ꓓ-ꓗ ꓗꓪ ꓧ-ꓢꓲ-ꓠ ꓔꓯ ꓒꓳꓹ ꓔꓳꓹ ꓔꓬ

ꓐꓲ-ꓖ-ꓡ-ꓓꓯ-ꓫꓵ ꓗꓴꓷꓼ ꓓ-ꓗ ꓡꓳ ꓒꓱ ꓗꓪ 2022 ꓘꓳꓼ 12 ꓦ 11 ꓠꓬꓲ ꓕꓯꓽ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓧ-ꓢꓲ-ꓠ ꓔꓯ ꓞꓳ ꓜꓴ ꓞꓳ ꓟꓯꓼ ꓜꓲꓼ ꓢꓲꓸ ꓒꓳꓹ ꓔꓳꓹˍ ꓡꓳ꓿

ꓕꓱ ꓟ ꓔꓯ Bengladesh Nationalist Party (BNP) ꓡꓰ ꓧꓳꓽ ꓪꓴꓸ ꓟꓴ ꓟ ꓥ ꓢꓲ꓾ ꓗꓴꓷꓼ ꓘꓴꓽ ꓗꓪ ꓙꓼ ꓞꓶ ꓐꓰ ꓶ ꓤ ꓶ ꓟꓲ ꓒꓵꓽ ꓠꓯꓸ ꓡ ꓔꓬ ꓟ ꓔꓯ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓠꓬ ꓗꓽ ꓔꓸ ꓟꓽ ꓐ ꓡ ꓐꓯ ꓢꓲꓸ ꓕꓼ ꓔꓬ ꓟ ꓥ ꓡꓳ꓿

ꓖꓳ ꓟ ꓑꓶꓸ ꓓꓴ ꓗꓴꓷꓼ ꓙꓵꓽ ꓪ ꓐꓱ ꓶ ꓢꓲꓻ ꓣꓴ ꓑꓮꓲ ꓠꓲꓹ ꓞ ꓬꓰ ꓖꓶ ꓡꓯ ꓐꓰ ꓓꓰꓽ ꓔꓬ ꓡꓳ꓿ 2023 ꓘꓳꓼ ꓗꓪ ꓢꓲꓻ ꓣꓴ ꓑꓮꓲ ꓬꓰ ꓓꓴ ꓬꓲꓸ ꓙꓵꓹ ꓠꓶꓽ ꓡ ꓥ ꓟꓲ꓾ ꓢꓲꓻ ꓣꓴ ꓗꓳ-ꓟꓲ-ꓫꓲ ꓗꓪ ꓐꓰ ꓬꓲꓸ ꓙꓵꓹ ꓬꓲꓸ ꓦꓬꓼ ꓠꓬꓲ ꓟꓽ ꓔꓶꓺ ꓩꓴ ꓡ ꓢꓰꓽ꓿

ꓗꓴꓷꓼ ꓟꓬꓱꓽ ꓢꓲꓺ ꓧ-ꓢꓲ-ꓠ ꓡꓰ ꓒꓳꓹ ꓔꓳꓹ ꓢꓴ ꓐꓴ ꓔꓯ “ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰ ꓢꓴ ꓐꓴ” ꓐꓰ ꓕꓼ ꓩꓴ ꓡ ꓢꓲ. “ꓑ ꓫꓬ ꓐꓴꓳ꓾ ꓕꓱ ꓕꓲ ꓜꓴ ꓔꓯ ꓙꓵꓽ ꓪ ꓟꓽ ꓖꓶ ꓪ ꓡꓰ ꓠꓹ ꓟ ꓤ ꓟꓳ ꓓꓴ ꓬꓰ” ꓐꓰ ꓐꓯˍ ꓡꓳ꓿

ꓐꓠꓑ ꓑ-ꓔꓲ ꓟꓬꓱꓽ ꓢꓲ ꓓꓽ ꓟ Mirza Alamgir ꓐꓰ ꓑ-ꓔꓲ ꓗꓪ ꓟ ꓧꓳꓽ ꓪꓴꓸ ꓟꓴ ꓢꓴ 2 ꓣꓳ ꓔꓯ ꓣꓴ ꓔꓸ ꓢꓲꓸ ꓬꓲꓸ ꓪ ꓔꓯ ꓐꓯ ꓟꓴ ꓕꓱ ꓓꓴ ꓥꓳ ꓐꓯˍ ꓡꓳ꓿

12 ꓦ 7 ꓠꓬꓲ ꓗꓪˍ ꓟꓲ ꓢꓴꓩ ꓓꓴ ꓙꓳ ꓡ ꓢꓲ꓾ ꓡ ꓞꓳ 1 ꓣꓳ ꓫꓵꓻꓳ ꓐꓰ ꓐꓲ-ꓖ-ꓡ-ꓓꓯ-ꓫꓵ ꓓꓳꓽ ꓐꓯ ꓒꓬꓱ ꓢꓲꓽ ꓒ Hasan Mahmud ꓡꓰ ꓐꓯ ꓡꓳ꓿

ꓐꓲ-ꓖ-ꓡ-ꓓꓯ-ꓫꓵ ꓠꓬ ꓢꓷꓸ ꓠꓲꓹ ꓚꓱꓹ ꓗꓪ ꓠꓴ-ꓗ-ꓡꓲ-ꓬ ꓮ ꓔꓳꓸ ꓙꓼ ꓦꓲ ꓫꓬꓹ ꓔꓬ ꓡꓳ ꓐꓯ ꓥ ꓟꓲ꓾ ꓑ ꓫꓬ ꓐꓴ ꓠꓬ ꓫꓸ ꓢꓴ ꓮ ꓟꓬꓹ ꓔꓬ ꓟ ꓑꓶꓸ ꓓꓴ ꓶ ꓤ ꓶ ꓟꓲ ꓒꓵꓽ ꓓꓯꓻ ꓡ ꓕꓯꓽ ꓠꓲꓹ ꓢꓲꓼ ꓢꓴ ꓟꓬꓽ ꓡ ꓟ ꓥ ꓡꓳ꓿