ꓐꓱ ꓘꓴꓽ ꓠ ꓐꓼ 54 ꓐꓹ ꓡꓯ ꓘꓳ ꓚꓱꓹ ꓔꓯ ꓟꓳꓸ ꓧꓶꓸ ꓕꓯꓽ 2016 ꓘꓳꓼ ꓗꓪ ꓫꓵꓽ ꓘꓶꓽ ꓔꓸ ꓟ ꓡꓰ ꓐꓰ ꓟꓽ ꓥ ꓥ꓾ ꓟꓲꓸ ꓟꓲ 2022 ꓘꓳꓼ 8 ꓦ 22 ꓠꓬꓲ ꓕꓯꓽ ꓮꓳ-ꓢꓸ-ꓳꓸ ꓠꓲꓹ ꓡꓶꓽ ꓡꓳ ꓚ ꓫꓵꓽ ꓘꓶꓽ ꓗꓷꓳ꓿
ꓐꓱ ꓘꓴꓽ ꓠ ꓐꓼ 54 ꓐꓹ ꓡꓯ ꓘꓳ ꓚꓱꓹ ꓔꓯ ꓟꓳꓸ 2000 ꓘꓳꓼ ꓗꓪ ꓐꓰ ꓕ ꓑꓳꓸ ꓐꓯ ꓟꓴ ꓩꓴ ꓡꓯ ꓘꓳ ꓡ ꓢꓲꓸ 2016 ꓘꓳꓼ ꓗꓪ ꓕꓲ ꓧꓪꓹ ꓫꓵꓽ ꓘꓶꓽ ꓞꓰꓹ ꓔꓸ ꓟ ꓥ ꓡꓳ꓿
ꓖꓳ ꓕꓲ ꓧꓪꓹ ꓫꓵꓽ ꓘꓶꓽ ꓟ ꓠꓬ꓾ ꓮꓳ-ꓢ-ꓢꓴ-ꓚꓰꓽ ꓟꓹ ꓟ ꓓꓳ-ꓘꓰ-ꓚꓰ ꓢꓯꓸ ꓔꓬ ꓕꓯꓽ ꓬꓲꓸ ꓤꓽ ꓓꓴ ꓳꓸ-ꓘꓰ-ꓟꓮꓳ-ꓯꓸ ꓔꓯ ꓦꓲ ꓕꓲ ꓦꓲ ꓐꓰ ꓟꓵꓽ ꓕꓲꓽ ꓡꓯꓼ ꓖꓶ ꓔꓸ ꓟ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ ꓬꓲꓸ ꓔꓯ ꓖꓶꓽ ꓔꓸ ꓟ ꓔꓯ ꓟꓽ ꓡꓲꓸ꓿ ꓜꓰ ꓔꓸ ꓟ ꓐꓱ ꓘꓴꓽ ꓕꓲꓽ ꓐꓶꓽ ꓐꓰ ꓦꓲ (ꓬꓲꓸ ꓔꓬ ꓟ) ꓠꓬ ꓮꓳ-ꓢ-ꓢꓴ-ꓚꓰꓽ ꓔꓯ ꓖꓶꓽ ꓔꓸ ꓢꓲ꓾ ꓝꓮꓲ ꓐꓱ ꓘꓴꓽ ꓕꓲꓽ ꓐꓶꓽ ꓠꓬ ꓮꓳ-ꓢ-ꓳꓸ ꓔꓯ ꓖꓶꓽ ꓠꓹ ꓟ ꓫꓵꓽ ꓘꓶꓽ ꓔꓸ ꓟ ꓥ ꓡꓳ꓿
