ꓟꓬ-ꓟ ꓗꓴꓷꓼ ꓗꓪ ꓢꓰꓸ ꓮ ꓢꓸ ꓢꓲꓸ ꓖꓼ ꓡꓳꓸ ꓢꓴ ꓢꓲ ꓤ 80 ꓢꓯꓹ ꓟꓽ ꓞꓲ ꓙꓳ ꓟ ꓟꓬꓱ ꓓꓳꓽ ꓙꓳ ꓢꓴ ꓑꓬꓴ-ꓑꓬꓴ-ꓕꓱꓲꓸ ꓐꓰ ꓶ ꓡꓯꓼ ꓬꓰ ꓜꓴ 20 ꓟꓽ ꓞꓲ ꓧꓹ ꓙꓰꓳ=
ꓑꓬꓴ-ꓑꓬꓴ-ꓕꓱꓲꓸ ꓠꓬ ꓑ ꓫꓬ ꓙꓵ ꓪ ꓦꓴ ꓢꓴ ꓟꓯꓼ ꓐꓴ ꓟꓽ ꓜꓳ ꓟ ꓔꓯ ꓟꓽ ꓕꓱ ꓟ ꓡꓰ ꓟꓽ ꓞꓲ꓾ ꓑ ꓫꓬ ꓙꓵꓽ ꓪ ꓦꓴ ꓢꓴ ꓟꓯꓼ ꓐꓴ ꓡꓰ ꓮ ꓔꓳꓸ ꓛꓴ ꓗꓷ ꓟ ꓗꓲꓸ-ꓟ ꓘꓹ ꓗꓪ ꓫꓱꓸ ꓤꓼ ꓟꓬꓱꓽ ꓬꓰ ꓙꓰ ꓕꓯ ꓘꓶ ꓡꓶꓽ ꓢꓴ ꓟꓯꓼ ꓐꓴ ꓢꓷꓸ ꓡꓰ ꓗꓪ ꓛꓲ ꓐꓬꓱꓽ ꓢꓯꓸ ꓓꓱꓽ ꓗꓷ ꓠꓬꓲ꓾ ꓑ ꓫꓬ ꓐꓴ ꓮ ꓟꓬꓹ ꓠꓲꓹ ꓟ ꓧꓶ ꓔꓬ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓬꓲꓸ ꓐꓬꓱꓽ ꓐꓰ꓾ ꓬꓲꓸ ꓢꓯꓼ ꓗꓪ ꓐꓰ ꓶ ꓤ ꓶ ꓟꓲ ꓪꓴꓽ ꓖꓶ ꓟ ꓮ ꓙꓵꓽ ꓑ ꓫꓬ ꓐꓴ ꓟꓽ ꓘꓳ ꓣꓴ ꓐꓰ ꓐꓯ ꓩꓴ ꓡ ꓡꓳ= ꓖꓳ ꓕꓯ ꓧꓶꓸ ꓕꓯ ꓑꓬꓴ-ꓑꓬꓴ-ꓕꓱꓲꓸ ꓔꓯ ꓣꓱꓽ ꓢꓲ ꓶ ꓤ ꓢꓷꓸ ꓙ ꓟꓴ ꓙ ꓝꓳ ꓟ ꓶ ꓡꓯꓼ ꓜꓴ ꓐꓴ ꓮ ꓟꓬꓹ ꓠꓬ ꓑꓬꓴ-ꓑꓧꓬ-ꓕꓱꓲꓸ ꓐꓰ ꓟꓬꓱꓽ ꓬꓰ ꓠꓽ ꓗꓷ ꓓꓴ ꓥꓳ ꓐꓯ ꓡꓳ=
Samsaung၊ ရွှေပြည်နန်း၊ Grand Palace Myanmar၊ Centuri Mattress, Rainbow Detergent Myanmar, Blade Dar Lay, T Home Electronics, Vigo Instant Cereal Drink, New V- Rohto၊ Sunday၊ ပန်းလေးမေမေ၊ ဦးကာက ဒေါ်စိန်လက်ဖက် ꓕꓱ ꓡꓱꓳ ꓫꓵꓽ ꓶ ꓡꓯꓼ ꓜꓴ ꓐꓴ ꓮ ꓙꓵꓽ ꓠꓬ ꓑ ꓫꓬ ꓠꓲꓹ ꓜꓳ ꓡꓰ ꓟ ꓑꓬꓴ-ꓑꓬꓴ-ꓕꓱꓲꓸ ꓐꓰ ꓥꓪ ꓠꓴ ꓟꓽ ꓙ ꓡꓯ ꓘꓳ ꓐꓰ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ=
