ꓑꓴ-ꓔ-ꓳ ꓟꓵꓽ ꓡ-ꓓꓳ ꓘꓹ ꓗꓪ ꓔꓬ ꓟ ꓤ ꓟꓶꓼ ꓡꓯꓸ ꓤꓼ ꓕꓲ ꓣꓳ ꓩꓴꓸ ꓗꓪ ” ꓠꓴ ꓠꓬ ꓫꓵꓽ ꓩꓴꓸ ꓙꓲ ꓡꓳꓹ ꓬꓰ ꓢꓴ ꓕꓲ ꓣꓳ ꓥꓳ꓿ ꓒꓴ 400 ꓢꓯꓹ ꓠꓴ ꓧꓪꓸ ꓡꓰꓳ” ꓐꓯ ꓡ ꓠꓬꓲ꓾ ꓠꓲꓹ ꓟ ꓙꓳ ꓖꓴ ꓗꓪ ꓟꓽ ꓙꓳ꓾ ꓦꓯꓸ ꓠꓲꓹ ꓙꓲꓽ ꓔꓴ ꓡ ꓡꓳ꓿
ꓒꓴ ꓖꓳ ꓟ ꓣꓴ ꓟꓶ ꓠꓹ ꓟ ꓐꓱ ꓶ Wave Money ꓗꓪ ꓐꓰ ꓒꓴ 9 ꓢꓯꓹ ꓗꓶꓺ ꓖꓶ ꓩꓴ ꓡ ꓠꓹ ꓟ ꓓꓰ: ꓡ ꓕꓯꓽ꓾ “400 ꓢꓯꓹ ꓕꓵꓼ ꓪ ꓠꓹ ꓟ ꓐꓱ ꓶ 9 ꓢꓯꓹ ꓠꓽ ꓮ ꓫꓵꓽ ꓡꓲꓸ ꓐꓯ ꓟꓼ ꓟꓵ꓿ ꓠꓲꓹ ꓞ ꓗꓶ ꓖꓶ ꓩꓴ ꓓꓴ ꓥꓳ” ꓐꓰ ꓓꓵꓽ ꓙ ꓡꓳ꓿ ꓠꓲꓹ ꓞ ꓠꓲꓹ ꓧꓳꓽ ꓙꓲ ꓔꓲꓺ ꓗꓪ ꓔꓷꓹ ꓡ ꓢꓲ꓾ ꓒꓴ 9 ꓢꓯꓹ ꓔꓯ Wave Money ꓗꓪ ꓐꓰ ꓗꓶ ꓖꓶ ꓩꓴ ꓗꓷꓳ꓿
ꓒꓴ ꓗꓶ ꓩꓴ ꓗꓸ ꓠꓯꓸ 400 ꓢꓯꓹ ꓪ ꓓꓴ ꓠꓽ ꓟꓽ ꓥ ꓢꓲ꓾ ꓬꓲ ꓔꓯ ꓫꓸ ꓕꓱ ꓡ ꓟ ꓩꓴꓸ ꓠꓬ ꓑꓲꓸ ꓡꓰꓳ꓿ ꓠꓲꓹ ꓟ ꓠꓬꓹ ꓖꓴ ꓗꓪ ꓟꓽ ꓠꓬꓹ ꓬꓰ꓾ ꓟꓶꓽ ꓜꓲꓽ ꓠꓬꓽ ꓡꓯꓽ ꓗꓷ ꓡꓰꓳ꓿ ꓠꓲꓹ ꓟ ꓠꓻ ꓞꓲꓼ ꓡꓳꓼ ꓬꓰꓳ꓿
“ꓫꓸ ꓠꓬꓲ ꓤꓼ ꓠꓰ ꓮ ꓡꓲ ꓟꓽ ꓬꓰ꓿ ꓬꓲꓸ ꓖꓶ ꓮ ꓫꓵ ꓡꓲꓸ ꓟꓽ ꓢꓷ꓾ ꓦꓯꓸ ꓠꓲꓹ ꓖꓶ ꓙꓲꓽ ꓟ ꓑꓶꓸ ꓓꓴ ꓠꓰ ꓥ ꓠꓯꓸ” ꓐꓰ ꓬꓲ ꓔꓯ ꓢꓷ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
