ꓘꓼ-ꓗ-ꓬꓹ-ꓬ ꓗꓪ ꓟꓳ-ꓓꓳ ꓒꓽ ꓕꓲ ꓦꓲ ꓕꓲ ꓧꓪꓹ ꓙꓰ ꓗꓲꓮ ꓡꓰꓽ 8 ꓢꓯꓹ ꓬꓲꓸ ꓫꓴꓸ ꓖꓳꓻ ꓔꓬ

2022 ꓘꓳꓼ 3 ꓦ 3 ꓠꓬꓲ ꓕꓯꓽ ꓘꓼ-ꓗ-ꓬꓹ-ꓬ ꓗꓪ ꓗꓽ ꓔꓬ ꓟ ꓗꓲꓮ ꓟꓯꓼ ꓐꓴ ꓡꓰꓽ ꓟꓳ-ꓓꓳ ꓒꓽ ꓕꓲ ꓦꓲ ꓙꓻ ꓙꓰ ꓠꓹ ꓟ 800000 ꓒꓯꓼ (8 ꓢꓯꓹ) ꓖꓶꓽ ꓡꓯ ꓐꓰ ꓓꓰꓽ ꓔꓬ ꓡꓳ ꓐꓰ ꓑꓴ-ꓔ-ꓳ ꓗꓪ ꓶ ꓤ ꓚꓰꓹ ꓢꓴ ꓕꓲ ꓣꓳ ꓡꓰ the Lisu Times ꓗꓪ ꓫꓸ ꓕꓱ ꓡˍ ꓡꓳ꓿

“ꓮ ꓕꓽ ꓟꓽ ꓚꓰꓼ ꓕꓲ ꓧꓪꓹ ꓙ ꓙꓰ ꓓꓴ ꓟ 8 ꓢꓯꓹ ꓓꓰꓽ ꓡ ꓥ꓿ ꓕꓲ ꓘꓳꓼ ꓐꓱ ꓶ ꓬꓲꓸ ꓫꓴꓸ ꓟ ꓠꓽ 7 ꓢꓯꓹ ꓬꓲꓸ ꓫꓳꓹ ꓫꓳꓽ꓿ ꓳꓸ ꓟ ꓕꓯꓽ ꓢꓲ ꓶ ꓤ ꓕꓲ ꓧꓪꓹ ꓚꓰꓹ ꓙ ꓙꓰ ꓓꓴ ꓟ ꓔꓯ 8 ꓢꓯꓹ ꓟꓽ ꓖꓶ ꓡ ꓠꓬ ꓟꓽ ꓙꓰ ꓝꓲ ꓙꓳꓽ꓿ ꓮ ꓡꓲ ꓖꓶ ꓗꓸ ꓟꓽ ꓘꓳ” ꓐꓰ ꓶ ꓤ ꓚꓰꓹ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿

ꓗꓲꓮ ꓐꓴ ꓡꓰ ꓙ ꓖꓴ ꓗꓪ꓾ ꓶ ꓡꓯꓼ ꓚꓱꓹ ꓗꓪ ꓬꓲꓸ ꓫꓴꓸ ꓖꓳꓻ ꓔꓬ ꓟ ꓠꓬ ꓙꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲꓸ ꓫꓴꓸ ꓕꓯꓽ ꓢꓲ ꓗꓪ ꓮ ꓟꓶ ꓠꓬ ꓟꓶ-ꓚꓲ-ꓠ — ꓑꓴ-ꓔ-ꓳ ꓙ ꓖꓴ ꓚꓱꓹ ꓡꓳ ꓚ ꓕꓲ ꓧꓪꓹ ꓙꓰ ꓕꓲ ꓧꓪꓹ ꓟꓳ ꓓꓳ ꓒꓽ ꓕꓲ ꓦꓲ 8 ꓢꓯꓹ ꓓꓰꓽ ꓡ ꓔꓬ ꓠꓬꓲ ꓑ ꓫꓬ ꓐꓴ ꓟꓬꓱꓽ ꓬꓰ ꓜꓽ ꓟꓽ ꓙꓲꓳ ꓐꓯ ꓔꓬ ꓡꓳ꓿

