ꓗꓳꓸ ꓗꓷ ꓟ ꓠꓽ ꓕꓲꓽ ꓠꓬꓲ ꓗꓪ ꓴꓢꓮ ꓗꓴꓷꓼ ꓪꓴꓸ ꓓꓵ ꓡꓵꓺ ꓓꓳ-ꓠꓯ-ꓕ-ꓣꓼ ꓦꓲ ꓗꓪ ꓝꓐꓲ ꓟꓯꓼ ꓐꓴ ꓧꓪ ꓟꓰꓹ ꓗꓷ ꓕꓯꓽ ꓗꓴꓷꓼ ꓚꓵꓺ ꓘꓶꓽ ꓕꓳ ꓶ 11 ꓚꓳꓸ ꓡꓲꓸ ꓟꓶꓳ꓾ ꓐꓰ 2022 ꓘꓳꓼ 8 ꓦ 12 ꓠꓬꓲ ꓕꓯꓽ ꓝꓐꓲ ꓡꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓕꓱ ꓡꓱ ꓧꓪ ꓟꓰꓹ ꓟ ꓔꓯ ꓴꓢꓮ ꓗꓴꓷꓼ ꓙꓵꓽ ꓜꓴ ꓐꓯ ꓟꓴ ꓒꓽ ꓪꓴꓸ ꓓꓵ ꓣꓱꓽ ꓢꓴ Merrick Garland ꓡꓰ ꓥ ꓟꓲ ꓓꓽ ꓔꓳꓹ ꓔꓸ ꓡꓳ꓿ “ꓕꓱ ꓡꓱ ꓧꓪ ꓟꓰꓹ ꓟ ꓔꓯ ꓐꓯ ꓟꓴ ꓚꓱꓹ ꓡꓳ ꓚ ꓜꓲ ꓜꓲ ꓟꓴ ꓟꓴ ꓬꓰ ꓗꓷ ꓟ ꓥ ꓡꓳ꓿ ꓮ ꓔꓳ ꓔꓳ ꓟꓽ ꓬꓰ ꓔꓸ” ꓐꓰ ꓐꓯ ꓡꓳ꓿
ꓗꓴꓷꓼ ꓪꓴꓸ ꓓꓵ ꓬꓰˍ ꓟ ꓦꓬꓼ ꓠꓬꓲ ꓗꓪ ꓟ ꓕꓳ ꓶ ꓗꓪ ꓐꓰ ꓮ ꓙꓵꓽ ꓢꓴ ꓢꓷꓸ ꓙꓲꓽ ꓟꓽ ꓙꓳˍ ꓟ ꓚꓵꓺ ꓘꓶꓽ ꓕꓳ ꓶ ꓔꓯ ꓗꓴꓷꓼ ꓚꓺ ꓟꓲꓽ ꓫꓺ ꓔꓶꓸ ꓗꓪ ꓫꓺ ꓠꓹ ꓟ ꓥ ꓢꓲ꓾ ꓮ ꓟꓶ ꓣꓴ ꓟꓶ ꓟ 11 ꓚꓳꓸ ꓔꓯ ꓖꓳ ꓗꓪ ꓫꓺ ꓔꓸ ꓠꓹ ꓟ ꓬꓰ ꓔꓬ ꓡꓳ꓿
ꓝꓮꓲ ꓝꓐꓲ ꓡꓰ ꓡꓯ ꓫꓵꓺ ꓚꓲꓸ ꓚ ꓔꓬ ꓟ ꓑꓶꓸ ꓓꓴ ꓮ ꓡꓲꓳ ꓫꓵꓽ ꓝꓴꓲꓸ ꓧꓪ ꓓꓳ ꓡ ꓟꓽ ꓢꓷꓸ ꓐꓰ ꓢꓰꓸ ꓮꓽ ꓢꓸ ꓓꓴ ꓙꓳ ꓡꓳ꓿ ꓓꓳ-ꓠꓯ-ꓕ-ꓣꓼ ꓡꓰ꓾ “ꓳ-ꓐ-ꓟꓹ ꓦꓬꓼ ꓠꓬꓲ ꓗꓪ ꓖꓶ ꓖꓳ ꓡꓱ ꓔꓯꓹ ꓙꓰˍ ꓟ ꓙꓳˍ ꓡꓳ” ꓐꓰ ꓐꓯ ꓔꓸ ꓥ ꓟꓲ꓾ ꓗꓴꓷꓼ ꓚꓺ ꓟꓲꓽ ꓚꓲꓸ ꓟꓶ ꓓꓴ ꓫꓺ ꓜꓴ ꓗꓪ ꓐꓰ “ꓖꓳ ꓡꓱꓳ ꓫꓵꓽ ꓟꓽ ꓙꓳ꓾ ꓫꓺ ꓙꓲꓽ ꓙꓳˍ ꓟ ꓮ ꓙꓵꓽ ꓫꓺ ꓔꓸꓳ” ꓐꓰ ꓡꓯꓽ ꓔꓯꓽ ꓡꓽ ꓔꓸ ꓡꓳ꓿
ꓴꓢꓮ ꓗꓪ ꓓꓰ-ꓟꓳ-ꓗ-ꓬꓯ-ꓔꓲꓼ ꓑ-ꓔꓲ ꓐꓰ꓾ ꓣꓲ-ꓑ-ꓑꓶ-ꓡꓲ-ꓗ ꓑ-ꓔꓲ ꓐꓴ ꓔꓯꓺ ꓡꓯ ꓘꓳ ꓔꓬ ꓟ ꓗꓪ ꓖꓳ ꓑꓳꓸ ꓕ ꓑꓳꓸ ꓝꓴꓲꓸ ꓧꓪ ꓡꓯ ꓘꓳ ꓔꓬ ꓟ ꓥꓳ ꓐꓰ ꓢꓪꓼ ꓢꓴ ꓮ ꓟꓬꓹ ꓙꓳ ꓡꓳ꓿
ꓓꓳ-ꓠꓯ-ꓕ-ꓣꓼ ꓡꓰ ꓴꓢꓮ ꓗꓴꓷꓼ ꓔꓯ ꓧꓳꓽ ꓪꓴꓸ ꓟꓴˍ ꓟ ꓦꓬꓼ ꓠꓬꓲ ꓗꓪ ꓮ ꓟꓶ ꓟ ꓕꓯꓽ ꓢꓲ ꓟꓲ ꓠꓯ ꓗꓴꓷꓼ ꓐꓴ ꓢꓲ ꓡꓲꓹ ꓗꓹ ꓟ ꓕꓲ ꓙꓵꓹ ꓙꓳ ꓗꓷꓳ꓿
ꓴꓢꓮ ꓗꓴꓷꓼ ꓪꓴꓸ ꓓꓵ ꓬꓰ ꓠꓬꓲ ꓢꓴ ꓕꓲ ꓣꓳ ꓦꓲ ꓗꓪ ꓝꓐꓲ ꓡꓰ ꓧꓪ ꓟꓰꓹ ꓠ ꓗ ꓬꓰˍ ꓟ ꓠꓬ ꓴꓢꓮ ꓗꓴꓷꓼ ꓚ ꓟꓲꓽ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓥ ꓡꓳ꓿