ꓖꓳ ꓡꓱ ꓘꓶꓽ ꓩꓴ ꓡ ꓥ ꓟꓲ꓾ ꓮꓳ-ꓢ-ꓳꓸ ꓠꓲꓹ ꓘꓪꓽ ꓟꓽ ꓫꓵ꓿ ꓬꓲꓸ ꓐꓱ ꓶ ꓦꓲ ꓥ ꓟꓲ ꓕꓲꓽ ꓐꓶꓽ ꓪ ꓙꓲꓽ ꓙꓳˍ ꓡꓳ꓾ ꓐꓯ ꓢꓲꓸ 2018 ꓘꓳꓼ ꓕꓯꓽ ꓕꓲꓽ ꓧꓪꓹ ꓗꓳꓹ ꓡ ꓥ ꓟꓲ꓾ ꓠꓯ-ꓑꓲ-ꓓꓳ ꓟꓴ ꓕꓲꓸ ꓐꓯ ꓟꓴ ꓕꓲꓺ ꓗꓪ ꓐꓰ 2016 ꓘꓳꓼ ꓗꓪ ꓘꓶꓽ ꓔꓸ ꓟ ꓡꓳ ꓚ ꓛꓳ ꓠꓹ ꓟ꓾ ꓗꓳꓹ ꓘꓶꓽ ꓔꓯ ꓮ ꓫꓵꓽ ꓟꓽ ꓢꓪꓼ ꓖꓶ꓿
ꓖꓳ ꓡꓱ ꓥ ꓟꓲ 2022 ꓘꓳꓼ 7 ꓦ 27 ꓠꓬꓲ ꓕꓯꓽ ꓕꓲꓽ ꓧꓪꓹ ꓗꓳꓹ ꓩꓴ ꓡ ꓕꓯꓽ ꓟꓯꓼ ꓡꓯ ꓛꓲ ꓗꓪ ꓟ ꓐꓯ ꓟꓴ ꓢꓲꓽ ꓒꓽ ꓐꓴ ꓡꓰꓽ ꓐꓯ ꓟꓴ ꓘꓳ ꓣꓴ ꓗꓷ ꓢꓲ꓾ ꓟꓲꓸ ꓟꓲ 2022 ꓘꓳꓼ 8 ꓦ 22 ꓠꓬꓲ ꓗꓪ ꓐꓯ ꓟꓴ ꓞꓷꓹ ꓩꓴ ꓡ ꓟ ꓥ ꓡꓳ꓿
ꓧꓶꓸ ꓕꓯꓽ ꓮꓳ-ꓢ-ꓢꓴ-ꓚꓰꓽ ꓬꓲꓸ ꓟꓹ ꓟ ꓡꓰ ꓬꓲꓸ ꓤꓽ ꓓꓴ ꓔꓯ ꓖꓶꓽ ꓔꓸ ꓟ ꓡꓲꓸ ꓠꓹ ꓟ (ꓟꓽ ꓖꓶꓽ ꓠꓹ ꓟ)꓾ ꓦꓲ ꓐꓰ ꓐꓱ ꓠꓬꓲꓽ ꓐꓶꓽ ꓐꓹ ꓡꓯ ꓘꓳ ꓠꓹ ꓟ ꓮꓳ-ꓢꓸ-ꓳꓸ ꓠꓲꓹ ꓡꓶꓽ ꓡꓳ ꓚ ꓫꓵꓽ ꓘꓶꓽ ꓩꓴ ꓡ ꓟ ꓥ ꓡꓳ꓿
ꓮꓳ-ꓢ-ꓳꓸ ꓐꓰ ꓮꓳ-ꓢ-ꓢꓴ-ꓚꓰꓽ ꓠꓬ ꓬꓲꓸ ꓬꓲꓼ ꓠꓬꓲ ꓟ ꓥ ꓟꓲ꓾ ꓧꓶꓸ ꓕꓯꓽˍ ꓡꓰ ꓠꓲꓹ ꓗꓶ ꓟꓬ ꓗꓶ ꓡꓯ ꓘꓳ ꓟ ꓙꓳˍ ꓡꓳ꓿
ꓬꓲꓸ ꓚꓰ꓾ ꓐꓐꓚ