ꓕꓮꓲ ꓑꓳꓡꓲꓚꓰ ꓟꓯꓼ ꓜꓲꓽ ꓙꓳ-ꓩ-ꓣ-ꓣꓲ (Jo Ferrari) ꓡꓰ ꓬꓯ ꓒꓴ ꓶ ꓡꓯꓼ ꓬꓰ ꓢꓴ ꓗꓶ ꓕꓴꓸ ꓒꓴ ꓒ ꓛꓲ ꓒ ꓡꓳꓼ ꓟꓽ ꓖꓶ ꓡ ꓠꓬꓲ꓾ ꓫꓸ ꓟꓴ ꓫꓬꓸ ꓚꓬ ꓬꓰ ꓢꓲꓸ ꓢꓰꓼ ꓗꓷ ꓟ ꓗꓸ ꓚꓵ ꓦꓲꓓꓰꓳ ꓠꓬ 2021 ꓘꓳꓼ 8 ꓦ 24 ꓠꓬꓲ ꓕꓯ ꓓꓳ ꓡ ꓟ ꓑꓶꓸ ꓓꓴ ꓞꓳ ꓤ ꓢꓰꓼ ꓢꓴ ꓑꓳꓡꓲꓚꓰ ꓐꓴ ꓔꓯ ꓞꓳꓹ ꓣꓴ ꓠꓹ ꓟ ꓬꓲꓸ ꓞ ꓬꓲꓸ ꓒꓴꓽ ꓧꓪ ꓔꓬ ꓡꓳ= ꓓꓳꓽ ꓕꓱ ꓟ ꓚꓺ ꓟꓲꓽ ꓮ ꓟꓶ ꓗꓪ ꓛꓲ ꓢꓷꓸ ꓪ ꓟ ꓠꓬ ꓕꓱ ꓡꓱ ꓥꓳ= ꓕꓮꓲ ꓟꓵꓽ ꓗꓪ ꓬꓯꓻ ꓒꓴ ꓪꓴꓽ ꓢꓴ ꓦꓲ ꓢꓲ ꓒꓽ ꓦꓲ ꓢꓲ ꓟ ꓠꓬꓲꓽ ꓫꓵꓸ ꓔꓯ ꓕꓮꓲ ꓑꓳꓡꓲꓚꓰ ꓐꓴ ꓡꓰ ꓣꓴ ꓟꓶ ꓡꓰꓳ= ꓖꓳ ꓕꓯ ꓑꓳꓡꓲꓚꓰ ꓙꓵꓽ ꓦꓲ ꓗꓪ ꓧꓳꓽ ꓙꓰ ꓢꓲ꓾ ꓗꓶꓽ ꓕꓴꓸ ꓒꓴ ꓕꓮꓲ ꓐꓼ 200000 (2 ꓢꓯꓹ ꓐꓼ) ꓖꓶꓽ ꓡ ꓠꓬ ꓡꓲꓹ ꓖꓶꓽ ꓓꓴ ꓥꓳ ꓐꓰ ꓑꓳꓡꓲꓚꓰ ꓟꓯꓼ ꓜꓲꓽ ꓡꓰ ꓐꓯ ꓡꓳ= ꓖꓳ ꓕꓯ ꓬꓯꓻ ꓒꓴ ꓪꓴꓽ ꓒꓽ ꓠꓬ ꓒꓴ ꓖꓳ ꓟꓬ ꓟꓽ ꓙꓳ ꓠꓬꓲ꓾ 100000 ꓐꓼ (1 ꓢꓯꓹ ꓐꓼ) ꓠꓬ ꓖꓶꓽ ꓓꓴ ꓥꓳ ꓐꓰ ꓖꓶ ꓬꓲꓽ ꓢꓲꓸ ꓐꓯ ꓡꓳ= ꓑꓳꓡꓲꓚꓰ ꓟꓯꓼ ꓜꓲꓽ ꓓꓽ ꓟ ꓬꓲꓸ ꓓꓰꓽˍ ꓟ ꓔꓯ ꓒ ꓛꓲ ꓒ ꓡꓳꓼ ꓟꓽ ꓖꓶꓽ ꓡ ꓠꓬꓲ꓾ ꓬꓯ ꓒꓴ ꓪꓴꓽ ꓒꓽ ꓔꓯ ꓪꓴꓸ ꓓꓵ ꓗꓪ ꓑꓶ-ꓡꓼ-ꓢꓲ-ꓔꓲꓼ ꓞꓴꓸ ꓓꓴ ꓞꓴꓸ ꓢꓲꓸ ꓫꓸ ꓟꓴ ꓫꓸ ꓚꓬ ꓬꓰ ꓗꓷ ꓠꓬ ꓢꓯꓼ ꓦ ꓟꓽ ꓓ ꓠꓬꓲ ꓫꓵꓻꓳ= ꓖꓳ ꓕꓯ ꓑꓳꓡꓲꓚꓰ ꓟꓯꓼ ꓜꓲꓽ ꓡꓰ ꓫꓵꓻ ꓟꓳ ꓖꓳ ꓟ ꓔꓯ ꓬꓲꓸ ꓢꓷꓸ ꓟ ꓠꓯ ꓞꓲꓼ ꓦꓲ ꓕꓲ ꓟ ꓗꓪ ꓔꓯꓹ ꓓꓵꓽ ꓙꓰ ꓢꓲ꓾ ꓬꓯ ꓒꓴ ꓕꓴꓸ ꓟꓬꓽ ꓡꓰ ꓠꓬꓲ ꓫꓵꓻꓳ ꓐꓰ ꓠꓯ ꓞꓲꓼ ꓟꓸ ꓒ ꓐꓴ ꓔꓯ ꓞꓳ ꓤ ꓫꓵꓻ ꓕꓳ ꓶ ꓐꓳ ꓝꓲ ꓡꓳ= ꓝꓮꓲ ꓬꓲꓸ ꓟꓯꓼ ꓐꓴ ꓔꓯ ꓚꓚꓔꓦ ꓗꓪ ꓟ ꓐꓬꓱꓽ ꓥ ꓟꓲ ꓮ ꓙꓵꓽ ꓒꓬꓹ ꓩꓴ ꓝꓲ ꓡꓳ= ꓖꓳ ꓡꓱ ꓥ ꓟꓲ ꓖꓳ ꓗꓪ ꓐꓰ ꓕꓲ ꓣꓳ ꓠꓬ꓾ ꓮ ꓟꓶ ꓕꓱ ꓗꓪ ꓟꓳꓸ ꓖꓶ ꓔꓸ ꓟ ꓚꓚꓔꓦ ꓔꓯ ꓣꓴ ꓔꓸ ꓢꓲ꓾ ꓐꓯ ꓟꓴ ꓒꓽ ꓕꓲ ꓣꓳ ꓔꓯ ꓡꓯꓼ ꓙꓱ ꓗꓷꓳ= ꓫꓵꓽ ꓕꓱ ꓢꓴ ꓐꓯ ꓟꓴ ꓒꓽ ꓖꓳ ꓟ ꓡꓰ ꓕꓱ ꓟ ꓔꓯ ꓢꓳꓚꓲꓮꓡ ꓟꓰꓓꓲꓮ ꓗꓪ ꓟꓳꓸ ꓖꓶ ꓩꓴ ꓡ ꓟ ꓗꓪ ꓐꓰ꓾ ꓗꓴꓷꓼ ꓙꓵꓽ ꓜꓴ ꓐꓴ ꓢꓷꓸ ꓡꓰ ꓠꓬꓲ꓾ ꓮ ꓟꓶ ꓠꓬ ꓑꓳꓡꓲꓚꓰ ꓟꓯꓼ ꓜꓲꓽ ꓐꓰ ꓬꓲꓸ ꓛꓳ ꓒꓯꓹ ꓐꓴ ꓔꓯ ꓕꓮꓲ ꓟꓯꓼ ꓡꓰ ꓧꓪ ꓟꓰꓹ ꓔꓬ ꓡꓳ= ꓑꓳꓡꓲꓚꓰ ꓟꓯꓼ ꓜꓲꓽ ꓖꓳ ꓟ ꓠꓬ ꓦꓲ ꓓꓽ ꓟ ꓙꓳ ꓢꓴ꓾ ꓟꓳ ꓓꓳ ꓮ ꓟꓬꓹ ꓙꓳ ꓢꓴ ꓞꓳ ꓐꓳ ꓞꓳ ꓬꓲꓼ ꓕꓲ ꓣꓳ ꓥ ꓡꓳ ꓐꓰ ꓕꓮꓲ ꓟꓵꓽ ꓫꓵꓽ ꓓꓳꓽ ꓗꓪ ꓐꓳ ꓒꓬꓱ ꓔꓬ ꓡꓳ=ꓞꓳ ꓤ ꓕꓱ ꓕꓲ ꓫꓵꓽ ꓦꓯꓸ ꓠꓲꓹ ꓙꓵꓽ ꓟ ꓔꓯ ꓙꓵꓽ ꓟꓽ ꓘꓴ ꓟ ꓗꓪ ꓐꓰ ꓙꓵꓽ ꓗ ꓔꓯ ꓟꓽ ꓛꓳ꓾ ꓥꓶꓸ ꓟ ꓮ ꓟꓬꓹ ꓬꓰ ꓓꓳ ꓡ ꓡꓳ ꓐꓰ ꓟꓳꓸ ꓖꓶ ꓔꓬ ꓡꓳ= ꓙꓵꓽ ꓪ ꓙꓳ ꓢꓴ ꓠꓽ ꓔꓱꓹ ꓚꓵ ꓟ ꓗꓪ ꓟꓽ ꓦꓰꓼ ꓕꓶ ꓞ ꓠꓬ꓾ ꓓꓵ ꓙ ꓟꓽ ꓗꓴꓸ ꓗꓪ ꓛꓲ ꓥꓶꓸ ꓟ ꓬꓰ ꓓꓳ ꓡ ꓟ ꓟꓳꓸ ꓖꓶ ꓓꓴ ꓒꓬꓱꓼ ꓡ ꓡꓳ=
ꓕꓮꓲ ꓑꓳꓡꓲꓚꓰ ꓟꓯꓼ ꓜꓲꓽ ꓙꓳ-ꓩ-ꓣ-ꓣꓲ (ꓙꓳ ꓝꓰꓣꓣꓮꓣꓲ) ꓐꓰ ꓬꓲꓸ ꓟꓯꓼ ꓐꓴ ꓡꓰ ꓬꓯ ꓒꓴ ꓶ ꓡꓯꓼ ꓬꓰ ꓢꓴ ꓔꓯ ꓚꓲꓸ ꓚ ꓢꓲꓸ ꓢꓰꓼ ꓔꓬ ꓟ ꓢꓯꓸ ꓐꓬꓱꓽ