ꓑꓳ-ꓡ ꓗꓴꓷꓼ ꓗꓪ ꓙꓳˍ ꓟ ꓣ-ꓫꓸ ꓡꓰ ꓫꓬꓹ ꓔꓸ ꓟ MIG-29 ꓟꓯꓼ ꓙꓱ ꓦꓲ ꓮ ꓙꓵꓽ ꓬꓴ-ꓗ-ꓣꓲꓸ ꓗꓴꓷꓼ ꓔꓯ ꓔꓳꓹ ꓙ ꓔꓺ ꓙ ꓖꓶꓽ ꓩꓴ ꓓꓴ ꓪꓽ ꓗꓷꓳ ꓐꓰ ꓓꓳꓽ ꓓꓳ ꓡ ꓡꓳ꓿
ꓕꓱ ꓟ ꓠꓬ ꓴꓢꓮ ꓐꓶꓽ ꓗꓴꓷꓼ ꓢꓲꓽ ꓒ ꓐꓶ-ꓡꓲ-ꓗꓲ ꓡꓰ ꓑꓳ-ꓡ ꓗꓴꓷꓼ ꓢꓲꓽ ꓒꓽ ꓐꓴ ꓔꓯ MIG-29 ꓐꓱ ꓶ ꓠꓱꓸ ꓐꓯꓼ ꓙꓱ ꓦꓲ ꓬꓲꓸ ꓛꓲ ꓖꓶ ꓓꓴ ꓖꓪ ꓙꓱ ꓪꓽ ꓡꓰˍ ꓟ ꓥ ꓡꓳ꓿
ꓬꓴ-ꓗ-ꓣꓲꓸ ꓟꓯꓼ ꓙꓱ ꓦꓲ ꓫꓵꓸ ꓢꓴ ꓐꓴ ꓠꓬ ꓠꓱꓸ ꓐꓯꓼ ꓙꓱ ꓦꓲ ꓕꓯꓽ ꓢꓲ MIG-29 ꓙꓱ ꓦꓲ ꓔꓯ ꓮ ꓘꓶꓸ ꓡ ꓔꓲꓺ ꓠ ꓫꓵꓸ ꓐ ꓡ ꓟ ꓑꓶꓸ ꓓꓴ MIG-29 ꓔꓯ ꓟꓽ ꓓ ꓟꓽ ꓢ ꓧꓪ ꓖꓶꓽ ꓩꓴ ꓡ ꓟ ꓥ ꓡꓳ꓿ ꓕꓱ ꓗꓪ ꓒꓴ ꓓꓳ ꓢꓴ ꓠꓬ ꓴꓢꓮ ꓗꓴꓷꓼ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓣ-ꓫꓸ ꓡꓰ ꓬꓲ ꓔꓯ ꓛꓴꓽ ꓙꓳ ꓢꓴ ꓢꓪꓼ ꓡ ꓟ ꓔꓯ ꓗꓳꓺ ꓚꓱ ꓟ ꓑꓶꓸ ꓓꓴ꓾ ꓑꓳ-ꓡ ꓠꓬ ꓟꓯꓼ ꓙꓱ ꓦꓲ ꓐꓴ ꓔꓯ ꓬꓴ-ꓗ-ꓣꓲꓸ ꓗꓪ ꓔꓺ ꓛꓲ ꓟꓽ ꓦ ꓖꓶ꓿ ꓙ-ꓟꓶ-ꓠꓰ ꓗꓴꓷꓼ ꓗꓪ ꓙꓳˍ ꓟ ꓴꓢꓮ ꓟꓯꓼ ꓒꓱ ꓙꓱ ꓦꓲ ꓠꓽ ꓔꓶꓸ Ramstein ꓗꓪ ꓛꓲ ꓦ ꓩꓴ ꓡ ꓓꓴ ꓥ ꓡꓳ꓿
ꓙ-ꓟꓶ-ꓠꓰ ꓗꓪ ꓛꓲ ꓡ ꓟ ꓑꓳ-ꓡ ꓟꓯꓼ ꓙꓱ ꓦꓲ MIG-29 ꓔꓯ ꓬꓴ-ꓗ-ꓣꓲꓸ ꓗꓪ ꓮ ꓡꓲ ꓫꓵꓸ ꓓꓵꓽ ꓡ ꓠꓹ ꓟ ꓚꓱꓹ ꓠꓬ ꓢꓰꓸ ꓮ ꓢꓸ ꓓꓴ꓾ ꓚꓵꓺ ꓔꓸ ꓢꓰꓽ ꓟ ꓚꓱꓹ ꓕꓲ ꓟ ꓥ ꓡꓳ꓿
ꓬꓲꓸ ꓚꓰ꓾ ꓚꓐꓢ, BBC