ꓕꓱ ꓟ ꓠꓬ ꓟꓯꓼ ꓡꓰ ꓟꓶ ꓫꓵ ꓫꓵ ꓠꓬꓲꓸ ꓤꓲ ꓢꓲꓸ ꓙꓵꓽ ꓔꓬ ꓟ ꓟꓬ-ꓟ ꓗꓴꓷꓼ ꓗꓪ ꓧꓶꓸ ꓕꓯ ꓟꓽ ꓒꓬꓱꓼ ꓠꓬꓲ ꓟ ꓕꓲ ꓫꓵꓽ ꓥ ꓡꓳ= ꓑ ꓫꓬ ꓐꓴ ꓙꓵꓽ ꓪ ꓮ ꓘꓶꓸ ꓪꓽ ꓠꓬꓲ ꓟ ꓔꓯ ꓶ ꓡꓯꓼ ꓬꓰ ꓢꓴ ꓐꓴ ꓦꓰꓸ ꓡꓰ ꓗꓪ ꓛꓲ ꓧꓪꓸ ꓛꓲ ꓡ ꓟ ꓕꓲ ꓫꓵꓽ ꓥ ꓡꓳ= ꓞꓳ ꓡꓲ ꓞꓳ ꓒꓰꓼ ꓚꓱꓹ ꓗꓪ ꓐꓰ ꓑ ꓫꓬ ꓔꓯ ꓟꓽ ꓒꓵꓽ ꓢꓴ꓾ ꓫꓸ ꓝꓲꓸ ꓢꓴ ꓐꓴ ꓔꓯ ꓒꓰ ꓩꓴ ꓗꓷ ꓟ ꓕꓲ ꓫꓵꓽ ꓥ ꓢꓲ꓾ ꓧꓪ ꓒꓴ ꓥꓳꓽ ꓗꓪ ( Social Punishment) ꓘꓴ ꓡꓳ= ꓞꓳ ꓤ ꓐꓴ ꓠꓲꓹ ꓐꓶ ꓡꓰ ꓢꓲꓸ ꓒꓰ ꓗꓷ ꓡ ꓟ ꓟꓸ ꓙꓽ ꓚꓱꓹ ꓕꓲ ꓫꓵꓽ ꓥ ꓡꓳ= ꓙꓵꓽ ꓗ ꓗꓪ ꓐꓰ ꓟꓽ ꓥ ꓥ꓾ ꓡ ꓞꓳ ꓐꓴ ꓙ ꓡꓯ ꓘꓳ ꓚꓱꓹ ꓗꓪ ꓐꓰ ꓒꓰ ꓩꓴ ꓗꓷ ꓡ ꓟ ꓥ ꓡꓳ=
ꓑꓬꓴ-ꓑꓬꓴ-ꓕꓱꓲꓸ ꓠꓬ 25 ꓘꓳꓼ ꓙꓳ ꓢꓲ꓾ ꓟꓬꓱ ꓓꓳ ꓙꓳ ꓟ Lady Ga Ga ꓟꓴ ꓖꓪ ꓔꓯ ꓖꓪ ꓢꓲꓸ ꓗꓪ ꓛꓰꓹ ꓛꓰꓹ ꓠꓬꓲ ꓬꓰ ꓟ ꓗꓪ ꓐꓰ ꓡ ꓞꓳ ꓐꓴ ꓢꓰꓸ ꓮ ꓢꓸ ꓡ꓾ ꓢꓯꓼ ꓖꓶ ꓡ ꓟ ꓗꓪ ꓐꓰ ꓕꓲ ꓝꓸ ꓟꓬꓱꓽ ꓓꓳ ꓙꓳ ꓡ ꓢꓴ ꓕꓲ ꓣꓳ ꓥ ꓡꓳ= ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓑ ꓫꓬ ꓐꓴ ꓠꓲꓹ ꓐꓶ ꓡꓰ ꓟ ꓑꓶꓸ ꓓꓴ ꓞꓰ ꓬꓯꓼ ꓡꓰ ꓟ ꓦꓬꓼ ꓠꓬꓲ ꓛꓲ ꓡꓻꓳ ꓐꓰ ꓢꓪꓼ ꓟꓶ ꓓ ꓡꓳ=