ ꓘ-ꓙꓳ ꓙꓲ-ꓢꓴ ꓘꓴ ꓜꓲꓼ ꓞꓳ ꓪ ꓘꓴ ꓦꓲ ꓫꓬꓹ ꓔꓸ ꓟ ꓪ ꓜꓱꓽ ꓕꓱ ꓟ ꓠꓬ ꓮ ꓠꓱ ꓠꓱ ꓕꓯꓽ ꓟ ꓮ-ꓢ ꓫꓵꓽ ꓐꓴ ꓠꓲꓽ ꓔꓲꓺ ꓖꓴ ꓥ ꓡꓳ꓾ ꓐꓯ ꓢꓲꓸ ꓦꓴꓻ ꓡꓲꓸ ꓡ ꓠꓬꓲ꓾ ꓑ-ꓔꓲ ꓗꓳ-ꓢꓰ ꓦꓬꓼ ꓠꓬꓲ ꓗꓪ ꓪ ꓚꓲꓺ ꓔꓯ ꓠꓬꓲꓽ ꓐꓶꓽ ꓘꓶꓽ ꓐꓹ ꓩꓴ ꓗꓷ ꓟ ꓥ ꓡꓳ꓿

ꓮ ꓟꓶ 2021 ꓘꓳꓼ ꓗꓪ ꓕꓲ ꓧꓪꓹ ꓠꓲꓽ ꓤꓽ ꓐꓬꓱꓽ ꓚꓴꓸ ꓟꓶꓳ ꓐꓯ ꓢꓲꓸ ꓫꓵꓽ ꓪꓴ ꓕꓱ ꓟ ꓬꓲꓸ ꓫꓵꓼ ꓗ ꓡ ꓟ ꓥ ꓡꓳ꓿ ꓮ ꓟꓶ ꓠꓬ ꓮ ꓠꓱ ꓡꓯꓼ ꓓꓴ ꓫꓺ ꓜꓴ ꓗꓪ ꓐꓰ ꓗꓪꓽ ꓫꓵꓽ ꓙꓰ ꓠꓹ ꓟ ꓬꓰ ꓓꓳ ꓡ ꓟ ꓥ ꓡꓳ꓿

“ꓕꓱ ꓡꓱ ꓦ ꓡꓱ ꓚꓱꓹ ꓠꓬꓲꓽ ꓟ ꓙꓳ ꓔꓬ ꓝꓲˍ ꓟ ꓠꓬ ꓙꓲˍ ꓡꓳ꓿ ꓓꓵꓽ ꓓꓳ ꓢꓴ ꓪꓰ ꓤ ꓥ ꓟꓲ ꓢꓰꓸ ꓮ ꓢꓸ ꓓꓴ ꓙꓳˍ ꓥꓳ꓿ ꓮ ꓠꓱ ꓡꓯꓼ ꓓꓴ ꓫꓺ ꓜꓴ ꓠꓰ ꓮ ꓡꓲ ꓬꓰ ꓒꓬꓱꓼ ꓡ ꓥ ꓢꓶ?꓿ ꓮ ꓫꓵꓽ ꓙꓲ ꓖꓴ ꓙꓳ ꓥ ꓢꓶ?= ꓮ ꓠꓱ ꓟꓵꓽ ꓐꓯ ꓥꓳ ꓠꓯ ꓠꓽ ꓮ ꓗꓪ ꓛꓲ ꓛꓲ ꓮ ꓠꓱ ꓟꓵꓽ ꓥ ꓠꓯꓸ” ꓐꓰ ꓧꓶꓸ ꓕꓯꓽ ꓘ-ꓙꓳ ꓗꓪ ꓔꓬ ꓠꓬꓲ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿

ꓘ-ꓙꓳ ꓘꓹ ꓔꓯ ꓡꓲ-ꓢꓴ ꓒꓽ ꓐꓴ ꓡꓰ 1942 ꓘꓳꓼ ꓕꓯꓽ ꓔꓶ ꓡꓳ꓿ ꓘꓹ ꓔꓶꓺ ꓠꓹ ꓟ ꓟꓵꓽ ꓧꓪ ꓓꓰꓽ ꓕꓯꓽ ꓜꓳꓹ-ꓒꓽ ꓞꓳ ꓪꓴꓽ ꓔꓯ ꓒꓴ 1500 ꓒꓯꓼ ꓐꓰ꓾ ꓮ ꓪꓯꓼ 1 ꓘꓹ ꓖꓶꓽ ꓢꓲꓸ ꓟꓵꓽ ꓓꓰꓽ ꓔꓸ ꓟ ꓥ ꓡꓳ꓿

ꓘꓹ ꓔꓶꓺ ꓟꓵꓽ ꓓꓰꓽ ꓗꓪ ꓪꓴꓸ ꓓꓵ ꓣꓱꓽ ꓢꓴ 4 ꓣꓳ ꓠꓬ꓾ (1) ꓭ-ꓟꓳ-ꓒꓽ (2) ꓧꓶꓽ-ꓮ-ꓛꓬ (3) ꓙꓬ-ꓮ-ꓫꓬ (4) ꓧꓶ-ꓒ-ꓓ ꓐꓴ ꓥ ꓡꓳ꓿