Video News

ꓢꓲ-ꓑꓲ-ꓬ ꓟꓬ-ꓟ ꓟꓯꓼ ꓙ ꓔꓯ ꓑꓓꓝ ꓐꓰ ꓗꓲꓮ ꓡꓰ ꓓꓶꓽ ꓧꓪꓸ ꓡꓰꓳ

ꓠꓬꓲꓸ ꓠꓬꓲ 2022 ꓘꓳꓼ 2 ꓦ 1 ꓠꓬꓲ ꓠꓯꓼ 10 ꓙꓵꓹ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓟꓶ-ꓚꓲ-ꓠ — ꓑꓴ-ꓔ-ꓳ ꓙ ꓖꓴ ꓢꓲ-ꓑꓲ-ꓬ ꓘꓹ ꓗꓪ ꓔꓶꓺ ꓔꓸ ꓟ ꓟꓬ-ꓟ ꓟꓯꓼ ꓓꓼ ꓦꓲ ꓔꓯ ꓑꓓꓝ ꓐꓰ ꓗꓲꓮ ꓐꓴ ꓡꓰ ꓓꓶꓽ ꓧꓪꓸ ꓡꓰꓳ ꓐꓰ ꓓꓳꓽ ꓜꓳ ꓡ ꓡꓳ꓿

“ꓳꓸ ꓗꓪ ꓟꓬ-ꓟ ꓟꓯꓼ 20 ꓛꓲ ꓠꓬꓹꓳ ꓫꓵꓽ ꓥꓳ꓿ ꓑꓓꓝ ꓐꓰ ꓗꓲꓮ ꓐꓴ ꓠꓰ ꓠꓯꓼ 10:30 ꓙꓵꓹ ꓗꓪ ꓚꓳꓸ ꓪꓴꓸ ꓔꓴ ꓢꓲꓸ ꓓꓶꓽ ꓗꓷ ꓠꓬ 11 ꓙꓵꓹ ꓛꓲ ꓡ ꓕꓯꓽ ꓓꓶꓽ ꓧꓪꓸ ꓡꓰꓳ꓿ ꓠꓱꓸ ꓐꓯꓼ ꓠꓬ ꓐꓯ ꓟꓸ ꓟꓽ ꓙꓲ ꓢꓰ꓿” ꓐꓰ ꓟꓯꓼ ꓘꓶꓽ ꓗꓪ ꓐꓰ ꓓꓳꓽ ꓜꓳ ꓡ ꓡꓳ꓿ 

ꓟꓬ-ꓟ ꓟꓯꓼ ꓓꓼ ꓦꓲ ꓔꓯ ꓮ ꓔꓳꓸ ꓛꓴ ꓗꓷ ꓟ ꓔꓯ ꓢꓲ-ꓑꓲ-ꓬ ꓘꓹ ꓢꓴ ꓡꓳꓸ ꓟꓳ ꓢꓲ꓾ ꓘꓹ ꓡ ꓞꓳ ꓐꓴ ꓠꓬ ꓟꓯꓼ ꓛꓰꓹ ꓙꓰ ꓔꓬ ꓡꓳ꓿ꓑꓴ-ꓔ-ꓳ — ꓟꓶ-ꓚꓲ-ꓠ ꓙ ꓖꓴ ꓓꓵꓽ ꓓꓳ ꓢꓴ ꓐꓴ ꓥ ꓟꓲ ꓟꓯꓼ ꓘꓶꓽ ꓙꓳˍ ꓟ ꓙ ꓖꓴ ꓗꓪ ꓤ ꓟꓳ ꓓꓴ ꓙꓳ ꓡꓳ ꓐꓰ ꓢꓷꓸ ꓡ ꓡꓳ꓿

ꓡꓴ-ꓫ-ꓬ ꓑꓳꓡꓲꓚꓰ ꓦꓲ ꓔꓯ ꓮ ꓔꓳꓸ ꓛꓴ ꓗꓷꓳ

ꓑꓴ-ꓔ-ꓳ ꓟꓵꓽ꓾ ꓡꓴ-ꓫ-ꓬ ꓑꓳꓡꓲꓚꓰ ꓟꓯꓼ ꓦꓲ ꓔꓯ ꓑꓓꓝ ꓐꓰ꓾ ꓗꓲꓮ ꓟꓯꓼ ꓐꓴ ꓡꓰ ꓠꓬꓲꓸ ꓠꓬꓲ 2022 ꓘꓳꓼ 2 ꓦ 1 ꓠꓬꓲ ꓟꓶ ꓘꓶꓼ ꓕꓯꓽ ꓮ ꓔꓳꓸ ꓛꓴ ꓗꓷꓳ꓿ 

“ꓖꓳ ꓗꓪ ꓟꓬ-ꓟ ꓑꓳꓡꓲꓚꓰ ꓐꓴ ꓠꓬꓹ ꓟꓽ ꓑꓶꓸ ꓢꓲꓸ ꓦꓲ ꓖꓳꓽ ꓛꓹ ꓔꓸ ꓟ ꓢꓲꓹ ꓒꓲꓽ ꓦꓲ ꓕꓲ ꓦꓲ ꓥꓳ꓿ ꓟꓲꓸ ꓟꓲ ꓠꓽ ꓳꓸ ꓟ ꓔꓯ ꓑꓓꓝ ꓐꓴ ꓠꓰ ꓮ ꓔꓳꓸ ꓛꓴ ꓗꓷꓳ꓿” ꓐꓰ ꓡꓴ-ꓫ-ꓬ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿ 

ꓟꓲꓸ ꓟꓲ ꓠꓯꓼ 11 ꓙꓵꓹ ꓗꓪ ꓠꓬ ꓢꓲ-ꓑꓲ-ꓬ ꓟꓯꓼ ꓓꓼ ꓔꓯ ꓥ ꓟꓲ ꓑꓓꓝ ꓐꓰ ꓗꓲꓮ ꓐꓴ ꓡꓰ ꓮ ꓔꓳꓸ ꓛꓴ ꓗꓷꓳ꓿ 

“ꓖꓳ ꓗꓪ ꓠꓬ ꓟꓯꓼ ꓐꓴ ꓔꓬ ꓥ ꓟꓲ ꓔꓷꓹ ꓛꓰꓹ ꓙꓰ ꓐꓶ꓿ ꓦꓲ ꓮ ꓙꓵꓽ ꓛꓴ ꓩꓴ ꓐꓶ” ꓐꓰ ꓞꓳ ꓘꓹ ꓢꓴ ꓡꓰ ꓐꓯ ꓡꓳ꓿

ꓑꓓꓝ ꓐꓰ ꓗꓲꓮ ꓐꓴ ꓠꓬ ꓑꓴ-ꓔ-ꓳ ꓔꓯ ꓢꓲꓸ ꓟꓯꓼ ꓶ ꓤ ꓒ ꓐꓲ꓾ ꓟꓳ-ꓓꓳ ꓗꓪ ꓐꓰ ꓓꓯꓻ ꓡ ꓔꓬ ꓡꓳ ꓐꓰ ꓓꓳꓽ ꓜꓳ ꓛꓲ ꓡ ꓡꓳ꓿