ꓐꓲ-ꓔꓲ-ꓫꓲ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓐꓳꓹ-ꓬꓲꓼ ꓙꓳ-ꓢꓲ (Borris Johnson ) ꓠꓬ Conservative ꓑ-ꓔꓲ ꓧꓳꓽ ꓪꓴꓸ ꓟꓴ ꓟꓬꓱꓽ ꓗꓪ ꓐꓰ ꓓꓳ ꓙꓰ ꓓꓴ ꓭꓳ ꓐꓰ ꓠꓬꓲꓸ ꓠꓬꓲ 2022 ꓘꓳꓼ 7 ꓦ 7 ꓠꓬꓲ ꓕꓯꓽ ꓬꓲꓸ ꓚꓲꓸ ꓛꓬ ꓡꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓬꓲꓸ ꓧꓳꓽ ꓪꓴꓸ ꓟꓴˍ ꓟ ꓦꓬꓼ ꓠꓬꓲ ꓗꓪ ꓐꓲ-ꓔꓲ-ꓫ ꓗꓴꓷꓼ ꓠꓬ European Union ꓗꓪ ꓐꓰ ꓧꓹ ꓓꓳ ꓗꓪꓺ ꓔꓲꓺ ꓐ ꓡ ꓟ ꓐꓰ꓾ ꓬꓰ ꓜꓳꓽ ꓡꓰˍ ꓟ ꓮ ꓙꓵꓽ ꓐꓱ ꓶ ꓟꓬꓱꓺ ꓓꓳꓽ ꓣꓴˍ ꓥ ꓟꓲ꓾ ꓬꓰ ꓡꓯꓼ ꓟꓽ ꓛꓲ ꓟ ꓮ ꓙꓵꓽ ꓑꓶꓸ ꓓꓴ ꓥ ꓟꓲ ꓠꓲꓹ ꓟ ꓟꓽ ꓢꓻ ꓓꓴ ꓙꓳˍ ꓡꓳ꓾ ꓐꓯ ꓡꓳ꓿
ꓬꓲꓸ ꓑ-ꓔꓲ ꓗꓪ ꓟ ꓑ ꓫꓬ ꓝꓲ ꓓꓴ 50 ꓣꓳ ꓛꓲ ꓠꓬ ꓬꓲꓸ ꓡꓰꓽ ꓧꓳꓽ ꓪꓴꓸ ꓟꓴˍ ꓟ ꓔꓯ ꓦ ꓡꓱ ꓟꓽ ꓐꓳ ꓐꓯ ꓢꓲꓸ ꓓꓳ ꓙꓰˍ ꓟ ꓑꓶꓸ ꓓꓴ ꓬꓲꓸ ꓥ ꓟꓲ ꓠꓬꓹ ꓟꓽ ꓙ ꓬꓰ ꓠꓬꓲ꓾ ꓑ-ꓔꓲ ꓧꓳꓽ ꓢꓴ ꓟꓬꓱꓽ ꓗꓪ ꓐꓰ ꓓꓳ ꓙꓰ ꓓꓴ ꓓꓵꓽ ꓙ ꓞꓷꓹ ꓩꓴ ꓡ ꓟ ꓥ ꓡꓳ꓿
“ꓑ-ꓔꓲ ꓧꓳꓽ ꓚꓱꓹ ꓐꓰ꓾ ꓗꓴꓷꓼ ꓧꓳꓽ ꓚꓱꓹ ꓗꓪ ꓬꓲꓸ ꓫꓵꓼ ꓕꓲ ꓣꓳ ꓢꓲꓻ ꓠ ꓔꓸ ꓥ ꓐꓯ ꓠꓰ ꓓꓵꓽ ꓙ ꓢꓴ ꓟꓬꓽ ꓡ ꓠꓬꓲ ꓕꓱ ꓡꓱ ꓓꓵꓽ ꓙ ꓞꓷꓹ ꓠ ꓗ ꓬꓰˍ ꓟ ꓥꓳ” ꓐꓰ ꓐꓳꓹ-ꓬꓲꓼ ꓙꓳ-ꓢꓲ ꓡꓰꓽ ꓐꓯ ꓡꓳ꓿
ꓐꓲ-ꓔꓲ-ꓫ ꓗꓴꓷꓼ ꓧꓳꓽ ꓚꓱꓹ ꓗꓪ ꓗꓴꓷꓼ ꓧꓳꓽ ꓢꓴ ꓢꓲꓻ ꓣꓴ ꓙꓵꓹ ꓟꓽ ꓛꓲ ꓡ ꓢꓰꓽ ꓥ ꓟꓲ꓾ ꓧꓳꓽ ꓢꓴ ꓟꓴ ꓢꓴ ꓔꓯ ꓦ ꓡꓱ ꓟꓽ ꓐꓳ ꓡꓰˍ ꓠꓬ꓾ ꓑ ꓫꓬ ꓝꓲ ꓓꓴ ꓐꓴ ꓡꓰ ꓣꓴ ꓞꓰ ꓓ ꓟ ꓥ ꓡꓳ꓿
ꓮ ꓟꓶ ꓬꓲꓸ ꓠꓬ ꓑ-ꓔꓲ ꓧꓳꓽ ꓢꓴ ꓟꓬꓱꓽ ꓗꓪ ꓐꓰ ꓓꓳ ꓙꓰ ꓟ ꓡꓰꓽ ꓐꓰ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓟꓬꓱꓽ ꓔꓯ ꓥ ꓟꓲ ꓮ ꓟꓶ ꓑ ꓫꓬ ꓝꓲ ꓓꓴ ꓐꓴ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓬꓲꓸ ꓫꓵꓼ ꓢꓲꓻ ꓣꓡꓪ ꓢꓴ ꓔꓯ ꓡꓯꓼ ꓙꓱ ꓠ ꓗꓷ ꓡꓰˍ ꓥꓳ꓿ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓠꓬꓲ ꓖꓴ ꓗꓪ ꓦꓰꓼ ꓢꓴ ꓬꓲꓸ ꓫꓵꓼ ꓟꓽ ꓢꓲꓻ ꓟꓶ ꓕ ꓑꓳꓸ ꓬꓲꓸ ꓠꓬ ꓖꓳ ꓗꓪ ꓟꓬꓱꓽ ꓬꓰ ꓔꓬ ꓢꓰꓽ ꓥꓳ꓿
ꓐꓳꓹ-ꓬꓲꓼ ꓙꓳ-ꓢꓲ ꓠꓬ 2019 ꓘꓳꓼ ꓕꓯꓽ Conservative ꓑ-ꓔꓲ ꓗꓪ ꓐꓰ ꓢꓲꓻ ꓓꓯꓻ ꓡ ꓢꓲꓸ ꓐꓲ-ꓔꓲ-ꓫꓼ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓒꓬꓱꓼ ꓡ ꓢꓴ ꓥ ꓡꓳ꓿