ꓑꓴ-ꓔ-ꓳ ꓗꓪ ꓡꓸ-ꓛꓲꓸ ꓧꓪ ꓜꓽ ꓝꓲꓸ ꓛꓲꓳ

ꓑꓴ-ꓔ-ꓳ ꓕꓲꓽ ꓟꓵꓽ ꓬꓲ ꓙꓬ ꓡꓳ ꓗꓸ ꓮ ꓙꓵꓽ ꓗꓪ ꓡꓸ ꓛꓲꓸ ꓧꓪ ꓜꓽ ꓝꓲꓸ ꓛꓲ ꓔꓬ ꓡꓳ꓿

ꓡ ꓛꓲꓸ ꓠꓴꓹ ꓠꓴꓼ ꓕꓴꓽ ꓕꓲꓽ ꓕꓴꓽ ꓠꓬ 12000-20000 ꓒꓯꓼ ꓪꓴꓽ ꓡꓯ ꓘꓳ ꓔꓬ ꓢꓲ꓾ ꓕꓱ ꓟ ꓠꓬ ꓪꓴ-ꓢ ꓖꓶꓽ ꓡ ꓟ ꓶ ꓤ ꓫꓱꓸ ꓤ ꓥꓳ ꓐꓰ ꓫꓸ ꓟꓳ ꓐꓯ ꓔꓬ ꓢꓴ ꓙꓳ ꓡꓳ꓿

“ꓡꓲ ꓛꓲ ꓟꓵꓽ ꓓꓳ ꓢꓲꓸ ꓒꓵꓽ ꓧꓪ ꓟꓽ ꓙꓲ ꓟ ꓦꓬꓼ ꓠꓬꓲ ꓗꓪ ꓡꓸ ꓛꓲꓸ 2 ꓫꓵꓽ ꓠꓽ ꓧꓪ ꓢꓲꓸ 15 ꓢꓯꓹ ꓪ ꓬꓰꓳ꓿ ꓕꓱ ꓟ ꓠꓽ ꓪꓴ-ꓢ ꓡꓰ ꓶꓼ ꓤ ꓫꓱ ꓤ ꓟꓶ ꓦ ꓜꓯꓼ ꓡ ꓝꓲˍ ꓟ ꓥ ꓡꓳ” ꓐꓰ ꓡ ꓛꓲꓸ ꓧꓪ ꓒꓽ ꓕꓲꓽ ꓣꓳ ꓡꓰ ꓐꓯ ꓡꓳ꓿

ꓞꓳ ꓘꓹ ꓢꓴ ꓡꓹ ꓜꓶꓼ ꓔꓲꓸ ꓜꓽ꓾ ꓡꓱ ꓜꓽ ꓓꓴ ꓬꓰˍ ꓟ ꓡꓰ ꓟꓽ ꓞꓲ ꓧꓶꓽ ꓒꓽ ꓡꓳ ꓑ ꓐꓴ ꓠꓲꓹ ꓫꓵ ꓠꓬꓲ꓾ ꓧꓶꓸ ꓕꓯꓽ ꓟ ꓕꓯ ꓢꓲ ꓕꓱ ꓡꓱ ꓧꓪ ꓔꓬ ꓟ ꓥ ꓡꓳ꓿

ꓟꓶ ꓘꓶꓼ ꓡꓸ ꓛꓲꓸ ꓙꓱ ꓝꓲꓸ ꓛꓲ ꓡ ꓠꓬ ꓟꓶ-ꓡ-ꓫꓵ-ꓓꓰ ꓓꓽ ꓖꓴꓽ ꓗꓪ꓾ ꓡꓳ ꓙꓽ ꓓꓰ ꓗꓪ꓾ ꓬꓲꓸ ꓝꓲꓸ ꓗꓪ ꓛꓽ ꓐꓲꓽ ꓛ ꓗꓪ ꓡꓸ ꓛꓲꓸ ꓙꓶꓼ ꓢꓴ ꓝꓯꓸ ꓔꓬ ꓡꓳ꓿

ꓟꓶ-ꓡ ꓕꓲ ꓡꓳ ꓒ-ꓖꓽ ꓗꓪ ꓛꓲ꓾ ꓟꓶ-ꓡꓲꓸ ꓕꓲ ꓡꓳ ꓕꓳ-ꓕꓴꓼ ꓘꓹ ꓗꓪ ꓛꓲ꓾ ꓗꓶ-ꓞꓽ ꓕꓲ ꓡꓳ ꓡꓳꓸ-ꓟꓶꓽ꓾ ꓑ-ꓠ-ꓓꓰ ꓗꓪ ꓛꓲ ꓡꓸ ꓛꓲꓸ ꓧꓪ ꓢꓴ ꓛꓽ ꓐꓲ ꓗꓴ ꓕꓴꓽ ꓬꓰ ꓔꓬ ꓡꓳ꓿ ꓮ ꓡꓲꓳ ꓐꓯ ꓠꓬ ꓭꓸ ꓙꓱ ꓘꓪ ꓗꓪ ꓔꓬ ꓢꓲꓸ ꓭꓸ ꓚꓲꓸ ꓛꓵꓼ ꓜꓽ ꓚꓰꓼ ꓟ ꓐꓶ ꓓꓲ ꓕꓲꓽ ꓫꓵꓽ ꓥ ꓡꓳ꓿