ꓕꓮꓲ ꓟꓵꓽ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓟꓬ-ꓟ ꓤ ꓟꓶꓼ ꓕꓲ ꓣꓳ ꓔꓯ ꓓꓶꓽ ꓠꓬꓲ꓾ ꓜꓲ ꓜꓲ ꓑꓰꓹ ꓑꓰꓹ ꓠꓶꓸ꓾ ꓠꓶꓸ ꓓꓳ ꓡꓰ ꓠꓬ ꓬꓲ ꓙꓬ ꓗꓪ ꓔꓲꓹ ꓢꓲꓸ ꓢꓰꓼ ꓢꓴ ꓔꓯ ꓕꓮꓲ ꓑꓳꓑꓡꓲꓚꓰ ꓡꓰ ꓞꓳꓹ ꓪ ꓡꓰꓳ ꓐꓰ ꓐꓮꓠꓖꓗꓳꓗ ꓑꓳꓢꓔ ꓗꓪ ꓐꓳ ꓔ ꓡꓳ
ꓟꓬ-ꓟ ꓗꓴꓷꓼ ꓗꓪ ꓐꓰ ꓡ ꓢꓴ ꓤ ꓟꓶꓼ ꓤ꓾ 21 ꓘꓳꓼ ꓙꓳ ꓢꓴ ꓔꓯ ꓢꓰꓼ ꓢꓴ ꓥꓳ ꓐꓯ ꓢꓲ꓾ 2021 ꓘꓳꓼ 11 ꓦ 18 ꓠꓬꓲ ꓕꓯ ꓮ ꓔꓳꓸ ꓚꓱꓹ ꓟꓬꓱꓽ ꓬꓰ ꓢꓴ꓾ 27 ꓘꓳꓼ ꓙꓳ ꓟ ꓐꓳ-ꓡꓮꓲ ꓟꓬꓱꓺ ꓔꓸ ꓢꓴ ꓕꓮꓲ ꓒꓽ ꓕꓲ ꓣꓳ ꓔꓯ ꓞꓳꓹ ꓟꓶ ꓡꓰ ꓟ ꓥ ꓡꓳ=
11 ꓦ 14 ꓠꓬꓲ ꓕꓯ ꓜꓲ ꓜꓲ ꓑꓰꓹ ꓑꓰꓹ ꓠꓶꓸ ꓗꓷ ꓟ ꓥ ꓢꓲ꓾ ꓝꓮꓲ ꓬꓲ ꓙꓬ ꓗꓪ ꓔꓲꓹ ꓫꓵꓻ ꓝꓲ꓾ ꓝꓮꓲ ꓠꓬ ꓬꓲꓸ ꓖꓳ ꓓꓱꓽ ꓔꓯ ꓚꓹ ꓟꓼ ꓪ ꓡꓰ ꓠꓹ ꓟ ꓮ ꓔꓳꓸ ꓛꓴ ꓬꓲ ꓬꓰ ꓗꓷꓳ ꓐꓰ꓾ ꓐꓳ-ꓡꓮꓲ ꓡꓰ ꓟꓯꓼ ꓐꓴ ꓔꓯ ꓐꓯ ꓟꓳꓸ ꓖꓶ ꓓꓳ ꓡ ꓡꓳ=
“ꓦꓲ ꓗꓪ ꓐꓰ ꓟꓽ ꓓ ꓟꓽ ꓢ ꓧꓳꓽ ꓓꓳ ꓡ ꓢꓲ꓾ ꓠꓶꓸ ꓗꓷ ꓡꓳ= ꓖꓳ ꓗꓸ ꓠꓯꓸ ꓮꓸ ꓠꓽ ꓡꓴ ꓢꓯꓼ ꓑ ꓙ ꓡ ꓠꓬꓲ꓾ ꓬꓲ ꓙꓬ ꓐꓱ ꓗꓪ ꓠꓬꓲꓽ ꓣꓳ ꓡꓱꓸꓼ ꓔꓶꓹ ꓓꓵꓽ ꓡꓰ ꓠꓬ ꓬꓲ ꓙꓬ ꓢꓸ ꓟꓽ ꓗꓴꓸ ꓠꓬꓲ ꓬꓲꓸ ꓠꓬ ꓫꓵꓻꓳ= ꓝꓮꓲ ꓫꓵꓻ ꓟꓳ ꓖꓳ ꓟ ꓔꓯ ꓟꓳ ꓓꓳ ꓛꓲ ꓪꓳꓽ ꓐꓰ ꓕꓲ ꓛꓳ ꓮ ꓔꓳꓸ ꓛꓴ ꓠꓹ ꓟ ꓢꓯꓼ ꓕꓵꓼ ꓗꓷꓳ” ꓐꓰ ꓐꓳ-ꓡꓮꓲꓽ ꓡꓰ ꓐꓯ ꓡꓳ=
ꓬꓲꓸ ꓕꓱ ꓡꓱ ꓬꓰ ꓢꓲꓸ ꓠꓱꓸ ꓐꓯꓼ ꓕꓲ ꓟꓵꓽ ꓗꓪ ꓔꓶꓹ ꓑꓬ ꓙꓰ ꓥ ꓟꓲ꓾ ꓢ ꓘꓪ ꓬꓲꓼ ꓔꓸ ꓟꓽ ꓙ ꓗꓪ ꓛꓲ ꓫꓵꓻ ꓢꓴ ꓦ ꓡꓰ ꓚꓳꓹ ꓡ ꓠꓬꓲ꓾ ꓬꓲꓸ ꓟꓶꓽ ꓗꓪ ꓠꓬ ꓫꓵꓻ ꓢꓴ ꓬꓲꓸ ꓮ ꓙꓲꓸ ꓔꓯ ꓩꓴꓸ ꓗꓪ ꓐꓰ ꓕꓱ ꓢꓲꓸ ꓣꓷꓠꓸ ꓓꓳ ꓡ ꓟ ꓥ ꓡꓳ= ꓖꓳ ꓟ ꓗꓪ ꓐꓰ ꓟꓯꓼ ꓑꓳꓡꓲꓚꓰ ꓐꓴ ꓡꓰ ꓣꓴ ꓟꓶ ꓡꓰ ꓟ ꓥꓳ ꓐꓳ ꓔ ꓡꓳ=