2021 ꓘꓳꓼ 9 ꓦ 22 ꓠꓬꓲ ꓦꓬꓼ ꓠꓬꓲ ꓔꓶ ꓔꓸ ꓟ ꓑꓴ-ꓔ-ꓳ ꓟꓵꓽ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ ꓓꓵꓽ ꓙ ꓚꓱꓹ ꓐꓰ꓾ ꓠꓲꓹ ꓡꓶꓽ ꓢꓷ ꓙ ꓟꓴ ꓙ ꓕꓳ ꓶ ꓕꓲ ꓚꓴꓸ ꓓꓳ ꓡ ꓡꓳ꓿
ꓢꓷ ꓙ ꓟꓴ ꓙ ꓕꓳ ꓶ ꓗꓪ ꓬꓲꓸ ꓝꓲꓸ ꓓꓽ ꓟ 6 ꓝꓲꓸ ꓐꓳ ꓔꓸ ꓢꓲ꓾ ꓕꓳ ꓶ ꓖꓳ ꓕꓲ ꓚꓴꓸ ꓠꓬ ꓟꓬ-ꓟ ꓥꓳ꓾ ꓣ-ꓪ ꓥꓳ꓾ ꓙꓲ-ꓒꓳꓼ ꓥꓳ꓾ ꓮ-ꓢ ꓥꓳꓽ ꓐꓰ ꓡꓲ-ꓢꓴ ꓥꓳꓽ ꓗꓪ ꓐꓰ ꓐꓯ ꓒꓬꓱ ꓔꓸ ꓟ ꓥ ꓡꓳ꓿
ꓡꓲ-ꓢꓴ ꓥꓳꓽ ꓗꓪ ꓢꓷ ꓙ ꓟꓴ ꓙ ꓚꓱꓸ ꓕꓱ ꓡꓱ ꓐꓳ ꓔ ꓡꓳ꓿
“1ꓸ ꓗ-ꓛꓲ ꓟꓵꓽ ꓗꓴꓷꓼ ꓟꓬꓱꓽ ꓚꓱꓹ ꓧꓳꓽ ꓪꓴꓸ ꓟꓴ ꓜꓴ ꓥˍ ꓟ KPICT ꓐꓰ꓾ NUG ꓐꓴ ꓠꓲꓹ ꓧꓳꓹ ꓔꓸ ꓟ ꓔꓯ ꓛꓳ ꓢꓲ꓾ ꓗ-ꓛꓲ ꓟꓵꓽ ꓑ ꓫꓬ ꓡꓳꓸ ꓙ ꓗꓽ ꓙ ꓟꓬꓱꓽ ꓔꓯ ꓗꓲꓳ/ꓗꓲꓮ ꓡꓰ ꓧꓳꓽ ꓪꓴꓸ ꓟꓴ_ ꓟ ꓡꓳ ꓚ ꓒ ꓛꓲ ꓒ ꓡꓳꓼ ꓟꓬꓱꓽ ꓬꓰ ꓓꓴ ꓥ ꓡꓳ=
2ꓸ ꓟꓯꓼ ꓢꓰꓼ ꓡꓯ ꓘꓳ ꓶ ꓤꓼ ꓔꓯ ꓦ ꓡꓱ ꓐꓳ ꓢꓲ ꓗꓴꓷꓼ ꓙꓵꓽ ꓪ ꓟꓽ ꓓ ꓟꓽ ꓢ ꓦꓴ ꓣꓴ ꓔꓸ ꓟ ꓟꓯꓼ ꓗꓳ-ꓢꓰ ꓔꓯ ꓓꓶꓽ ꓒꓬꓹ ꓩꓴ ꓠꓹ ꓟ ꓥ ꓡꓳ=
3ꓸ ꓜꓲꓽ ꓜꓲꓽ ꓑꓰꓹ ꓑꓰꓹ ꓟꓯꓼ ꓙꓵꓽ ꓚꓱꓹ ꓕꓱ ꓟ ꓟꓶꓽ ꓬꓰ ꓗꓪ ꓛꓲ ꓓꓶꓽ ꓔꓳꓹ ꓡꓯ ꓘꓳ ꓓꓴ ꓥ ꓢꓲ꓾ ꓑ ꓫꓬ ꓐꓴ ꓢꓯꓼ ꓟꓬ ꓐꓰ ꓖꓴꓽ ꓙꓴ ꓔꓯ ꓢꓯꓼ ꓟꓬ ꓑ ꓢꓲꓸ ꓡꓳꓸ ꓙ ꓗꓽ ꓙ ꓓꓴ ꓥ ꓡꓳ=
4ꓸ ꓥꓪ ꓠꓴ ꓟꓯꓼ ꓜꓴ ꓠꓬ ꓑ ꓫꓬ ꓐꓴ ꓗꓪ ꓐꓰ ꓦꓵ ꓓꓳ ꓡˍ ꓟ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ ꓥ ꓡꓳ=
5ꓸ ꓟꓯꓼ ꓙꓵꓽ ꓚꓱꓹ ꓔꓯ ꓓꓶꓽ ꓧꓪꓸ ꓡꓰ ꓗꓸ ꓠꓯꓸ ꓗꓴꓷꓼ ꓟꓬꓱꓽ ꓙ ꓖꓴ ꓚꓱꓹ ꓥ ꓟ ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ ꓗꓴꓷꓼ ꓙꓵꓽ ꓚꓱꓹ ꓫꓬꓹ ꓜꓶ_ ꓟ ꓗꓪ ꓗꓑꓲꓚꓔ ꓧꓳꓽ ꓪꓴꓸ ꓟꓴˍ ꓟ ꓡꓳ ꓚ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ ꓗꓪ ꓟꓬꓱꓽ ꓬꓰ ꓝꓸ ꓙꓰ ꓓꓴ ꓥ ꓡꓳ=
