ꓟꓲ ꓠꓯ ꓗꓴꓷꓼ ꓜꓴ ꓗꓪ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓠꓬꓹ ꓖꓴ (ꓠꓬꓲ ꓖꓴ) ꓔꓯ ꓟꓬ-ꓟ ꓗꓴꓷꓼ ꓑ ꓫꓬ ꓙꓵꓽ ꓪ ꓦꓴ ꓜꓴ ꓡꓰ ꓦꓴ ꓡ ꓔꓬ ꓡꓳ= ꓮ-ꓟꓯ-ꓣꓲ-ꓗ ꓗꓴꓷꓼ ꓗꓪ ꓕꓳ ꓶ ꓐꓳ ꓢꓲ꓾ ꓮ ꓟ ꓶ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓠꓬꓲ ꓖꓴ ꓣꓴ ꓔꓸ ꓢꓴ ꓚꓳ-ꓟꓳꓹ-ꓕꓴꓸ (Kyaw Moe Tun) ꓔꓯ ꓟꓬ-ꓟ ꓗꓴꓷꓼ ꓗꓪ ꓡꓽ ꓡ ꓝꓲ ꓠꓹ ꓟ ꓐꓰ꓾ ꓬꓲꓸ ꓬꓲ ꓛꓲ ꓟꓯꓼ ꓗꓪ ꓐꓰ ꓡ ꓟ ꓕꓲ ꓣꓳ ꓔꓯ ꓗꓶ ꓠꓹ ꓟ ꓑ ꓫꓬ ꓙꓵꓽ ꓪ ꓦꓴ ꓜꓴ ꓗꓪ ꓟ ꓪꓳ-ꓠꓼ-ꓟꓮꓳꓽ-ꓡꓱ (Wunna Maung Lwin) ꓡꓰ ꓮ-ꓟꓯ-ꓣꓲ-ꓗ ꓔꓯ ꓥ ꓟꓲ꓾ ꓗꓴꓷꓼ ꓜꓴ ꓜꓲꓼ ꓚꓰꓺ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓥ ꓟꓲ ꓕꓳ ꓶ ꓖꓶꓽ ꓩꓴ ꓡ ꓡꓳ=
ꓡ ꓠꓹ ꓟ 9 ꓦ ꓠꓯꓼ ꓗꓪ ꓮ ꓟ ꓠꓬ ꓗꓴꓷꓼ ꓝꓲ ꓓꓴ ꓓꓽ ꓟ ꓠꓬꓲ ꓖꓴ ꓟꓶ ꓒꓵꓽ ꓡ ꓐꓯ ꓟ ꓔꓯ ꓗꓴꓷꓼ ꓜꓴ ꓜꓲꓼ ꓓꓴ ꓗꓪ ꓐꓰ ꓐꓯ ꓞꓷꓹ ꓠꓹ ꓟ ꓥ ꓡꓳ= ꓟꓲ ꓠꓯ ꓗꓴꓷꓼ ꓜꓴ ꓖꓪ ꓙꓱ ꓜꓲꓼ ꓓꓴ ꓐꓱ ꓶ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓚꓳ-ꓟꓳꓹ-ꓕꓴꓸ ꓠꓬ ꓑ ꓫꓬ ꓧꓳꓽ ꓢꓴ ꓮꓳ-ꓢꓸ-ꓢꓴꓸ-ꓚꓰ ꓐꓰ ꓪ ꓔꓲꓸ ꓪꓰꓹ-ꓟꓲꓼ (President Win Mint) ꓡꓰ ꓡꓯꓼ ꓓꓴ ꓐꓳ ꓢꓲꓸ ꓝꓲꓺ ꓔꓸ ꓟ ꓟꓬ-ꓟ ꓗꓴꓷꓼ ꓝꓲ ꓓꓴ ꓓꓽ ꓟ ꓥ ꓡꓳ= ꓬꓲꓸ ꓠꓬ ꓗꓴꓷꓼ ꓗꓪ ꓡ ꓛꓴꓸ ꓔꓯꓹ ꓢꓴ ꓡꓰ ꓑ ꓫꓬ ꓙꓵꓽ ꓪ ꓦꓴ ꓙꓰ ꓟ ꓔꓯ ꓘꓳ ꓣꓴ ꓟꓽ ꓐ ꓡ= ꓥꓪ ꓠꓬ ꓑ ꓫꓬ ꓡꓰ ꓝꓲ ꓔꓸ ꓢꓴ ꓥ ꓠꓬꓲ ꓑ ꓫꓬ ꓠꓲꓹ ꓡꓶꓽ ꓔꓯ ꓐꓳ ꓟꓳꓸ ꓖꓶ ꓓꓴ ꓥꓳ ꓐꓯ ꓢꓲꓸ 2021 ꓘꓳꓼ 2 ꓦ 26 ꓠꓬꓲ꓾ ꓟꓲ ꓠꓯ ꓗꓴꓷꓼ ꓜꓲꓼ ꓓꓴ ꓗꓪ ꓟꓬ-ꓟ ꓑ ꓫꓬ ꓐꓱ ꓶ ꓑꓶꓸ ꓑꓶꓸ ꓡꓰ ꓫꓸ ꓕꓱ ꓗꓷ ꓢꓴ ꓥ ꓡꓳ= ꓮ ꓟꓶ ꓗꓪ ꓛꓲ ꓥ ꓟꓲ ꓑ ꓫꓬ ꓐꓱ ꓶ ꓦꓰꓼ ꓙ ꓔꓬ ꓡꓳ=
ꓮ ꓟꓶ ꓑ ꓫꓬ ꓙꓵꓽ ꓪ ꓦꓴ ꓢꓴ ꓐꓴ ꓠꓬ ꓬꓲꓸ ꓔꓯ ꓣꓴ ꓛꓹ ꓩꓴ ꓢꓲꓸ ꓬꓲꓸ ꓠꓬꓹ ꓖꓴ ꓦꓴ ꓡ ꓔꓬ ꓟ ꓥ ꓡꓳ= ꓝꓮꓲ ꓬꓲꓸ ꓧꓪ ꓖꓳ ꓓꓱ ꓔꓯ ꓥ ꓟꓲ ꓟꓬ-ꓟ ꓗꓴꓷꓼ ꓗꓪ ꓡꓽ ꓡ ꓠꓬ ꓐꓯ ꓟꓴ ꓩꓴ ꓢꓲꓸ ꓡꓴꓽ ꓠꓹ ꓟ ꓙ ꓖꓶ ꓓꓴ ꓡꓰꓳ= ꓖꓳ ꓡꓱ ꓥ ꓟꓲ ꓮ-ꓟꓯ-ꓣꓲ-ꓗ ꓐꓰ ꓠꓱꓸ ꓐꓯꓼ ꓗꓴꓷꓼ ꓜꓴ ꓐꓴ ꓮ ꓡꓲ ꓓꓵꓽ ꓙ ꓞꓷꓹ ꓡ ꓟ ꓔꓯ 9 ꓦ ꓘꓴ ꓗꓪ ꓢꓷꓸ ꓡ ꓓꓴ ꓥ ꓡꓳ=