ꓠꓮꓟ-ꓕꓶ-ꓘꓴ. ꓘꓹ ꓗꓪ ꓠꓬ꓾ 2017 ꓘꓳꓼ ꓗꓪ ꓞꓳ-ꓦꓲꓻ (334) ꓦꓲꓻ ꓕꓯ: ꓢꓲ ꓔꓬ ꓢꓲ꓾ ꓞꓳ-ꓣꓳ (ꓤꓼ -ꓠꓱ ꓞꓳ-ꓟꓳ ꓮ ꓙꓵ) ꓠꓬ꓾ (2382) ꓕꓯ ꓢꓲ ꓔꓬ ꓟ ꓘꓹ ꓓ: ꓟ ꓥ ꓡꓳ= ꓮ ꓟꓶ ꓠꓬ꓾ 2017 ꓘꓳꓼ ꓕꓯ: ꓢꓲ꓾ ꓮ ꓟꓬꓹ ꓔꓬꓹ ꓟ ꓣꓳ ꓡꓲ-ꓢꓴ ꓘꓹ ꓓ: ꓟ ꓥ ꓡꓳ= ꓠꓮꓟ-ꓕꓶ-ꓘꓴ. ꓘꓹ ꓗꓪ ꓔꓬꓹ ꓟ ꓣꓳ ꓡꓲ-ꓢꓴ ꓐꓴ ꓮ ꓙꓵꓹ ꓠꓬ꓾ ꓣꓳ ꓐꓹ ꓐ ꓪꓴ-ꓢ ꓔꓯ. ꓦꓻ ꓡꓱ ꓢꓴ ꓐꓴ ꓡꓰ: ꓥ ꓢꓲ꓾ ꓒꓬꓱ: ꓐꓲ ꓠꓲꓹ ꓐꓲ ꓟ ꓞꓳ-ꓡꓱ ꓐꓴ ꓟꓲ꓾ ꓮ ꓟꓬꓹ ꓔꓬ ꓡꓳ= ꓮ ꓘꓶ. ꓗ-ꓛꓲ ꓡꓳ. ꓐꓲ ꓢ ꓡꓰ ꓟ ꓠꓮꓟ-ꓕꓶ ꓬꓲꓻ ꓙꓬ ꓡꓳꓻ ꓟꓲ ꓙꓳ ꓡꓳ= ꓟꓶꓼ ꓘꓶꓼ ꓙꓲꓺꓔꓲ ꓥ ꓟꓲ ꓙꓳ ꓢꓲ꓾ ꓠꓲꓹ ꓫꓵꓹ ꓟ ꓪꓴꓻ ꓜ: ꓪ ꓓ_ ꓟ ꓘꓹ ꓥˍ ꓡꓳ=
ꓠꓮꓟ-ꓕꓶ-ꓘꓴ. ꓘꓹ ꓗꓪ ꓐꓰ ꓪꓴ-ꓢ ꓟꓬꓱ: ꓬꓰ ꓢꓴ꓾ ꓠꓯꓺ ꓞꓲꓼ(Doctor) ꓟꓬꓱ: ꓬꓰ ꓢꓴ꓾ ꓞꓳ-ꓪꓴ: ꓟꓬꓱ: ꓬꓰ ꓢꓴ꓾ ꓢꓲ: ꓒ: ꓟꓬꓱ: ꓬꓰ ꓢꓴ꓾ ꓢꓷ. ꓠꓲꓹ ꓙꓳꓥ: ꓟ. ꓒ ꓟ. ꓟ ꓟꓬꓱ: ꓬꓰ ꓢꓴ꓾ ꓙꓼ-ꓪꓴ.-ꓠꓷ.(Computer) ꓟ. ꓒ ꓟꓬꓱ: ꓬꓰ ꓢꓴ꓾ ꓧꓪ: ꓒꓴ ꓥꓳ: ꓟ. ꓒ ꓟꓬꓱ: ꓬꓰ ꓢꓴ꓾ ꓢꓷ. ꓠꓲꓹ ꓙꓲꓻ-ꓪꓴ.