ꓑꓴ-ꓔ-ꓳ ꓗꓪ ꓙꓵ ꓪ ꓣꓴ ꓟꓯꓼ ꓔꓯ ꓔꓺ ꓢꓴ ꓐꓴ ꓟꓯꓼ ꓤꓹ ꓙꓰ ꓖꓴꓳ

ꓟꓬ-ꓟ ꓗꓴꓷꓼ ꓑ ꓫꓬ ꓙꓵꓽ ꓪ ꓦꓴ ꓣꓴ ꓢꓴ ꓟꓯꓼ ꓐꓴ ꓔꓯ ꓔꓺ ꓢꓲ꓾ ꓠꓴꓖ/ꓑꓓꓝ ꓔꓯ ꓢꓰꓼ ꓔꓳꓹ ꓡꓯ ꓘꓳ ꓠꓹ ꓟ ꓑꓴ-ꓔ-ꓳ ꓡ ꓞꓳ ꓮ ꓟꓬꓹ ꓠꓬ ꓟꓯꓼ ꓤꓹ ꓙꓰ ꓖꓴꓳ ꓐꓰ ꓓꓳꓽ ꓜꓳ ꓡ ꓡꓳ꓿

“ꓢ-ꓖꓳꓼ꓾ ꓜꓲ-ꓪꓰꓸ꓾ ꓢ-ꓘꓶꓽ-ꓓꓸ ꓞꓳ ꓘꓹꓳ ꓔꓶ ꓗꓪ ꓚꓳꓸ ꓞꓳ ꓡꓯꓸ ꓡꓰꓽ ꓟꓽ ꓞꓲ ꓞꓳ ꓟꓳꓽ ꓮ ꓙꓵꓽ ꓟꓯꓼ ꓤꓹ ꓙꓰ ꓖꓴꓳ꓿ ꓟꓶ-ꓡ-ꓫꓵꓸ-ꓓꓰ ꓗꓪ ꓚꓳꓸ ꓡꓸ-ꓓꓸ-ꓖꓳꓽ ꓕꓲ ꓗꓯ ꓟ 30 ꓣꓳ ꓔꓴ ꓙꓰꓳ꓿ 9 ꓦ 19 ꓠꓬꓲ ꓗꓪ ꓥꓳ꓿ ꓬꓲꓸ ꓪ ꓠꓽ ꓗꓴ ꓗꓴ ꓢꓲ ꓞꓲꓼ ꓡꓯ ꓘꓳ ꓢꓲ ꓟꓯꓼ ꓤꓹ ꓙꓰ ꓖꓴꓳ” ꓐꓰ ꓡꓳ ꓑ ꓮ-ꓓ ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓘꓳ-ꓡ-ꓒꓶꓸ ꓟꓯꓼ ꓟꓬꓱꓽ ꓬꓰ ꓚꓱꓹ ꓔꓯ ꓢꓷꓸ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿

2021 ꓘꓳꓼ 9 ꓦ 19 ꓠꓬꓲ ꓕꓲ ꓠꓬꓲ ꓟ ꓠꓬ꓾ ꓟꓰꓹ-ꓮꓳ-ꓡꓮꓲꓽ ꓑꓴ-ꓔ-ꓳ ꓗꓪ ꓓꓯꓺ ꓡ ꓓꓴ ꓬꓰ ꓥ ꓐꓯ ꓢꓲꓸ ꓬꓲꓸ ꓓꓳꓽ ꓑ ꓙ ꓡ ꓟ ꓕꓲ ꓠꓬꓲ ꓥꓳ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓟꓶ-ꓡ-ꓫꓵꓸ-ꓓꓰ ꓗꓪ ꓔꓬ ꓟ ꓡꓸ-ꓓꓸ-ꓖꓳꓽ ꓢꓴ ꓕꓲ ꓗꓯ ꓟ ꓟꓯꓼ ꓤꓹ ꓓꓴ ꓔꓴ ꓙꓰ ꓟ ꓥ ꓡꓳ꓿

“ꓬꓲꓸ ꓟꓶ ꓗꓪ ꓠꓽ ꓑꓴ-ꓔ-ꓳ ꓢꓴ ꓐꓴ ꓔꓯ ꓢꓴ ꓡꓲꓸ ꓡ ꓢꓲꓸ ꓢꓰꓼ ꓟꓽ ꓛꓲ ꓠ ꓔꓸ꓿ ꓣꓳ ꓢꓴ ꓣꓳ ꓢꓲꓸ ꓢꓰꓼ ꓡꓯ ꓘꓳ ꓡ ꓚꓱꓹ ꓝꓰꓸ ꓖꓰꓳ꓿ ꓣꓳ ꓟꓵꓽ ꓗꓪ ꓟꓽ ꓜꓳ ꓟꓽ ꓔꓱꓹ ꓫꓵꓽ ꓓꓳ ꓓꓴ ꓟꓽ ꓙꓳ ꓡ ꓠꓹ ꓟ ꓐꓱ ꓶ ꓞꓳ ꓪꓴꓽ ꓐꓴ ꓠꓲꓹ ꓞ ꓢꓯꓼ ꓕꓵꓼ ꓙꓵꓹ ꓛꓲꓳ” ꓐꓰ ꓑꓴ-ꓔ-ꓳ ꓟꓵꓽ ꓗꓪ ꓟ ꓞꓳ ꓪꓴꓽ ꓕꓲ ꓣꓳ ꓡꓰ ꓙ ꓫꓸ ꓫꓼ ꓐꓯ ꓩꓴ ꓡ ꓡꓳ꓿ ꓬꓲꓸ ꓟꓬꓱꓺ ꓔꓯ ꓕꓽ ꓐꓳ ꓖꓶ ꓡꓯ ꓐꓰ ꓓꓰꓽ ꓩꓴ ꓡ ꓡꓳ꓿

ꓑꓴ-ꓔ-ꓳ ꓑꓓꓝ ꓡꓰ ꓥ ꓟꓲ ꓫꓵꓽ ꓟꓽ ꓒꓯ/ꓦ ꓡꓱ ꓚꓱꓹ ꓟꓽ ꓒꓯꓽ ꓙꓵꓽ ꓪ ꓦꓴ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓓꓴ ꓥꓳ ꓐꓰ (ꓟꓬ-ꓟ꓾ ꓡꓲ-ꓢꓴ꓾ ꓮ-ꓒꓴ꓾ ꓮ-ꓢ꓾ ꓣ-ꓪ ꓥꓳꓽ ꓫꓵꓽ ꓗꓪ ꓐꓰ) ꓢꓷ ꓙ ꓟꓴ ꓙ ꓔ ꓡꓳ꓿