“ꓑꓴ-ꓔ-ꓳ ꓙ ꓖꓴ ꓗꓪ ꓔꓣꓴꓚꓗ ꓟꓳ-ꓓꓳ ꓕꓲ ꓦꓲ ꓠꓬ ꓶ ꓤ 7000-8000 ꓚꓻ ꓛꓲ ꓚꓰꓹ ꓔꓸ ꓥ꓿ 1 ꓚ ꓚꓰꓹ ꓒꓵꓽ 200 ꓣꓴ ꓕꓽ 15 ꓢꓯꓹ ꓖꓼ ꓡꓯꓼ ꓖ ꓙꓲ ꓪ ꓓꓹ ꓥ꓿ ꓖꓳ ꓗꓪ ꓙꓽ ꓧꓪ ꓞꓶ ꓒꓵꓽ ꓠꓬ 1 ꓑꓲ-ꓑ ꓐꓶꓽ ꓖꓴ ꓬꓰ ꓡ ꓠꓰ 6-7 ꓢꓯꓹ ꓒꓯꓼ꓿ ꓟꓳ-ꓓꓳ ꓫꓵꓸ ꓒꓽ ꓪꓽ ꓒꓵꓽ ꓖꓶ ꓓꓳ ꓕꓽ 3-4 ꓢꓯꓹ ꓡꓰꓽ ꓜꓰ ꓡ ꓥ꓿ ꓳꓸ ꓟ ꓔꓯ 8 ꓢꓯꓹ ꓖꓼ ꓡ ꓕꓽ ꓮ ꓡꓲ ꓡꓲꓸ ꓘꓴ ꓣꓴ ꓟꓽ ꓐ ꓡ” ꓐꓰ ꓮ ꓢꓳ ꓶ ꓤ ꓚꓰꓹ ꓢꓴ ꓡꓰ ꓚ ꓟꓸ ꓖꓶ ꓡ ꓡꓳ꓿

ꓕꓱ ꓟ ꓐꓰ ꓗꓳꓸ ꓙꓲꓽ ꓙꓳ ꓢꓲ ꓗꓲꓳ/ꓗꓲꓮ ꓗꓪ ꓐꓰ ꓫꓴꓸ ꓕꓱ ꓡꓱ ꓖꓳꓻ ꓝꓲˍ ꓟ ꓥ/ ꓟꓽ ꓥ ꓠꓬ ꓠꓻ ꓠꓬꓲ ꓟꓽ ꓪ ꓢꓰ꓿

ꓖꓳ ꓡꓱ ꓥ ꓟꓲ ꓓꓳꓽ ꓕꓱ ꓟ ꓠꓬ ꓦ ꓡꓱ ꓐꓳ ꓓˍ ꓟ꓾ ꓚꓲ ꓛꓬ ꓟꓳ-ꓓꓳ ꓗꓪ ꓐꓰ ꓶ ꓤ ꓚꓰꓹ ꓔꓬ ꓢꓴ ꓬꓲꓸ ꓚꓲꓸ ꓛꓬ ꓔꓳꓹ ꓜꓳˍ ꓟ ꓥ ꓡꓳ꓿

ꓟꓶ-ꓚꓲ-ꓠ — ꓑꓴ-ꓔ-ꓳ ꓙ ꓖꓴ ꓗꓪ ꓙꓰ ꓠꓹ ꓟ ꓟꓳ-ꓓꓳ ꓤꓽ꓾ ꓟꓳ-ꓓꓳ ꓒꓽ ꓮ ꓙꓵꓽ ꓕꓲ ꓘꓳꓼ ꓐꓱ ꓶ ꓬꓲꓸ ꓫꓴꓸ ꓐꓶ ꓠ ꓗꓹ ꓟ ꓕꓯꓽ ꓢꓲ꓾ ꓕꓲ ꓧꓪꓹ ꓡꓲꓸ ꓕꓲ ꓧꓪꓹ ꓙꓰ ꓪ ꓠꓹ ꓟ ꓐꓱ ꓶ ꓬꓴꓸ ꓟꓶ ꓬꓲꓸ ꓙꓲꓽ ꓟꓽ ꓓ ꓟꓽ ꓢ ꓬꓲꓸ ꓫꓴꓸ ꓖꓳꓻ ꓔꓬ ꓟ ꓑꓶꓸ ꓓꓴ ꓬꓲꓸ ꓪꓴꓸ ꓠꓬ ꓶ ꓤ ꓚꓰꓹ ꓢꓴ ꓐꓴ꓾ ꓗꓸ ꓠꓯꓸ ꓠꓬ ꓑꓴ-ꓔ-ꓳ ꓕꓲ ꓘꓴꓽ ꓗꓪ ꓑ ꓫꓬ ꓐꓴ ꓶ ꓤ ꓒꓵꓽ ꓟꓶꓼ ꓠꓯꓸ ꓟꓶꓼ ꓠꓯꓸ ꓐꓶ ꓠ ꓗꓷ ꓡꓰ ꓔꓬ ꓡꓳ꓿

2022 ꓘꓳꓼ 3 ꓦ 4 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓑꓴ-ꓔ-ꓳ ꓗꓪ ꓶ ꓤ ꓚꓰꓹ ꓒꓵꓽ ꓠꓬ ꓓꓯ ꓙꓰꓳ ꓐꓯ ꓡꓳ꓿

“ꓧꓶꓸ ꓕꓯ 1 ꓚ 200 ꓒꓯꓼ꓾ ꓮ ꓟꓶ ꓠꓬ ꓙ ꓖꓴ ꓗꓪ ꓬꓴꓸ ꓫꓴꓸ ꓖꓳꓻ ꓠꓰ ꓟꓽ ꓓ ꓠꓰ 1 ꓚ 450 ꓒꓯꓼ ꓗ ꓬꓰꓳ” ꓐꓰ ꓶ ꓤ ꓚꓰꓹ ꓪꓴꓽ ꓢꓴ ꓐꓴ ꓡꓰ ꓐꓯ ꓡꓳ꓿