“ꓮꓸ ꓟꓲꓽ ꓔꓯ ꓕꓲ ꓒꓯꓼ ꓡꓲꓸ ꓟꓽ ꓙꓳ꓿ ꓢꓴ ꓚꓸ ꓙꓳꓸ ꓛꓵꓽ ꓦꓹꓳ ꓫꓵꓽ ꓙꓳꓸ ꓙꓳꓽ ꓥ” ꓐꓯ ꓢꓲ ꓥꓴꓻ ꓡꓻꓳ꓿
ꓒꓴ ꓕꓲ ꓒꓯꓼ ꓮ ꓔꓳ ꓔꓳ ꓟꓼ ꓪ ꓡ꓿ “no lunch is free” ꓟꓳꓼ ꓡꓳ ꓜꓻ ꓕꓲꓽ ꓜ ꓡꓲꓸ ꓮ ꓔꓳ ꓟ: ꓜꓽ ꓪ ꓡ ꓐꓰ ꓧꓪ ꓒꓴ ꓒꓽ ꓡꓰ ꓐꓯ ꓚꓰꓼ ꓥ꓿ ꓳꓸ ꓡꓲ ꓖꓶ ꓠꓰ꓾ ꓞꓳ ꓤ ꓟ ꓦꓯꓸ ꓠꓲꓹ ꓙꓲꓽ ꓡ ꓠꓬ ꓙꓲ ꓙꓲ ꓓꓵꓽ ꓙ ꓟꓽ ꓗꓴꓸ ꓬꓰꓳ꓿
ꓒꓴꓺ ꓒꓴꓺ ꓒꓴꓺ
- ꓦꓯꓸ ꓠꓲꓹ ꓙꓲꓽ ꓡ ꓝꓲ ꓟ ꓒꓴ꓿
- ꓗꓶꓸ ꓢꓴ ꓒꓬꓱꓼ ꓡ ꓝꓲ ꓟ ꓒꓴ꓿
- ꓓꓵꓽ ꓙ ꓚꓱꓹ ꓶꓹ ꓡꓵ ꓡꓰ ꓝꓲ ꓟ ꓒꓴ꓿
- ꓠꓲꓹ ꓟ ꓢꓴꓺ ꓡ ꓝꓲ ꓟ ꓒꓴ꓿
- ꓠꓲꓹ ꓟ ꓫꓸ ꓡ ꓝꓲ ꓟ ꓒꓴ꓿
ꓩꓴꓸ ꓣꓱꓽ ꓢꓴ ꓮ ꓟꓬꓹ ꓙꓳ ꓡ ꓟ ꓡꓰ ꓐꓰ꓾ ꓩꓴꓸ ꓗꓪ ꓐꓰ ꓕꓲ ꓝꓸ ꓗꓶꓸ ꓢꓴ ꓮ ꓟꓬꓹ ꓓꓳ ꓡ ꓔꓬ ꓡꓳ꓿ ꓕꓳ ꓶ ꓕꓱ ꓟ ꓠꓬ 2021 ꓘꓳꓼ 10 ꓦ 5 ꓠꓬꓲ ꓕꓯ ꓑꓴ-ꓔ-ꓳ ꓟꓵꓽ ꓗꓪ ꓚꓵ ꓚꓵ ꓒꓬꓱꓼ ꓗꓷ ꓟ ꓔꓯ ꓐꓳ ꓔ ꓡꓳ꓿
ꓢꓷꓸ ꓡꓰ ꓓꓴ꓾ ###ꓠꓴ ꓵꓻ ꓟꓶ ꓠꓬ ꓠꓱꓸ ꓐꓯꓼ ꓢꓴ ꓔꓯˍ ꓟꓲ ꓟꓸ ꓖꓶ꓿ ꓣꓳ ꓕꓲ ꓦꓲ꓾ ꓕꓲ ꓫꓵꓽ ꓕꓲ ꓪꓳꓼ꓾ ꓕꓲ ꓘꓹ ꓡ ꓞꓳ꓾ ꓕꓲ ꓟꓵꓽ ꓞꓳ ꓤ ꓔꓯ ꓟꓸ ꓖꓶ꓿ ꓗꓶꓸ ꓢꓴ ꓐꓴ ꓗꓪ ꓐꓰ ꓗꓽ ꓙ꓿ ꓦꓯꓸ ꓠꓲꓹ ꓙꓲꓽ ꓢꓲꓸ ꓞꓳꓸ ꓡꓰ ꓓꓴ ꓬꓰ ꓓꓴ ꓔꓯ ꓗꓽ ꓙ꓿