-ꓚꓴ ꓘꓳꓹ ꓟꓶ ꓡꓰ ꓢꓴ ꓐꓰ ꓔ. (10) ꓟ ꓔꓯ. ꓧꓪꓹ ꓡꓰ ꓢꓴ ꓐꓴ ꓮ ꓟꓬꓹ ꓓꓳ ꓔꓬ ꓟ ꓘꓹ ꓓ: ꓟ ꓥˍ ꓡꓳ= ꓓ ꓒ:꓾ ꓢꓷ. ꓒ:꓾ ꓗꓴ. ꓒ: ꓐꓴ ꓮ ꓟꓬꓹ ꓓꓳ ꓔꓬ ꓟ ꓟꓵ:(ꓘꓹ) ꓥˍ ꓢꓲ꓾ ꓙꓲ-ꓒꓶ꓾ ꓬ-ꓒꓲꓹ ꓪꓴ: ꓟ: ꓓ ꓟ ꓙꓵ: ꓗ ꓟꓲ ꓙꓳ ꓠꓬꓲ꓾ ꓮ ꓘꓶ. ꓢꓲ-ꓡꓲ. ꓗ-ꓛꓲ ꓟ ꓟꓵ:(ꓘꓹ) ꓥ ꓡꓳ= (10) ꓔ. ꓙꓳꓥ: ꓥ ꓟꓲ꓾ (1) ꓙꓳꓥ: ꓙꓳ ꓢꓲ꓾ (4) ꓔ. ꓙꓳꓥ: ꓠꓬ꓾ (2) ꓙꓳꓥ: ꓙꓳ ꓡꓳ= ꓢꓲ: ꓒ: ( ꓮ:-ꓢꓳꓹ-ꓬꓼ ) ꓡꓰ: ꓖꓶ ꓔ. ꓟ ꓠꓯꓺ ꓞꓲꓼ ꓟ. ꓟ (2) ꓣꓳ ꓥ ꓟꓲ ꓔꓬ ꓠꓬꓲ꓾ ꓠꓻ ꓓꓴ ꓙꓳ ꓡ ꓟꓲ꓾ ꓙ: ꓫ. ꓟ: ꓛꓲ꓾ ꓠꓻ ꓫꓬꓹ ꓪ ꓓˍ ꓡꓳ=
ꓣꓳ ꓡꓲ-ꓢꓴ ꓔꓬꓹ ꓟ ꓟꓵ: ꓠꓮꓟ-ꓕꓶ-ꓘꓴ. ꓘꓹ ꓗꓪ ꓠꓬ꓾ ꓟꓴ:-ꓗꓴ. ꓬꓲꓻ-ꓡꓴ-ꓐꓱ( တိမ်ပင်လယ် ) ꓟꓲ ꓙꓳ ꓢꓲ꓾ ꓮ ꓘꓶ. ꓠꓲꓹ ꓢ ꓗ- ꓛꓲ ꓟ ꓟꓵ: (ꓘꓹ) ꓥ ꓡꓳ= ꓢꓲ: ꓒ: ( ꓮ:-ꓢꓳꓹ-ꓬꓼ ) ꓡꓰ: ꓔꓯꓺ ꓧꓪꓹ ꓚꓱꓹ(Phone Line) ꓮ ꓟꓶ ꓗꓪ ꓛꓲ ꓟ: ꓫꓬꓹ ꓖꓶ ꓡ ꓢꓰ ꓠꓬꓲ꓾ ꓔꓯꓺ ꓧꓪꓹ ꓠꓬ꓾ ꓕꓱ ꓟ: ꓙꓲ ꓢꓰ= ꓮ-ꓔꓳꓹ ꓟꓲ꓾ ꓟ: ꓖꓶ ꓡ ꓢꓰ ꓐꓯ ꓟꓲ꓾ ꓚꓲ-ꓛꓬ ꓮ-ꓙꓬ ꓙꓼ ꓗꓪ ꓐꓰ (24) ꓙꓵꓹ ꓐꓬꓱ ꓡꓱꓼ ꓡꓱꓼ ꓡꓯ: ꓔꓬꓹ ꓟ ꓣꓳ ꓡꓲ-ꓢꓴ ꓘꓹ ꓓ: ꓟ ꓥˍ ꓡꓳ= ꓕꓲ ꓟꓵ: ꓡꓲ. ꓕꓲ ꓟꓵ: ꓗꓪ ꓔꓬ ꓟ ꓣꓳ ꓡꓲ-ꓢꓴ ꓫꓵ: ꓐꓴꓳ꓾ ꓖ-ꓟꓶ-ꓓꓰ ꓟꓵ: ꓗꓪ ꓚꓳ ꓗꓹ ꓡ ꓠꓬ꓾ ꓣꓳ ꓡꓲ-ꓢꓴ ꓮ ꓟꓬꓹ ꓔꓬ ꓟ꓾ ꓠꓮꓟ-ꓕꓶ-ꓘꓴ. ꓘꓹ ꓗꓪ ꓚꓳ ꓗꓹ ꓙꓰ ꓡꓯ=