6ꓸ ꓝꓯ-ꓓ-ꓬꓯ ꓓꓰ-ꓟꓳ-ꓗꓯ-ꓢꓰ ꓗꓴꓷꓼ ꓙꓵꓽ ꓚꓱꓹ ꓟꓶ ꓡꓰ ꓠꓹ ꓟ ꓑꓴ-ꓔ-ꓳ ꓑꓓꓝ ꓠꓬ ꓞꓳ ꓫꓵꓽ/ ꓦ ꓡꓱ ꓚꓱꓹ ꓟꓽ ꓒꓯꓽ ꓟꓬꓱꓽ ꓬꓰ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ ꓑꓴ-ꓔ-ꓳ ꓑꓓꓝ ꓗꓪ ꓓꓵꓽ ꓡ ꓢꓲ ꓟꓬꓱꓽ ꓬꓰ ꓡ ꓠꓹ ꓟ ꓪꓴꓸ ꓡꓯ ꓘꓳ ꓩꓴ ꓡ ꓥꓳ=
ꓑꓴ-ꓔ-ꓳ ꓟꓵꓽ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ”
- ꓗꓑꓲꓚꓔ ꓠꓬ꓾ Kachin Political Interim Coordination Team ꓐꓯ ꓡꓳ꓿ “ꓗ-ꓛꓲ ꓟꓵꓽ ꓗꓴꓷꓼ ꓟꓬꓱꓽ ꓔꓯ ꓗꓪꓽ ꓫꓵꓽ ꓟ꓾ ꓠꓬꓲꓽ ꓗꓴꓸ ꓚꓸ ꓟ ꓦꓬꓼ ꓠꓬꓲ ꓗꓪ ꓖꓪ ꓙꓱ ꓧꓳꓽ ꓙ ꓜꓴ” ꓐꓰ ꓡꓲ-ꓢꓴ ꓥꓳꓽ ꓗꓪ ꓡꓶꓸ ꓣꓴ ꓓ ꓡꓳ꓿
- ꓠꓴꓖ ꓠꓬ꓾ National Unity Government ꓥ ꓡꓳ꓿ “ꓗꓴꓷꓼ ꓚꓰ ꓡ ꓞꓳ ꓠꓲꓹ ꓧꓳꓹ ꓢꓲꓽ ꓧꓳꓹ ꓟ ꓗꓴꓷꓼ ꓙꓵꓽ ꓜꓴ” ꓥꓳ꓿
- ꓑꓓꓝ ꓠꓬ꓾ People Defense Force ꓥ ꓢꓲ꓾ “ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ” ꓔꓯ ꓖꓴˍ ꓡꓳ꓿
- ꓗꓲꓳ/ꓗꓲꓮ ꓠꓬ꓾ Kachin Independence Organization/ Kachin Independence Army ꓥ ꓡꓳ꓿ ꓗ-ꓛꓲ ꓟꓵꓽ ꓡꓲꓹ ꓙꓰ ꓜꓴ/ ꓗ-ꓛꓲ ꓟꓵꓽ ꓡꓲꓹ ꓙꓰ ꓜꓴ ꓟꓯꓼ ꓥ ꓡꓳ꓿ ꓢꓴ ꓡꓰ ꓙꓵꓽ ꓗꓪꓼ ꓡ ꓟ ꓗꓪ ꓐꓰ ꓡꓲꓹ ꓙꓰ ꓢꓲ꓾ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ ꓠꓹ ꓟ 1961 ꓘꓳꓼ 2 ꓦ 5 ꓠꓬꓲ ꓕꓯ ꓪꓴꓸ ꓔꓴ ꓔꓸ ꓟ ꓜꓴ ꓥ ꓡꓳ꓿
- Putao PDF ꓠꓬ ꓑꓴ-ꓔ-ꓳ ꓟꓵꓽ ꓑ ꓫꓬ ꓡꓳꓸ ꓙ ꓗꓽ ꓙ ꓟꓯꓼ ꓥ ꓡꓳ꓿ 2021 ꓘꓳꓼ ꓕꓯ ꓒꓴ ꓔꓸ ꓟ꓾ ꓑ ꓫꓬ ꓙꓵꓽ ꓪ ꓦꓴ ꓟꓯꓼ ꓡꓰ ꓑꓴ-ꓬ-ꓳ ꓟꓵꓽ ꓑ ꓫꓬꓽ ꓐꓴ ꓔꓯ ꓜꓲ ꓜꓲ ꓑꓰꓹ ꓑꓰꓹ ꓠꓬꓲꓸ ꓤꓲ ꓢꓲꓸ ꓙꓵꓽ ꓡ ꓟ ꓔꓯ ꓔꓳꓹ ꓡꓯ ꓘꓳ ꓓꓴ ꓜꓴ ꓥ ꓡꓳ꓿ ꓬꓲꓸ ꓪ ꓠꓬ ꓑ ꓫꓬ ꓢꓯꓼ ꓟꓬ ꓐꓰ ꓖꓴꓽ ꓙꓴ ꓔꓯ ꓡꓳꓸ ꓙ ꓠꓹ ꓟ ꓢꓯꓼ ꓟꓬ ꓑ ꓔꓸ ꓢꓴ꓾ ꓑ ꓫꓬ ꓗꓪ ꓐꓰ ꓦꓵ ꓔꓸ ꓢꓴ ꓥ ꓡꓳ ꓐꓰ ꓢꓷ ꓙ ꓟꓴ ꓙ ꓔ ꓡꓳ꓿