ꓟꓶ-ꓚꓲ-ꓠ ~ ꓑꓴ-ꓔ-ꓳ ꓙ ꓖꓴ ꓑꓲꓸ ꓔꓸ ꓟ ꓮ ꓡꓻ ꓦ ꓐ ꓢꓽ ꓟ ꓙꓳ ꓡ ꓟ ꓑꓶꓸ ꓓꓴ ꓑꓴ-ꓔ-ꓳ ꓗꓪ ꓔꓹ-ꓞꓰꓽ 1 ꓪꓰꓸ ꓗ 1 ꓢꓯꓹ꓾ ꓜꓻ ꓕꓲꓽ ꓟꓳ ꓠꓳ 3 ꓢꓯꓹ ꓒꓵꓽ ꓔꓬ ꓡꓳ꓿
“ꓜꓻ ꓒꓵꓽ꓾ ꓧꓪ ꓞꓶ ꓒꓵꓽ ꓠꓬ ꓔꓸ ꓟꓼ ꓠ ꓗꓪ ꓛꓲ ꓠꓯꓸ ꓬꓰꓳ ꓟꓽ” ꓐꓰ ꓟꓶ-ꓡ-ꓫꓵ-ꓓꓰ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓙ ꓖꓴ ꓒꓴ ꓡ ꓟꓹ ꓟ ꓑꓚꓖ ꓜꓴ ꓗꓪ ꓐꓰ ꓖꓪ ꓙꓱ ꓥ ꓟꓲ ꓟꓯꓼ ꓕꓲꓽ ꓒꓳꓹ ꓗꓪ ꓐꓰ ꓒꓴ ꓟꓽ ꓫꓳ ꓟ ꓑꓶꓸ ꓓꓴ ꓑ ꓫꓬ ꓐꓴ ꓕꓱ ꓡꓱ ꓫꓸ ꓡ ꓔꓬ ꓡꓳ꓿
ꓟꓯꓼ ꓢꓲꓽ ꓒ ꓕꓲ ꓒꓳꓹ ꓗꓪ ꓐꓰ ꓠꓬ ꓙ ꓖꓴ ꓟꓽ ꓒꓴ ꓒꓴ꓾ ꓙꓱ ꓦꓲ ꓗꓪ ꓐꓰ ꓓꓰ ꓜꓯ ꓚꓰꓹ ꓢꓲ꓾ 2024 ꓘꓳꓼ 5 ꓦ 16 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓦ ꓟꓲ ꓬꓰ ꓜꓽ ꓢꓴ ꓑ ꓫꓬ ꓐꓴ ꓔꓯ 1 ꓗꓽ ꓓꓰ-ꓜꓯ 1 ꓖ ꓡ (16,000 ꓒꓯꓼ) ꓪꓴꓽ ꓖꓶ ꓔꓬ ꓡꓳ꓿ ꓖꓳ ꓡꓱ ꓥ ꓟꓲ ꓦ ꓟꓲ 1 ꓗꓽ ꓬꓰ ꓠꓹ ꓟ ꓓꓰ ꓜꓯ ꓮ ꓡꓻ 2 ꓖ ꓡ ꓕꓯꓽ ꓢꓲꓸ ꓡꓳꓼ ꓥ꓾ ꓐꓯ ꓡꓳ꓿
ꓗꓳꓸ ꓗꓷ ꓟ 3 ꓦ 8 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓗꓲꓮ/ꓗꓑꓓꓝ ꓐꓰ ꓟꓬ-ꓟ ꓟꓯꓼ ꓐꓴ ꓟꓯꓼ ꓢꓰꓼ ꓡꓯ ꓘꓳ ꓡ ꓟ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓙ ꓖꓴ ꓑꓲꓸ ꓔꓸ ꓟ ꓥ ꓡꓳ꓿
ꓢꓲ-ꓑ-ꓐꓳ ꓔꓯ ꓗꓲꓮ/ꓗꓑꓓꓝ ꓡꓰ ꓓꓶꓽ ꓧꓪꓸ ꓡꓰ ꓗꓸ ꓠꓯꓸ ꓑꓴ-ꓔ-ꓳ ꓗꓪ ꓟ ꓟꓯꓼ ꓐꓰ ꓗꓳꓸ ꓙꓲꓽ ꓙꓳ ꓢꓴ ꓐꓴ ꓙꓱ ꓦꓲ ꓗꓪ ꓐꓰ ꓟꓽ ꓠꓽ ꓠꓽ ꓫꓶꓸ ꓡꓽ ꓙꓰ ꓔꓬ ꓡꓳ꓿ ꓟꓶ ꓤ ꓟꓽ ꓥ ꓢꓰꓽ ꓕꓯꓽ ꓑꓴ-ꓔ-ꓳ ꓡꓳ ꓒꓤ ꓔꓯ ꓗꓲꓮ/ꓗꓑꓓꓝ ꓗꓪ ꓐꓰ ꓓꓶꓽ ꓣꓴ ꓔꓳꓼ ꓬꓰꓳꓸ ꓐꓰ ꓓꓳꓽ ꓜꓳ ꓡꓳ꓿